Өнөө цагийн үндэсний томоохон бүтээн байгуулалт 1 сая хүртэлх жуулчныг хүлээн авна

 Өнөө цагийн үндэсний томоохон бүтээн байгуулалт 1 сая хүртэлх жуулчныг хүлээн авна
     Сүүлийн жилүүдэд Монгол улсад барилга бүтээн байгуулалтын ажил хурдацтай хөгжиж байгаа билээ. Монгол улсын үндэсний томоохон бүтээн байгуулалт болох Их Майдар төслийн ажлын явц, төслийн бүтээн байгуулалтын талаар Их Майдар сангийн  гүйцэтгэх захирал Б. Цогтбаяртай хийсэн сонирхолтой ярилцлагыг хүргэж байна.  

- Монгол улсын үндэсний томоохон бүтээн байгуулалт бол яах аргагүй Их Майдар төсөл. Төслийн ажил ямар шатанд явж байна вэ?
           
    Төслийн эхний үе шатанд хэрэгжүүлж буй Анхдугаар Богд Өндөр Гэгээн Занабазарын бүтээсэн Майдар бурханыг Монгол түмний эв нэгдэл, амар амгалан, сэргэн мандалт, хөгжил дэвшлийн бэлгэ тэмдэг болгон хойч үедээ зориулан 54 метр өндрөөр олон нийтийн оролцоотой, ашгийн бус зорилгоор бүтээж байна.

Өнөөдрийн байдлаар бурханы доод суурь болон суварган байгууламжийн 1/3 хэсгийн ган төмөр хийцийн угсралтын ажил дуусаж Их Майдар бурханыг угсрахад бэлэн болсноор барилга угсралтын ажлын явц 35%-тай байна.
2013-2014 онд 2 метрийн зузаантай төмөр бетон үндсэн нил суурь болон бурханы доод суурь баганын ажилд нийт 6000 метр куб гаруй М500 маркын сайжруулсан бетон зуурмагийг цутгаад байна.
Мөн суварган байгууламжийн 1/3 хэсэгт Q345C маркын 700 гаруй тонн ган төмөр хийцийн угсралтыг гадаадын зөвлөх инженерүүдийн хяналт дор Монголын 100 гаруй барилгын инженер техникийн ажилчид амжилттай гүйцэтгээд байна.


 
- Их Майдар төслийн бүтээн байгуулалт өрнүүлж байгаа  мэдээлэл байдаг ч  утга санаа болон нэрний талаар иргэд төдийлөн ойлголт дутмаг байдаг. Энэ талаар

          Их Майдар төсөл бол өнөө цагт Монголд хэрэгжиж байгаа олон нийтийн оролцоотой ашгийн бус хамгийн том бүтээн байгуулалт гэж ойлгож болно. Энэ нь дан ганц бурхан бүтээгдэх бус бидний өв уламлал, соёлын өвийг хадгалах цаашилбал монгол ёс, гүн ухааны уламжлалыг хадгалсан танин мэдэхүй, соёл, амралтын бүрэн хэмжээний цогцолбор болж хөгжих төсөл юм.

Төслийг санаачлагч УИХ-ын гишүүн Х.Баттулга, УГЗ зураач, дизайнер Д.Эрдэмбилэг нар тухайн үед буюу 2005 онд Монгол улсын болон ирээдүй, залуу үе маань түүх, улс, үндэстнээрээ бахархах бахархалтай, соёл, боловсрол, оюун санааны хувьд дархлаатай байх нь монгол үндэстний цаашдын оршин тогтнох гол үндэс нь байх юм гэсэн үндсэн санаанд тулгуурлан хэд хэдэн төсөл санаачласан .
Өөрөөр хэлбэл бид эх түүх, үндэс гарлаараа бахархах бахархалаа эзэн Чингис хааны хөшөөгөө 40 метр өндрөөр Цонжин болдог хэмээх газар бүтээсэн. Гадны хэвлэл мэдээллийн хэрэгсэл, сурталчилгааны материал, интернетийн орчинд Монголын талаарх мэдээллийг хамгийн түрүүнд Чингисийн хөшөөтэй хамт илэрхийлсэн байдаг нь яах аргагүй Монголыг дэлхийд таниулсан залуу хойч үе минь хаана ч бахархах бахархалтай болж чадсан. Харин 2010 оноос бид бүхэн Анхдугаар Богд Занабазар Өндөр Гэгээний тэртээ 17 зууны эхэнд өөрийн гараар урлаж хойч үедээ соёлын үнэт өв болгон үлдээсэн Майдар бурханы босоо дүрийг 54 метр өндрөөр буюу дэлхийд томд тооцогдох хэмжээгээр бүтээх, мөн тойрон бүрэн хэмжээний соёл амралт, танин мэдэхүйн цогцолборыг бүтээн байгуулах ажлыг эхлүүлсэн.

Их Майдар төсөл нь ашгийн бус зорилгоор хэрэгжиж байгаа өөрөр хэлбэл Их Майдар сан буюу ашгийн бус, төрийн бус байгууллага төслийг хэрэгжүүлж олон нийтийн оролцоо, хандиваар төслийн эхний үе шатыг бүтээн байгуулах юм. Эхний үе шат амжилттай хэрэгжсэнээр цогцолборт төлөвлөж буй тодорхой үйл ажиллагаатай хэсгүүдэд гадаад, дотоодын хөрөнгө оруулагч нарыг татан оролцуулж бүтээн байгуулна.

Эдийн засгийн талаасаа төсөл амжилттай хэрэгжсэнээр 1 сая хүртэлх жуулчныг хүлээн авах нөөц бололцоог бүрдүүлнэ. Түүнийг дагаад маш олон ажлын байр дагалдах бизнес, ханган нийлүүлэлт зэрэг хөгжлийн тодорхой боломжийг бий болгоно гэж үзэж байгаа. Хамгийн гол нь энэ цогцолбор өөрөө байгаль орчинд ээлтэй, архи тамхигүй зөв орчныг бүрдүүлэхээр төлөвлөж байгаа.

Цогцолборын цаашдын үйл ажиллагааг Их Майдар сан үргэлжлүүлэн хариуцах бөгөөд цогцолбороос олсон орлогоос ашиглалтын зардлын дараах цэвэр ашгийг нийгмийн сайн сайхны төлөөх хүмүүнлэг энэрэнгүй үйлс буюу соёл, боловсрол, эрүүл мэнд, байгаль орчинг нөхөн сэргээх үйлсэд зарцуулах юм.
Оюун санааны хувьд Их Майдар бурханыг бүтээснээр Монголын ард түмний ирээдүйн амар амгалан, эв нэгдлийн утгыг бэлгэдэхээс гадна Майдар бурханы асрах сэтгэл, байгаль дэлхийгээ хайрлах зөв амьдралын хэвшил, дадлыг хүүхэд залуучуудад энгийн байдлаар таниулахад оршиж байгаа юм.

- Төслийн ажил эхлээд багагүй хугацаа өнгөрлөө хандив болон санхүүжилт ямар түвшинд явж байна?

Төслийн эхний үе шатны бүтээн байгуулалтад  32 сая ам.долларын хөрөнгө оруулалт шаардла­гатайгаас арав гаруй хувийг нь буюу 10 орчим сая ам долларыг олон нийт, үндэсний хэмжээний байгууллага хамт олны оролцоог хуримтлуулан бүтээн байгуулалтын ажилд зарцуулаад байна.
Ард түмний хандиваар бүтэж байгаа энэ ажлын үйл  явц бүр нь эв нэгдлийг харуулж байгаагаараа  онцлогтой. Мөн бурханы бие лагшин, суварга, судар номыг бүтээхэд олон түмнийг оролцуулж тэдний буян авшигийг шингээснээр улам илүү их адис жанливтай болж Майдар бурханы сүр хүч, асрах сэтгэл бидний ирээдүйн буян заяаг даах юм.
Төслийн хэрэгжилт нь олон нийтийн оролцооноос 100% шалтгаална. Оролцоо гэдэг нь хэн бүхэн өөрийн боломжит сэтгэлийн хандивыг өргөж болохоос гадна төсөлд бодитоор оролцож гэр бүл, үр хүүхдээ даатган оролцох боломжтой. Бидний тооцоогоор 100 мянган өрх гэр бүл бодитоор хувь нэмрээ оруулж оролцсоноор төсөл маш хурдан бүтэх боломжтой.
Өнөөдрийн байдлаар 50 мянга гаруй хүмүүс их бага хэмжээгээр өөрийн хандиваа өргөж оролцож байгаагаас гадна 15000 гаруй өрх гэр бүл төсөлд урьдчилан бүртгүүлж, 3000 гаруй хандивлагч нар өрх гэр бүлийн гэртээ залах бурханаа гардан аваад байна.

Гадаадад ажиллаж, амьдарч байгаа  Монголчууд маань тухайлбал АНУ-ын  Бэй Аэриа буюу баруун эрэг, Чикаго орчимд оршин сууж байгаа иргэд, ОХУ-ын буриад үндэстнүүд  Үндэсний бүтээн байгуулалтанд маш их сэтгэл гарган идэвхитэй оролцож, өөрийн хувь нэмрээ өргөж байгааг дуулгахад таатай байна.

- Нийт 108 га газарт баригдаж байгаа  төслийн хүрээнд  аялал жуулчлалийг татсан ямар үйлчилгээний төвүүд бий болох вэ?
Одоогийн байдлаар 108 га газар дээр соёмбо хэлбэртэй цогцолборын ерөнхий төлөвлөгөөг урьдчилсан байдлаар боловсруулаад байгаа ч цаашид илүү нарийвчлан судлан, эдийн засгийн тооцоотой,  ашигт  ажиллагааг сайжруулах тал дээр анхаарч ерөнхий төлөвлөгөөний мэргэжлийн байгууллагатай хамтран ажиллахаар төлөвлөж байгаа.
Урьдчилсан төлөвлөлтөөр цогцолборын эргэн тойронд амралт зугаалгын цэцэрлэг хүрээлэн, ногоон байгууламж, жижиг амьтны хүрээлэн, задгай театр, усан парк зэрэг олон нийтийн хэсэг, бясалгалын төв,  амирлахуйн орчин, боловсрол танин мэдэхүйн музей, одон орны төв,  номын сан,  урлахуйн сургууль зэрэг боловсролын хэсэг, Богдын өргөө, хутагт хувилгаадын өргөө, олон улс орны өвөрмөц онцлог  уламжлалыг хадгалсан сүм хийд бүхий сүсэглэх, бишрэх хэсгийг төлөвлөснөөс гадна зочид буудал,  гэр амралт  хүний хэрэгцээг хангах орчин үеийн олон улсын стандартад нийцсэн худалдаа, хоолны үйлчилгээ, амралт чөлөөт цагаа өнгөөрөөх бүхий л бололцоог бүрдүүлсэн
 


- Монгол улсад хүн ардын сайн сайхны төлөө ийм төрлийн бүтээн байгуулалт өрнөж байгаад баяртай байна. Майдар Бурханы талаар мэдээлэл өгөөч
 
Майдар бурхан бол энэ цагийн бурхан Будда Шагжамүнигийн дараа Замбуу тивд залран өөрийн сургаал номлолоо дэлгэрүүлэх Сайн цагийн 1000 бурханы тав дахь буюу ирээдүй цагийн бурхан юм. Майдар гэдэг нэрийн үндэс нь Майтри гэсэн үг юм. Энэ нь асрал хайр, найз нөхөр, нэгдмэл ухаан гэсэн утгатай. Майдар бурханыг тахин шүтсэнээр гэр бүлд эв нэгдэл, бие биенээ хайрлах, асран энэрэх сэтгэлийг бий болгож ирээдүйн буян заяаг даатгахын ерөөлтэй. 



- Барилгын ажилд гадны ямар компаниуд хамтарч ажиллаж байна.

Төслийн барилга угсралтын чанар болон урт удаан настай байх тал дээр илүү анхаарч байгаа. Тиймээс гадны зөвлөх болон барилгын инженерийн компаниудтай хамтран ажиллаж байна.  Барилга бүтээцийн иж бүрэн зураг төслийг Английн “Тони Жий энд Партнерс” компани болон холбоо дохиолол, агааржуулалт, цахилгаан дулааны зургийг Хонг Конгийн “Си Эс Си” инженерийн компани боловсруулж барилга угсралтын ажилд хяналт тавин ажиллах юм.

- Бүтээн байгуулалтын ажилд хүндрэлтэй тал гарч байна уу?

Мэдээж томоохон бүтээн байгуулалтыг хэрэгжүүлэхэд мөнгө санхүү бол хамгийн том асуудал байдаг. Мөн боловсон хүчин,  мэргэжлийн ур чадвар,  туршлагатай хүмүүс хангалттай бус байгаа нь асуудалтай байдаг. Тухайлбал тэр том хэмжээний бурханыг угсрах,  гуулин хийцийг гагнах зэрэг ажил бол маш туршлагатай  мэргэжлийн баг гүйцэтгэх ажил.  Бурханы бие лагшинг бүтээж байгаа материал нь өөрөө 1000 жилийн настай байгалийн нөхцөлийг давах чадвартай металл тул түүнийг маш чанартай угсарснаар урт удаан хадгалагдан үр хойчид өвлөгдөх юм.

Та бүхэн Монгол улсын аялал жуулчлалын салбарт томоохон хөрөнгө оруулалт хийж  байна.  Хандивийн талаар ерөнхий мэдээлэл өгөөч. Жишээ нь хандив өргөсөн өглөгийн эздэд зориулж ямар ажил хийгдэх вэ?

Ирээдүй хойч үедээ үлдээх ҮББ-нд хэн бүхэн өөрийн боломжит сэтгэлийн өргөлийг хандивлаж 54 метр Их Майдар бурханы бие лагшинд өргөх сүншиг, аравнайд ам бүл, үр хүүхдийнхээ нэрсийг даатган оруулах боломжтой. Мөн 50,000₮ -с дээш мөнгөн хандивыг өргөж өөрийн болон, үр хүүхдийнхээ нэрийг суварган байгууламжийн гол хананд мөнхжүүлэх боломжтой.  Өрх гэр бүлээрээ оролцож бас болно.  Нийт 108,000 өрх гэр бүлийн 500,000 төгрөгний хандиваар энэхүү бүтээн байгуулалт босох юм. Энэхүү хандивыг хэсэгчлэн өргөх боломжтой бөгөөд Их майдар төсөлд оролцсон гэр бүлүүддээ 27 см-ийн өндөртэй хос Майдар бурхан бүтээн  нэг бурханыг гэрт тань нөгөө бурханыг Суварган байгууламжинд үеийн үед залах болно.
Мөн байгууллага хамт олноороо үйл хэргээрээ болон мөнгөн хандив өргөж оролцож Суварган байгууламжны хүндэтгэлийн хананд байгууллагынхаа нэрийг мөнхжүүлэх боломжтой.


 
Төсөлтэй хэрхэн холбогдох боломжтой бэ?
 
Мэдээллийн 2 төв ажиллаж байна:             1. МБШТ Гандантэгчэнлин хийд
                                                                            2. Баянмонгол хороолол 414-р байранд
Төсөлд оролцохыг хүсвэл 152233 дугаарт овог нэрээ мессежээр илгээж урьдчилан бүртгүүлэх боломжтой.
Лавлах ута: 77112233, 93112244
Интернет: www.ikhmaidar.mn
marketing@ikhmaidar.mn
www.facebook.com/ikhmaidar зэргээр шууд холбогдож болно.     

Холбоотой мэдээ