Цементийн бизнес эрхлэгчдийн холбоо

Орон сууц худалдан авсан иргэдийн НӨАТ-ын 10 хувийг буцааж өгөх хөшүүргийн механизмаар барилгын салбарыг дэмжье!

2015 оны 3-р сарын 19, Пүрэв гариг, 15:03

Төр ба хувийн хэвшил

Орон сууц худалдан авсан иргэдийн НӨАТ-ын 10 хувийг буцааж өгөх хөшүүргийн механизмаар барилгын салбарыг дэмжье!
Бизнесийн төлөөллийн байгууллага-МҮХАҮТ болон МҮЭ-ийн Холбоо, Монголын Ажил олгогчдын нэгдсэн Холбооноос барилгын салбарыг дэмжих талаар Ерөнхий сайд Ч.Сайханбилэг болон Барилга, хот байгуулалтын сайд Д.Цогтбаатар нарт зургаан зүйлийн шаардлага хүргүүлэв.

Энд 1.Ипотекийн зээлийг олгох талаарх Засгийн газрын шийдвэрт дараах өөрчлөлт оруулах. Үүнд: а/Нэгэнт баригдаж улсын комисс хүлээн авсан орон сууцыг ипотекийн зээлээр авч байгаа иргэдийн төлж байгаа урьдчилгаа төлбөрийн 30 хувийг 10 хувь болгон бууруулж, энэ оны дөрөвдүгээр сарын 1-нээс эхлэн мөрдүүлэх,

б/Ипотекийн зээлээр авч буй орон сууцны хэмжээг 80 ам.метрээр тогтоож байгааг 150 ам.метр болгон нэмэгдүүлэх,

2.Ипотекийн зээлийн урьдчилсан төлбөрийн барьцааны батлан даалтын санг нэмэгдүүлэхэд шаардлагатай 90 тэрбум төгрөгийн эх үүсвэрийг шийдвэрлэн байршуулах арга хэмжээ авах,

3.Барилгын салбарт энэ оны хаврын их ажлыг эхлүүлэхэд шаардлагатай байгаа эх үүсвэрт гадаадын зээл тусламжаас шаардлагатай хэмжээний хөрөнгийг ашиглах асуудлыг шийдвэрлэх, тэвчиж болох, хямралаас гарахад нэмэр багатай төслүүдийн санхүүжилтийг эргэн харж барилгын салбарыг дэмжихэд ашиглах,

4.Барилгын салбарын үйл ажиллагаа эхлэхэд саад тотгор учруулж буй төр, засгийн байгууллагуудын зөрүүтэй шийдвэрүүдийг цэгцлэн нэг мөр болгож барилгын ажил явуулахад саадгүй болгох. Энд жишээ нь, 08-22 цагийн хооронд хотын гудамжаар хүнд даацын машин явуулахыг хориглосон Хотын даргын шийдвэр, мөн барилга угсралтын ажлыг 22-08 цагийн хооронд явуулахыг хориглосон МХЕГ-ын шийдвэр гэх мэт.

5.Цаашид залуус болон орлого багатай иргэдэд зориулан “Хямд үнэтэй нийгмийн орон сууцны төсөл, хөтөлбөр”-т шаардагдах хөрөнгийн эх үүсвэрт зориулж эдийн засагт дарамтгүй, урт хугацааны, бага хүүтэй бодлогын зээл (100-200 сая ам.долларын)-ийг АХБ, Дэлхийн банкнаас авах талаар тавьж шийдвэрлэх замаар эх үүсвэржүүлэх, энэ талаар БНХАУ зэрэг Азийн орнуудын туршлагыг судлан харгалзан үзэх,

6.Ипотекийн зээлд хамрагдах төрийн албан хаагчдын зээлийн эх үүсвэрийн баталгааны 50 хувийг хариуцан төрийн албан хаагчдыг орон сууцжуулах хөтөлбөр гаргасан Нийслэл хотын туршлагыг дэмжин бусад төрийн байгууллагууд хэрэгжүүлэх, төрийн байгууллагын жишээг дэмжин тогтвортой үйл ажиллагаа явуулж буй хувийн хэвшлийн ААН, байгууллагын эзэд, ажил олгогчид өөрсдийн ажилчдыг орон сууцны хөнгөлөлттэй зээлд хамруулавл зээлийн урьдчилгаанд баталгаа гаргах, тодорхой хувийг хариуцахыг судлан шийдвэрлэх, ийм хөдөлгөөнийг дэмжин өргөнөөр оролцохыг нийт ажил олгогчид, төрийн албаны удирдлагад уриалах зэргээр барилгын их ажил эхлэхийн өмнө бодлого, хөрөнгө оруулалтаар дэмжих, нэгэнт баригдсан барилгуудын худалдан авах зах зээлийг өргөжүүлж, эрэлтийг урамшуулахад чиглэсэн арга хэмжээ яаралтай авч хэрэгжүүлэх шаардлагатай байна гэсэн саналуудыг гаргасан юм.

Барилга, хот байгуулалтын сайд Д.Цогтбаатар шаардлагыг хүлээн авч танилцаад барилгын салбарыг хямралаас урьдчилан сэргийлэх, өсөлтийг хангах, ажлын байрыг хадгалан авч үлдэх зэрэг олон хүрээний зорилгыг агуулсан арга хэмжээнүүд байгааг онцолж, Засгийн газарт уламжилж шийдүүлэн ажил хэрэг болгохын төлөө ажиллахаа олон нийтийн байгууллагуудын удирдлагад илэрхийлсэн юм.

МҮХАҮТ-ын Удирдах зөвлөлийн дарга Б.Лхагважав:

-Үүний өмнө бид өнгөрсөн хоёрдугаар сарын 12-нд Танхим дээр салбарын сайд ирж барилгын салбарын бизнес эрхлэгчидтэй уулзсан. Эндээс гарсан саналыг бид энэ удаа бас хүргүүлж байна.

Өнөөдөр барилгын салбарт худалдан авалтыг дэмжих зайлшгүй шаардлага байна. Нэг ёсондоо таваарыг мөнгө болгох асуудал байна. Энд хоёр санал нэмж хэлэхэд барилга худалдаж авах эрэлтийг өдөөх хөшүүрэг маягаар аль 2005 онд УИХ “Зарим материал, тоног төхөөрөмжийг НӨАТ болон гаалийн албан татвараас чөлөөлөх тухай”, мөн “Барилгын тоног төхөөрөмж, түүхий эдийг НӨАТ-аас чөлөөлөх” хуулиудыг батлаж энэ салбарын бизнес, эдийн засгийн ерөнхий хөгжлийг ханган өгч байсан. 
Өнөөдрийн байдлаар манайд дөрвөн их наяд төгрөгийн орон сууц зарагдаагүй, мөн ийм хэмжээний хөрөнгөөр орон сууц баригдаж байна гэсэн мэдээлэл байна. Энэ нөхцөлд худалдан авагч байхгүй тохиолдолд аль ч салбар тэр, том эдийн засгаа татан унагах аюул бий. Тиймээс одоо орон сууц худалдан авсан иргэдийн НӨАТ-ын 10 хувийг буцааж өгөх тийм хөшүүргийн механизмыг ойрын үед бүрдүүлж хэрэгжүүлмээр байна гэсэн саналыг тавьж байна.

Өмнө нь манайд 30 саяын орлогоос гурван сая төгрөгийг буцааж өгдөг ХХОАТ-ын хөнгөлөлтийн механизм бий боловч 2006 онд энэ талын хууль баталж байх үед 30 сая төгрөг нь гурван өрөө байрны үнэ байсан бол өнөөдөр ийм мөнгөөр нэг өрөө байр ч авах боломжгүй. Тэгэхээр энэ зохицуулалт өнөөдөр эрэлтийг өдөөж өгөх хөшүүрэг болж нөлөөлж чадахгүй, явахгүй байна. Харин НӨАТ-ын 10 хувийг буцааж өгснөөр 110 саяын орон сууцны 10 саяыг нь буцааж өгөх боломжтой болж байна. Ингэж эрэлтийг дэмжиж өгье.

Нөгөө талаар компани, ААН-үүд НӨАТ-ын тайлан гаргаж өгдөг заалт бий. НӨАТ-ын хуулийн 8.1.2-т “Барилга угсралтын ажил гүйцэтгэсэн бол эцсийн борлуулалтад НӨАТ-ын тайлан гарган өгч НӨАТ төлөгч байна” гэж заасан. Гэтэл манай барилгын компаниуд өнөөдрийг хүртэл үүнийг ашиглаж чаддаггүй. Нэг ёсондоо энэ заалтыг ашиглах журам ТЕГ-аас ойлгомжтой байдлаар сүүлийн найман жилд бараг гараагүй өдий хүрсэн. Энэ нь нэгд, барилга угсралтын ажил дуусаагүй байхад, хоёрт, урьдчилгаа авсан тохиолдолд татвараасаа НӨАТ төлөх гэх мэтээр нэг ёсондоо зарагдаж борлогдоогүй байгаа бараанаас нь НӨАТ авах маягаар хүндрэл үүсгэдэг. (Учир нь барилга угсралтын ажил доод тал нь 1-2 жил үргэлжилдэг бөгөөд НӨАТ-ын тайланг сар бүр гаргадаг. Гэтэл барилгын компаниуд эцсийн борлуулалт хийгээгүй үедээ тайланг гаргаж өгөх нь хүндрэлтэй байдаг). Тиймээс энэ талын өөрчлөлтийн журам гаргаж мөрдүүлэх шаардлагатай байна. Салбарын сайд таныг энэ дээр ойрын үед онцгой анхаарч, энэ заалтын процессыг тодорхой болгох юм бол барилгын компаниудад их хэрэгтэй байна.

Эцэст нь, өнөөдөр банкны ипотекийн зээлд хамрагдахад иргэд урьдчилгаа 30 хувиа төлөхөд хүндрэлтэй байна. Үүнийг шийдвэрлэхийн тулд Засгийн газраас урьдчилгаа төлбөрийн сан үүсгэх хэрэгтэй бөгөөд иргэд 10 хувиа бэлнээр төлж, Засгийн газрын урьдчилгаа төлбөрийн сангаас 20 хувийг зээлж банкинд байршуулан иргэдийг дэмжих хэрэгтэй байна. Ингэснээр дахин эргэлтийг дэмжих юм.

Тэмдэглэсэн Б.БОЛД