Хуурамч төгрөг тэр тусмаа бага мөнгөн дэвсгэртүүд гадуур худалдаанд их байгаа тухай мэдээлэл саяхан тархсан. Энэ талаар Монголбанк иргэд, аж ахуйн нэгжүүдийг санаа зовох хэрэггүй талаар санууллаа.
Манай улс мөнгөн дэвсгэртүүдээ Англи, Герман, Франц гэсэн гурван улсад хэвлүүлдэг бөгөөд эдгээр орны харилцагч хэвлэлийн компаниудаас бага мөнгөн дэвсгэртийнхээ нууцлалыг багасгахыг санал болгосноор аравт, хорьтын дэвсгэртүүдийн хүмүүсийн нүдэнд ил үзэгдэх гурван нууцлалыг саяхнаас хэвлэхээ больсон юм байна. Харин  үүнийг баттай эх сурвалжаас лавлаагүйн улмаас  хэвлэл мэдээллийн хэрэгсэлээр бага тэмдэгтийн хуурамч мөнгөн дэвсгэрт худалдаанд байгаа тухай цуурхал тархжээ.
       Мөнгөн дэвсгэртийн нууцлалыг багасгах болсон шалтгаан нь тухайн дэвсгэрт хэр их нууцлалтай байна, тэр хэмжээгээр хэвлэх өртөг өндөр байдагт байгаа аж. Олон улсын жишгээс харахад бага мөнгөн дэвсгэртийг хуурамчаар үйлдвэрлэх тохиолдол харьцангуй бага, манай улсад одоогийн байдлаар ийм төрлийн гэмт хэрэг илрээгүй гэнэ. Иймд бага мөнгөн дэвсгэртийн хэвлэлтийн зардалыг бууруулах зорилгоор ийнхүү нууцлалыг багасгасан нь иргэдийг төөрөгдүүлэхэд хүргэжээ.            Дашрамд дурдахад манай улсад төгрөгийг хуурамчаар хэвлэсэн тохиолдол 2013 онд 1431 удаагийн үйлдэл илэрч байсан бол өнгөрсөн онд 606 удаа гарчээ. Үүнээс хамгийн их буюу 95 хувийг хорин мянгатын мөнгөн дэвсгэртийг хуурамчаар үйлдвэрлэх тохиолдол аж. Гэмт хэрэгтнүүд том мөнгөн дэвсгэртийг дууриалгадаг нь ч учиртай. Учир нь хуурамч мөнгөн дэвсгэртийг хэвлэхэд мөн ялгаагүй зардал гарах бөгөөд өөрийн хэвлэсэн үнээс  бага мөнгөн дэвсгэртийг хэн хэвлэх билээ.