"Шнайдер Электрик” Монголд ухаалаг дэд станцыг үйлдвэрлэнэ

"Шнайдер Электрик” Монголд ухаалаг дэд станцыг үйлдвэрлэнэ
       “Шнайдер Электрик Монгол” компанийн захирал Филипп Обри нь Франц - Монголын Худалдаа аж үйлдвэрийн танхимаас Улаанбаатар хот 2014 оны 10-р сарын 9-ний өдөр зохион байгуулсан Эрчим хүчний салбар дахь хамтын ажиллагаа сэдэвт Франц-Монголын эдийн засгийн хоёрдугаар чуулга уулзалтын үеэр ухаалаг сүлжээ болон эрчим хүчний үр ашигтай зохицуулалтын талаар танилцуулсан юм. 
Ухаалаг сүлжээг бий болгоход чиглэсэн эхний чухал алхам нь юуны түрүүнд эрчим хүч түгээх системийг уян хатан болгох явдал гэнэ. Уг чуулга уулзалтын үеэр ноён Филипп Обригийн онцлон тэмдэглэж хэлсэнчлэн одоогийн цахилгаан сүлжээ нэгэнт хуучирсан тул үүнийг уян хатан болгох мөн сэргээгдэх болон уламжлалт цахилгаан станц зэрэг олон төрлийн эх үүсвэрээс ирэх  эрчим хүчийг үр ашигтай дамжуулах боломжийг бүрдүүлэх зэрэг нь гол бэрхшээл болж байна. Үүнд хүрэх эхний алхамыг хэрэгжүүлж эхэлсэн нь BIOSCO юм.
      BIOSCO нь Монгол улсад нэвтэрсэн хамгийн анхдагч ухаалаг дэд станц бөгөөд олон улсын IEC 62271-202 стандартад нийцсэн, аюулгүй байдлыг маш өндөр түвшинд хангасан ажээ. Хамгийн чухал нь уг ухаалаг дэд станцыг “Шнайдер Электрик” компанийн Монгол дахь албан ёсны түнш “Эрчим Инженеринг” ХХК-тай хамтран Монголд үйлдвэрлэх юм.          
 
    BIOSCO-г Монгол улсад үйлдвэрлэж бэлтгэх бөгөөд үйлдвэрлэсэн дэд станцыг хэрэглэгчидэд нэг долоо хоногийн дотор хүргэнэ. Уг станц нь ердөө 25 м2 талбай эзлэх бөгөөд хос трансформатор бүхий дэд станц нь зах зээлд худалдаалагдаж байгаа уламжлалт дэд станцуудын эзлэх талбайн 1/3-тай тэнцэх хэмжээтэй байх юм.
 
Филипп Обри захирал хэлсэн үгэндээ: “Эрчим хүчний үр ашигтай хэрэглээ нэн чухал билээ. Аж үйлдвэр, худалдаа, орон сууцны барилгуудад эрчим хүчний зохицуулалтын цогц шийдлийг хэрэгжүүлж байж бид дэлхий нийтийн эрчим хүчний хэрэглээний 30 хүтэлх хувийг хэмнэж чадах юм.  “Шнайдер Электрик” компани үүнд анхаарч ажилладаг”. 
Аж ахуйн барилгын түвшинд эрчим хүчний чанар болон хяналт чухал бөгөөд үр ашигтай хэрэглээг сайжруулах алхам нь эрчим хүчний хэрэглээг ил тод, хэмжиж болохуйц байлгахаас эхэлдэг. Харин дараагийн алхам нь гарсан хариун дээр дүн шинжилгээ хийж анхан шатны алхамуудын авч эхлэх хэрэгтэй. Үүнд  эрчим хүч бага зарцуулдаг,  реактив эрчим хүчний хэрэглээг бууруулах тоног төхөөрөмж (kVAR) суурилуулах явдал юм” хэмээн дурьдсан.
 
   Мөн тэрээр “Монголын Засгийн газар эрчим хүчний хэмнэлтийн үндсийг тавих журам, стандарт, хуулийн зохицуулалтуудыг боловсруулах ажлыг эхлүүлсэн нь нэн сайшаалтай хэрэг юм. Үүнийг дэмжих хуулийн зохицуулалт бий болсоноор аж үйлдвэрийн салбарт эрчим хүчний ихээхэн хэмнэлт гарч, улмаар улс орны хөгжилд эерэгээр нөлөөлөх болно” хэмээн онцлон тэмдэглэсэн байна.
 
    Түүнчлэн Эрчим хүчний дэд сайд Д.Доржпүрэв: “Шнайдер Электрик” компани нь Монголд эрчим хүчний үр ашигтай хэрэглээг бий болгох бүтээгдэхүүн, шийдлийн үүд хаалгыг нээж өглөө" хэмээн онцолж  байлаа.  
“Шнайдер Электрик” компани нь үндэсний түнш байгууллагуудаа Монголын өвөрмөц хэрэгцээг хангах шийдэл боловсруулах чадавхитай болгох эрхэм зорилготой юм. Монгол оронд ухаалаг сүлжээг нэвтрүүлэх бэлтгэлийг хангах шийдлийг аль хэдийн боловсруулжээ. Biosco ухаалаг дэд станц нь ухаалаг сүлжээг нэвтрүүлэх бэлтгэл болсон эхний чухал алхам байлаа. Мөн тус компани нь Монгол орныг эрчим хүчний хэмнэлттэй, тогтвортой, ая тухтай амьдрах орчин бүхий болгох эрчим хүчний хэмнэлтийн шийдэлтэй бүтээгдэхүүн, технологийг нэвтрүүлэхээр хамтын ажиллагааны 10 гэрээнд гарын үсэг зураад байна.
 

Холбоотой мэдээ