Орон сууцны урьдчилгаа төлбөрийн 30 хувийг 10 хувь болгон бууруулах санал хүргүүллээ
Барилгын салбарыг дэмжих талаар БХБ-ын сайд Д.Цогтбаатарт МҮХАҮТ, МҮЭХ, МАОЭНХ-ноос шаардлага хүргүүллээ. Уг шаардлагад “Эдийн засагт 2014 онд бий болсон 7 хувийн өсөлтийн 80 хувийг уул уурхайн бус салбар, түүний дотор барилга, хөдөө аж ахуй, боловсруулах үйлдвэрийн салбарыг өсөлтөөр хангасан. Барилгын үйлдвэрлэлийг 2015 оны их ажлын эхлэлийн өмнө бодлого, хөрөнгө оруулалтаар дэмжих, нэгэнт баригдсан барилгуудын худалдан авах зах зээлийг өргөжүүлж, эрэлтийг урамшуулахад чиглэсэн арга хэмжээ яаралтай авч хэрэгжүүлэх шаардлагатай байна” гээд дараах саналуудыг гаргасан байна. Үүнд:
-Барилгын салбарт энэ оны хаврын их ажлыг эхлүүлэхэд шаардлагатай байгаа эх үүсвэрт гадаадын зээл тусламжаас шаардлагатай хэмжээний хөрөнгийг ашиглах асуудлыг шийдвэрлэх, тэвчиж болох, хямралаас гарахад нэмэр багатай төслүүдийн санхүүжилтийг эргэн харж барилгын салбарыг дэмжихэд ашиглах,-Ипотекийн зээлийг олгох талаарх Засгийн газрын шийдвэрт дараах өөрчлөлт оруулах:
а/Нэгэнт баригдаж улсын комисс хүлээн авсан орон сууцыг ипотекийн зээлээр авч байгаа иргэдийн төлж байгаа урьдчилгаа төлбөрийн 30 хувийг 10 хувь болгон бууруулж, 2015 оны 4 дүгээр сарын 1-нээс эхлэн мөрдүүлэх,
б/Ипотекийн зээлээр авч буй орон сууцны хэмжээг 80 ам.метрээр тогтоож байгааг 150 ам.метр болгон нэмэгдүүлэх,
-Ипотекийн зээлийн урьдчилсан төлбөрийн барьцааны батлан даалтын санг нэмэгдүүлэхэд шаардлагатай 90 тэрбум төгрөгийн эх үүсвэрийг шийдвэрлэн байршуулах арга хэмжээ авах,
-Барилгын салбарын үйл ажиллагаа эхлэхэд саад тотгор учруулж буй төр, засгийн байгууллагуудын зөрүүтэй шийдвэрүүдийг цэгцлэн нэг мөр болгож барилгын ажил явуулахад саадгүй болгох гэх зэрэг саналыг гаргасан байна.
БХБ-ын сайд Д.Цогтбаатар дээрх санал шаардлагыг хүлээн аваад, ажил хэрэг болгохын төлөө ажиллана гэдгээ хэллээ.