Монгол улсад барилгын салбар үүсч хөгжсөний ойн баяр жил бүрийн 9-р сарын эхний 7 хоногт тэмдэглэн өнгөрүүлдэг уламжлалтай. Энэ ойн баярыг тохиолдуулан барилгын салбарын шилдэгүүдийг тодруулахаар БХБЯ, Барилгын хөгжлийн төв, салбарын төрийн бус байгууллагуудын  хамтарсан  ажлын хэсэг  ажиллаж байна. Барилгачдын баяраар 2013-2014 онд ажил үйлсээрээ салбартаа тэргүүлсэн арван аж ахуйн нэгжийг шалгаруулж, туг далбааг нь барилгачдын талбайд бүтэн жилийн турш өргөн мандуулж, алдаршуулан урамшуулах ажил  уламжлал болсон.
Энэ жилийн шалгаруулалтыг 8-р сарын 28-ны дотор БХБ-ын сайдын тушаалаар байгуулсан ажлын хэсэг хуралдаж,  шийдвэрлэх бөгөөд салбарын шилдэг байгууллагад нэрээ дэвшүүлэх аж ахуйн нэгжүүдийн материалыг энэ өдрийг хүртлэх хугацаанд Барилгын хөгжлийн төв болон Монголын барилгачдын холбоо, Барилгын зураг төсөл зохиогчдын холбооны  ажлын албанд хүлээн авч байгаа аж. 
Сонгон шалгаруулалтад ирүүлэх материал:
а. Байгууллагын танилцуулга
б. 2013-2014 оны хугацаанд гүйцэтгэсэн бүтээн байгуулалтын мэдээ
в. Байгууллагын нийгмийн хариуцлагын талаар хүлээсэн үүргийн биелэлт
г. ХАБЭА-н талаар хийсэн ажлууд
Дэлгэрэнгүй мэдээллийг Барилгын хөгжлийн төвийн Барилга, барилгын материалын хэлтэс, Монголын барилгачдын холбоо, Барилгын зураг төсөл зохиогчдын холбооноос аваарай.