Барилгын шилдэг 10 компани тодорлоо

Барилгын шилдэг 10 компани тодорлоо
Монгол Улсад барилгын салбар үүсч хөгжсөний 88 жилийн ой, Монголын барилгачдын өдрийн баярын арга хэмжээ өнөөдөр Буянт-Ухаа спорт цогцолборт эхэллээ. Баярын арга хэмжээнд БХБ-ын сайд Ц.Баярсайхан, дэд сайд Г.Байгалмаа, БХТ-ийн дарга Б.Баярсайхан, ТОСК-ийн дарга Д.Гантулга болон бусад албаны хүмүүс оролцов. Жил бүрийн  Барилгачдын баярын энэ өдрөөр барилгын салбарын шилдэг аж ахуйн нэгжүүдийг шалгаруулдаг уламжлалтай. Энэ жил барилга угсралтын чиглэлээр: “Одкон холдинг”, “Суруга Монгол”, “Баганат өргөө”, “Хийт констракшн”, “Грийн ресурс констракшн”, зураг төслийн чиглэлээр: “Эн эй Пи, Бьюлдинг техноложи”, барилгын материал үйлдвэрлэлийн чиглэлээр “Юнико”,  “Премиум конкрит”, “Тэмүүлэн-Од” компани шалгарч,  өргөмжлөл,  туг мандуулах эрхийн гэрчилгээ хүртэв.  Эдгээр шилдэг 10 компанийн тугийг бүтэн жилийн турш Барилгачдын талбайн хүндэтгэлийн тавцанд залж, алдаршуулдаг юм.


Монгол Улсад барилгын салбар үүсч хөгжсөний 88 жилийн ой, Монголын барилгачдын өдрийн баярын арга хэмжээг нээж, Барилга, хот байгуулалтын сайд Ц.Баярсайхан  хэлсэн үгэндээ “Монгол Улсын эдийн засаг, бүтээн байгуулалтанд барилгын салбарынханы оруулж буй хувь нэмэр өндөр.  Өнгөрсөн 2013 онд барилгын салбарын өсөлт 70 гаруй хувьтай байсан. Энэ оны 2-р улирлын байдлаар 26,8 хувийн өсөлттэй явж байна. Ер нь сүүлийн жилүүдэд барилгын салбарт оруулах хөрөнгө оруулалтын хэмжээ жилээс жилд нэмэгдэж байна. Иргэдэд 8 хувийн хүүтэй ипотекийн зээл олгох, дуусаагүй барилгад хөнгөлөлттэй зээлээр дэмжлэг үзүүлэх, барилгын материалын үйлдвэрүүдэд мөн л хөнгөлөлттэй зээлийн дэмжлэг үзүүлсэн зэрэг нь үр дүнгээ өгч байна.  Бид энэ жил эхний 1 сая тонн-ы хүчин чадал бүхий цементийн үйлдвэрээ ашиглалтанд оруулсан. Ирэх жил гэхэд дотооддоо 3 сая тонн цемент үйлдвэрлэх хүчин чадалтай 3 ч үйлдвэртэй болно.  Барилгын гол нэр төрлийн бүтээгдэхүүн болох  арматурын дотоодын хэрэгцээгээ 2016 оны сүүлч гэхэд хангадаг болно.  2012 оноос өмнө жилд 9 мянга орчим айлын орон сууц ашиглалтанд орж байсан бол сүүлийн 2 жилд Улаанбаатар хотод 20 мянга, орон нутагт анх удаа 5000 гаруй айлын орон сууц ашиглалтанд орсон явдал нь барилгын салбар ямархуу түвшинд явааг харуулж байна” хэмээн онцолж байлаа.

Холбоотой мэдээ