Ц.Шижир: Иргэн бүр газраа өмчлөх боломжтой

Ц.Шижир: Иргэн бүр газраа өмчлөх боломжтой
Нийслэлд цахим хэлбэрээр газар өмчлөх ажлын эхний хэсэг хэдхэн хоногийн өмнө дууссан. Сонгогдсон хэсэг нь газраа хэрхэн өөрийн болгохоо мэдэхгүй асууж сураглаж, харин сонгогдоогүй хэсэг нь урам муутай байх шиг. Иймд нийт уншигчдадаа дэлгэрэнгүй мэдээлэл өгөх зорилгоор нийслэлийн Өмчийн харилцааны газрын Газар өмчлөл, өмчийн менежментийн хэлтсийн ахлах мэргэжилтэн Ц.Шижиртэй ярилцлаа.
-Цахим хэлбэрээр газар өмчлөх ажлын эхний хэсэг явагдаж дууслаа.  Сонгогдсон иргэд газраа хэрхэн өөрийн болгох талаар хэлж өгөхгүй юу? Учраа олохгүй байгаа хүмүүс бас байх шиг байна.
-Нийслэлд газар өмчлүүлэх 52 байршил байгаа. Нэр ус, байршил зэрэг нь тодорхой болоод иргэдэд хэвлэл мэдээллийн хэрэгслээр тараасан. Мөн манай байгууллагын цахим хаягаар орж танилцаж болно. Ер нь газар өмчлөлийг иргэд маш их хүлээлж байсан нь саяын өмчлөлөөс  харагдсан. Эхний 5 байршилд гэхэд 200 гаруй мянган хүн бүртгүүллээ шүү дээ. Төр засгаас явуулж буй бодлого газраа өмчилж авч чадаагүй иргэддээ газар олгох зорилготой болохоор ер бүх хүн хамрагдана гэж ойлгох хэрэгтэй. Тийм болохоор сая сонгогдоогүй иргэд дараагийн байршилд сонгогдох нь дамжиггүй. Харин нэгэнт сонгогдсон иргэд ажлын 10 хоногт багтаан өргөдлөө гаргах хэрэгтэй бөгөөд иргэдэд аль болох чирэгдэлгүй байх үүднээс өргөдөл хүлээн авах тусгай программ ажиллуулж байгаа. Сонгогдсон хүмүүс иргэний үнэмлэхний нотариатаар батлуулсан хуулбартайгаа ирээд гарын үсгээ зурахад л хангалттай юм.
-Иргэдийн өмчилж авсан газарт хувийн өмчийн компаниудаар газрын тэмдэглэгээг хийлгэнэ гээд байгаа. Төлбөрийн хувьд хэр байх бол?
-Тэмдэглэгээ хийх ажлыг төсвийн хөрөнгөөр хийхгүй. Энэ ажлыг хийх чадвартай компаниудыг сонгон шалгаруулах бөгөөд маргааш сонгон шалгаруулалт болно. Үнэ хөлсийн хувьд Барилга хот байгуулалтын сайдын баталсан энэ төрлийн ажлыг хийх жишиг үнэ байдаг. Энэ үнээр л  байна.
-Дараагийн байршил хаана вэ? Бас хэзээ бүртгэх бол?
-Эхний ээлжийн хүмүүс газраа өмчлөх ажил юуны өмнө цэгцрэх шаардлагатай. Одоо сонгогдоод байгаа 15 мянган хүмүүс дотор буруу зөрүү бөглөсөн хүмүүс байгаа юм. Үүнийг манайхаас Иргэний бүртгэлийн газартай хамтран шалгаж байна. Магадгүй шаардлага хангаагүй иргэд байвал тухайн газарт хүсэлт гаргасан хүмүүсийн дунд дахин сугалаа явуулна. Энэ бүгд цэгцрээд ирвэл дараагийн бүртгэл явагдана. Ер нь газар өмчлүүлэх ажлыг 2014-2016 онд явуулахаар төлөвлөсөн байгаа.

Холбоотой мэдээ