“Барилга-Орон сууц-2014” үзэсгэлэн таныг хүлээж байна

“Барилга-Орон сууц-2014” үзэсгэлэн таныг хүлээж байна
     Монгол улсад барилгын салбар үүсч хөгжсөний 88 жилийн ойн баярын арга хэмжээний үеэр зохион байгуулагдах томоохон үйл ажиллагааны нэг болох “Барилга-Орон сууц” үзэсгэлэн яармаг  уламжлал ёсоор 9-р сарын 5-7-ны өдрүүдэд “Мишээл” экспо төвд зохиогдохоор бэлтгэл ажлаа хангаад байна.
    Гадаад, дотоодын барилгын материал үйлдвэрлэгчид, ханган нийлүүлэгчид, барилга угсралтын гүйцэтгэгчид, хөрөнгө оруулагч, үл хөдлөх хөрөнгийн зуучлагчид зэрэг олон салбар хүрээний аж ахуйн нэгжүүд оролцож өөрийн бүтээгдэхүүн, үйлчилгээгээ олон нийтэд сурталчилан таниулах, бизнесийн хамтын ажиллагаагаа өргөжүүлэх боломжоор “Барилга-Орон сууц” үзэсгэлэн  хангах юм. Мөн энэхүү  үзэсгэлэн яармагт бага дунд орлоготой иргэдэд зориулсан хямд үнэтэй орон сууцнуудаас гадна нийслэл хотод шинээр баригдаж буй тансаг зэрэглэлийн орон сууц, хаусуудыг танилцуулах бөгөөд дотоодын барилгын салбарт нэвтэрч байгаа  дэвшилтэт техник технологи, шинэ нэр төрлийн барилгын материал, тоног төхөөрөмжүүдийг дэлгэн үзүүлнэ.
       Улс орны эдийн засаг хүндэрч, бүх л зүйлийн үнэ ханш өсч байгаа энэ үед орон сууцны үнэ харьцангуй тогтвортой байгаа нь хэрэглэгч, худалдан авагч нарт таатай боломж бөгөөд хямралын энэ үед барилгын салбарынханы борлуулалтыг нэмэгдүүлэх, урам дэм өгөхөд  “Барилга-Орон сууц” үзэсгэлэнгийн бас нэгэн зорилго оршино.
      Иймд иргэд, аж ахуй нэгжүүд намрын үзэсгэлэндээ идэвхтэй оролцсоноор  нийслэл хотод шинээр баригдаж буй барилга орон сууцны компаниудтай нэгэн дор биечлэн танилцаж, бодит өргөн мэдээлэл авч, өөрийн цагийг хэмнэн  хэрэгцээ, хүсэл сонирхолдоо нийцсэн орон сууцаа сонгож авч чадна гэдэгт итгэлтэй байна.                    

Холбоотой мэдээ