Цементийн бизнес эрхлэгчдийн холбоо

Монгол Улсын Ерөнхийлөгчийн Тамгын газраас нийгэм, эдийн засаг, оюун санааны ертөнцөд шинэ жишиг гаргаж, олон улсын стандартад хүрсэн, улс орныхоо өрсөлдөх чадварын нэрийн хуудас болж чадсан, бизнесийн шинэ чиглэлийн хөгжилд хувь нэмэр оруулсан дэд бүтэц, үйлдвэрлэл, хөдөө аж ахуй, газар тариалан, аялал жуулчлалын салбарын үйлдвэрлэл, барилга байгууламж, Улсын нэр хүндийг өргөсөн, өв соёл, үндэсний уламжлалыг сэргээсэн бүтээл туурвилыг шалгаруулж, жилд нэг удаа, билгийн тооллын он солигдохын өмнө "Үндэсний бүтээн байгуулалтын дээд шагнал-ТӨРИЙН ГЭРЭГЭ” шагнал олгодог билээ.
Энэ жилийн “Үндэсний бүтээн байгуулалтын дээд шагнал-Төрийн гэрэгэ” гардуулах ёслол Төрийн ордон дахь Есөн хөлт цагаан тугт танхимд боллоо. Энэхүү шагналд морь жилийн шилдэг арван бүтээн байгуулалт шалгарснаас шилдэг гуравт “Дулааны IV цахилгаан станц”-ын суурилагдсан хүчин чадлыг 123 МВт-аар өргөтгөх төсөл, "Хөтөлийн цемент шохой" ХХК-ийн үйлдвэрлэл, “Гацуурт” ХХК-ийн газар тариалан, мал аж ахуйн салбарт хийж буй техник, технологийн шинэчлэл төслүүд шалгарч шагналаа гардан авлаа. Үндэсний бүтээн байгуулалтын дээд шагнал Төрийн гэрэгэг Монгол Улсын Ерөнхийлөгч Ц.Элбэгдорж гардуулан баяр хүргэсэн.
Улс орныхоо хөгжилд өндөр хувь нэмрээ оруулсан  "Хөтлийн цемент шохой" ХХК -ийн хамт олны ажил үйлсэд нь амжилт хүсч, Цементийн Бизнес Эрхлэгчдийн Холбоо ТББ нийт гишүүн байгууллагууд, хамт олных нь зүгээс баяр хүргэе.
ЦБЭХолбоо ТББ