“Барилгачдын зөвлөгөөн 2015” өнөөдөр эхлэсэн тухай бид мэдээлсэн. Энэхүү зөвлөгөөний хамгийн сонирхолтой хэсэг үдээс хойш болсон гэхэд хилсдэхгүй. Өглөө болсон сунжирсан олон цуврал лекцийн дараагаас зөвлөгөөнөөс гарах шийдвэрийн төслийн хэлэлцүүлэг болж, барилгын салбарт ажиллагсад, бизнес эрхлэгчид салбар хариуцсан яамандаа дуу хоолойгоо шууд хүргэх боломж олдсон. Ховорхон тохиох энэ мөчийг алдахгүй гэсэн шиг Үйлдвэрчний эвлэлийн соёлын төвийн зааланд байршуулсан хоёр микрофоны ард уртаас урт дараалал үүсэв.

 

Энд сууж байгаа хүмүүс бүгд хоорондоо өртэй

Материал үйлдвэрлэгчдийг төлөөлж  О.Лхагвадорж захирал: “Дарга нараа?  Энэ барилгын салбарынхан чинь өрийн сүлжээ гээч юманд ороод салбарын үйл ажиллагаа зогсох дээрээ тулаад байгааг  ер нь мэдэж байна уу? Бид бүгд чинь хоорондоо өр үүсгэж, ажил хийсээр өргүй хүн гэж байхгүй боллоо. Бетон үйлдвэрлэгчид, цементийхэнд өртэй, угсралтынхан бараг бүгдэд нь өртэй, энд сууж байгаа хүмүүс бүгдээрээ шахам хоорондооо өр авлагатай хүмүүс сууж байна. Энэ байдлаас гарахад Төр засгийн зүгээс оролцохгүй л бол маш хүндрэлтэй байдалд  орлоо. Мөн нийслэл хотын Захиргаатай ярилцаж, хууль тогтоомжоо нэгтгэж өгөхгүй бол хоорондоо зөрөөтэй олон шийдвэрийн дунд барилгынхан учраа олохоо болилоо” хэмээсэн.


Барилгын мэргэжлийн ажилчид Хятад ажилчдаар солигдох вий

Баянхонгор аймгийн Барилгын мэргэжил үйлдвэрлэл сургалтын төвийн захирал алс холоос жилдээ ганц болдог “Барилгачдын зөвлөгөөн”-ийг зорин иржээ. Тэрбээр манай барилгын компаниуд дотоодын барилгын мэргэжлийн ажилчдын ур чадварыг ихэд голдог, хамгийн хямдаар цалинжуулдаг. Сүүлдээ энэ байдал их даамжирвал Монголд барилга дээр ажиллах хүнгүй болж, Хятад ажилчдаар солигдох вий гэсэн битүүхэн айдас байдаг юм. Ер нь мэргэжлийн ажиллах хүчнийг ажиллуулах талаар Төр Засгаас анхаарч Монгол хүнээ авч ажиллуулж байгаа барилгын компаниудыг урамшуулж дэмждэг болооч гэсэн саналтай байгаагаа дуулгав.

Хүн бүр хөдөлмөр хамгаалал гэдэг ч хэн  ч юу ч хийдэггүй...

“Зэс Тус” ХХК-ийн Хөдөлмөр аюулгүй байдлын инженер дээрх үгийг хэлсэн юм. “ Надтай адил хөдөлмөр хамгааллын чиглэлээр ажилладаг мэргэжилтнүүдийг үг хэлэх болов уу гэж хүлээж байтал нэг ч хүн үг хэлсэнгүй. Ямар нэг хурал зөвлөгөөн болохоор хүмүүс бүгд л хөдөлмөр хамгаалал, барилгын салбартай холбоотой асуудал хөндөгдвөл хөдөлмөр хамгаалал гэдэг  ч яг үүн дээр төвлөрч ажиллаж, ахиц дэвшил гаргах тал дээр хэн ч ажилладаггүй. Ялангуяа дарга нарыг ярьсан шигээ анхаараарай гэж хүсмээр байна” гэсэн юм.