Нийслэл хотын орон сууц болон зарим гэр хороололын сууцны орох гарах хэсгийг хаасан хашаа хашлага, хаалтууд нь түргэн тусламж болоод цагдаагийн албан хаагчид, онцгой байдлын албаныхан үйлчилгээ үзүүлэхэд хүндрэлтэй байдаг. Энэ байдлыг арилгах үүднээс Нийслэлийн засаг дарга Улаанбаатар хотын захирагч Э.Бат-Үүл  “Үзлэг шалгалт зохион байгуулах тухай” А/715 дугаар захирамж гаргалаа.
 Нийслэлийн Удирдлагын зөвлөлийн 2014 оны 07 дугаар сарын 17-ны өдрийн хуралдааны шийдвэрийн дагуу Улаанбаатар хотын Орон сууцны хороолол болон зарим гэр хорооллын орох, гарах гарцыг хааж шуурхай албаны автомашин зорчих боломжийг хязгаарласан хаалт, хашаа, хайсыг чөлөөлөх үйл ажиллагааг хэрэгжүүлэх, хамтарсан үзлэг шалгалтыг зохион байгуулахыг Улаанбаатар хотын Захирагчийн ажлын алба, нийслэлийн Онцгой байдлын газар, нийслэлийн Мэргэжлийн хяналтын газар, нийслэлийн Авто замын газар, нийслэлийн Ерөнхий төлөвлөгөөний газар, нийслэлийн Замын цагдаагийн газар , нийслэлийн Өмчийн харилцааны газар, Нийтийн үйлчилгээний Улаанбаатар нэгтгэл ОНӨААТҮГ-т даалгалаа.
  Хамтарсан үзлэг шалгалтыг 2014 оны 08 дугаар сарын 20-ны өдрөөс      09 дүгээр сарын 15-ны өдрийг хүртэл зохион байгуулна.

Уг ажлын гол зорилго нь шуурхай албаны автомашин зорчих боломжийг хязгаарласан хаалт, хашаа, хайсыг чөлөөлөх үйл ажиллагааг хэрэгжүүлж, чөлөөлөх, саадгүй нэвтрүүлэх, оршин суугч, иргэдийн аюулгүй байдлыг хангуулах аж.
Улаанбаатар хотын Захирагчийн ажлын албаны дарга үзлэг шалгалтын дүнг удирдлагын зөвлөлийн хуралд 2014 оны 09 дүгээр сарын 18-ны өдрийн дотор танилцуулж, цаашид авах арга хэмжээний саналыг танилцуулгад тусгана гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.