Төрийн албан хаагч хүн ямар байх ёстой вэ?

Төрийн албан хаагч хүн ямар байх ёстой вэ?
      Төрийн албыг чадварлаг, цомхон байхыг дээр дооргүй ярьж, хэлж, бичиж байдаг. Энэ ч үүднээс  Монгол Улсын Ерөнхий сайд Н.Алтанхуяг Засгийн газартаа бүтцийн өөрчлөлт, сэлгээ хийж байгаа нь амьдралаас урган шаардлага гэж ойлгож байна.
       Төрийн алба чадварлаг, цомхон байхын тулд: Төрийн албан хаагчдыг чадварлаг,дадлага туршлагтай, санаачилгатай хүмүүсээр бүрдүүлэх хэрэгтэй. Үүний тулд сонгон шалгаруулалтыг зөв, шударга байдлаар явуулж хэвших нь чухал юм.
Ингэж байж төрийн алба сайн ажиллаж, түүний үр дүнд Монгол Улсын  нийгэм, эдийн засгийн байдал дээшилж хөгжинө.
 Бид цаг хугацаатай уралдаж ажиллах, бүтээн байгуулах, хөгжих, хэрэгтэй.
Түүнээс биш төрийн албыг нам, эвсэл, найз, нөхдийн шугамаар бүрдүүлээд байх юм бол улс орны хөгжил зогсонги биш юмаа гэхэд их л удаан хөгжинө гэсэн үг.
Төрийн албан хаагч аливаа баримт бичгүүдийг чанар муутай боловсруулах,шийдвэр гаргах, асуудал дээр удаан сэтгэх, хурд багатай ажиллах зэрэг нь төрийн ажлыг нэр хүндгүй болгож, хөгжил дэвшилд чөдөр тушаа болно.
        Төрийн албан хаагч нь мэргэжил, гадаад хэлний өндөр  мэдлэгтэй байхаас гадна юуны өмнө нэн чухал чадварууд болох албан бичиг, асуудал боловсруулах, аливаа ажил, асуудалд дүн шинжилгээ хийх, шинэлэг байдлаар хандаж сурах, шинэлэг ажил, үйлчилгээг байнга хэрэгжүүлэх, хурдан сэтгэх зэрэг оюуны чадвар сайтай байх шаардлагатай.
Эдгээр нь төрийн албан хаагч хүнд заавал байх нэн тэргүүний чадварууд мөн.
Мөн оновчтой, өргөн хүрээнд, бусдаас түрүүлж, хол давуу сэтгэдэг байх хэрэгтэй.
Нэг хэв загварт баригдадгүй байхаас гадна, дахин давтан хийгддэг аливаа ажил, үйлчилгээг аль болох өөрчлөн сайжруулж, улам боловсронгуй болгож, шинэлэг байдлаар гүйцэтгэж байхыг эрмэлздэг байх шаардлагатай.
Төрийн албан хаагчид “баг”-аар ажиллах чадварыг сайтар эзэмших, суралцах нь чухал. Багаар ажиллаж сураагүйгээс ажил, үйлчилгээ гүйцэтгэх цаг хугацаа, нөөц боломжуудыг алддаг.
Төрийн албан хаагчид гол төлөв томоохон бодлогын баримт бичиг боловсруулах ажил, үйлчилгээг  “баг”-аар гүйцэтгэж байх  нь их зохимжтой байдаг.
Төрийн албан хаагчид албан бичиг, асуудал боловсруулах ур чадвар дутагдалтай байгаа нь тэдний боловсруулсан бодлогын болон бусад баримт бичигт ажиглагдаад байдаг юм. Энэ нь бас монгол хэлний бичгийн хэлний боловсрол муутайгаас цөөн оновчтой үгээр утга санааг гаргах, найруулан бичих ур чадваргүй байдаг.
Мөн ажлаа дутуу төлөвлөдөг, төлөвлөгөө боловсруулах үйл ажиллагаан дээр алдаа гаргадаг байдал гарсаар л байгаа юм. 
Иймээс төрийн албан хаагчдыг улсын эрх ашиг, шаардлагыг үндэс болгон сонгон авч ажиллуулах, тэгээд нам, бүлэглэлийн явцуу үзэл бодлын хүрээнд албан тушаалын амлалтын биелэл болголгүйгээр төрийн албан хаагчдыг тогтвор суурьшилтай ажиллуулах ёстой юм.
Үүний үр дүнд тухайн яам, агентлагийн үйл ажиллагаа төрийн албан хаагчдынхаа чадварт тулгуурлан сайжирж, шинэ шатанд очиж улмаар төрийн алба нь тогтвортой, чадварлаг, цомхон болж төлөвших нөхцөл бүрдэнэ.
 
Төрийн албаны тэргүүний ажилтан Л.Болд
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 

Холбоотой мэдээ