Борлуулалтыг дэмждэг гол хүчин зүйл нь чанар, стандарт байдаг

Борлуулалтыг дэмждэг гол хүчин зүйл нь чанар, стандарт байдаг
                  Өнөөдөр Монголын барилгын салбарт стандарт гэдэг зүйлийн талаар иргэд төдийлөн ойлголт муутай байдаг. Тэгвэл стандарт гэж чухам юу болох, стандарт таны худалдан авч буй орон сууцанд ямар үүрэг нөлөөтэй болох талаар ойлголт өгье. Ямар ч бизнесийг борлуулалтгүйгээр төсөөлөхийн аргагүй. Харин борлуулалтыг дэмждэг гол хүчин зүйл бол стандарт болон чанар юм. Монголын Стандартчилал хэмжил зүйн газрын тодорхойлсоноор “Стандарт бол эдийн засгийн болоод зах зээлийн харилцаанд чанд мөрддөг нэг ёсны хууль юм.

Хэрэглэгчийн эрхийг хамгаалах бодлого, худалдан авах үйл явцад хэрэглэгчийн байр суурийг бизнес эрхлэгчидтэй харьцуулахад хүчгүй, сул дорой байдлыг тэнцүүлэх үүднээс тэднийг бизнес эрхлэхдээ баримтлах наад захын норм, хэм хэмжээ стандарт тогтоохыг шаарддаг. Энэ бол улс орон бүр бараа бүтээгдэхүүн ажил үйлчилгээндээ стандарттай байхыг зорих гол шалтгаануудын нэг мөн” гэсэн байдаг. Барилгын компаниудыг стандарт норм дүрмээ хэрэгжүүлэхгүй байна гэхээсээ илүүтэйгээр орчин үед хэрэглэгчид  маань барилгын компаниудад стандартын шалгуур үзүүлэлтийг зүй ёсоор тавьж шаардах хэрэгтэй. Тэгсэнээр иргэдийн хүсэл шаардлагад нийцэхүйц стандартыг компаниуд хүссэн хүсээгүй зах зээлд өрсөлдхийн тулд хэрэгжүүлж эхлэнэ. 

Зарим нэг мэдвэл зохих стандартуудыг хүргэе.  

Сүүлийн үед баригдаж байгаа барилгуудын орон сууцны гал тогтоо ихэнх нь том өрөөтэйгөө хамт пааргүй байдаг. Үүнийг барилгын компаниуд хоол хийхэд өрөө халчихана хэмээн тайлбарладаг. Тэгвэл стандартад зааснаар гал тогоонд заавал паар байх хэрэгтэй. Зочны өрөө хамгийн доод тал нь 12, унтлагынх найман ам метр байх ёстой. Шалнаас тааз хүртэлх өндөр 2.5 метрээс дээш байна. Хэрэв мансарт бол 2.3-аас дээш байна. Харин шал, налуу хэсгийн өндөр доод тал нь 1.5 метр байх ёстой юм. Мөн хүн тогтмол байх өрөөний температур доод тал нь 18 байх учиртай. Энэ мэтээр маш олон стандартыг цаг зав гарган судалж үзэх хэрэгтэй. Ингэж гэрээ болон стандартад анхаарснаар чанартай орон сууц худалдан авч чадна. Ер нь Улсын комисс хүлээн авсан хэмээн найдах бус өөртөө найдвал хавьгүй илүү. Та өөрийн амьдрах байрандаа хандаж байгаа учир Улсын комиссоос ч илүү хяналт тавих бололцоотой. Европын холбооны улсууд энэ мэт өөрсдөдөө төдийгүй дэлхий дахинаа өндөр стандарт тогтоосон нь чанар хэмээх ойлголтыг араасаа дагуулсан. Тухайлбал, дэлхийн аль ч өнцөгт Герман гэх нэрийг сонсоод хамгийн түрүүнд чанар бодогддог. Тиймээс л тэдэнд итгэх дэлхий нийтийн итгэл хамгийн өндөр байдаг гэнэ. 

Холбоотой мэдээ