Эрчим хүчний зохицуулалтын чиглэлээр дэлхийд тэргүүлэгч Шнайдер Электрик компани Монгол улсад үйл ажиллагаагаа эхлүүлсний нэг жилийн ойн баяраа саяхан тэмдэглэн өнгөрүүлсэн байна. Баярын үеэр “Шнайдер Электрик Монгол” компанийн Ерөнхийлөгч ноѐн Филип Обри хэлэхдээ “Бид цаашид урам зоригтойгоор үйл ажиллагаа явуулах итгэл төрүүлсэн 1 жилийг үдлээ. Бидний үйл ажиллагаа Монгол улсын эдийн засгийн хамт өргөжин тэлж, манай бүтээгдэхүүн тус улсад эрчим хүчний хэмнэлт, үр ашигт хэрэглээг авч ирнэ гэдэгт эргэлзэхгүй байна” хэмээгээд “Ийм ч учраас бид эрчим хүч, мэдээлэл технологийн салбарт улсдаа тэргүүлэгч 10 гаруй компанитай хамтран ажиллаж байна” – хэмээн онцлон тэмдэглэсэн юм.
“Шнайдер Электрик” компани жил гаруйн хугацаанд ажиллахдаа 2014 оны 5 – р сард Монгол улсад анх удаа Дата төвийн конференц, өнгөрсөн 9 – р сард “Эрчим хүчний салбар дахь хамтын ажиллагаа” сэдэвт Франц – Монголын Эдийн Засгийн 2 – р чуулган зэрэг олон үйл ажиллагааг зохион байгуулсан юм. Мөн энэ хооронд Систем Интегратор түншлэгч компаниудад зориулсан сургалт, Нам хүчдэлийн дэвшилтэт цахилгаан төхөөрөмжийн танилцуулга зэрэг олон сургалт семинарыг зохион байгуулсан байна.
Тус компани нь эрчим хүч болон мэдээлэл технологийн салбарын шилдэг компаниудтай хамтран ажиллаад зогсохгүй ирээдүйн инженер, эрчим хүчний салбарын мэргэжилтнүүдийн бүтээлч, оюунлаг санааг дэмжин ажилладаг. Тухайлбал: Монголын үндэсний телевиз (MNB) –тэй хамтран “Залуу зохион бүтээгч” хөтөлбөрийг дэмжиж, тус хөтөлбөрт Монгол улсын 200 орчим оюунлаг залуус оролцож өөрийн хөдөлмөр хөнгөвчлөх шинэлэг бүтээлээ танилцуулсан юм.
Ойн баярын үеэр “Шнайдер Электрик” “Go Green in the City” буюу “Ногоон хотыг бүтээцгээе” сэдэвт олон улсын оюутны тэмцээнийг зарласан. Тус тэмцээн нь оюутнуудыг ирээдүйн ногоон хотыг бүтээх шинэлэг санаа гаргахад уриалах юм. Улс бүрээс шалгарсан шилдэг санаа бүс нүтгийн хэмжээнд өрсөлдөж, дараа нь сүүлийн шатанд дэлхийн хэмжээнд өрсөлдөх юм. Тэмцээний ялагч Дэлхийг тойрон аялангаа “Шнайдер Электрик” компанийн оффисоор зочлох эрх мөн тус компанид ажиллах саналаар ч шагнуулах боломжтой юм.
“Шнайдер Электрик”-ийн тухай товчхон танилцуулахад
Дэлхийн зуу гаруй оронд үйл ажиллагаа явуулдаг, эрчим хүч зохицуулалтын чиглэлээр дэлхийн хэмжээний мэргэжлийн компани болох “Шнайдер Электрик” нь эрчим хүч, дэд бүтэц, үйлдвэрлэлийн процесс, барилгын автоматжуулалт, Дата төв зэрэг олон салбарыг хамарсан цогц шийдлийг санал болгодог тэргүүлэгч байгууллагуудын нэг байхын зэрэгцээ орон сууц, ахуйн хэрэглээний салбарт мөн адил томоохон байр суурь эзэлдэг юм. Эрчим хүчийг аюулгүй, найдвартай, хэмнэлттэй, үр ашигтай байлгах асуудал дээр төвлөрч ажилладаг 150,000 гаруй ажилтаны хөдөлмөрийн үр дүнд 2013 онд компаний борлуулалт 24 тэрбум гаруй еврод хүрч, хувь хүмүүс, байгууллагуудад эрчим хүчээ хамгийн үр ашигтайгаар зарцуулахад нь туслалцаа үзүүлэх чиглэлээр ажилладаг.