Улсынхаа нэрээр овоглосон хорооллууд

Улсынхаа нэрээр овоглосон хорооллууд

Барилга.МН энэ удаагийнхаа хотхоны гадна тохижилтын талаарх сурвалжлагаа “Их Үйлсийн Эрэлд” ХХК-ний барьж гүйцэтгэсэн “Их Монгол хороолол”, “Баян Монгол хороолол” гэсэн хоёр хорооллын талаар бэлтгэснээ хүргэж байна. Тус хоёр хорооллын гадна тохижилтын адил төстэй болон ялгаатай талуудыг уг сурвалжлагаар дэлгэн хүргэхээр зорилоо.
 
Тус хоёр хорооллын гадна фасад өнгө хийцийн хувьд адилхан, үндэсний хэв шинжийг аль аль хороолол нь цэцэрлэгт хүрээлэндээ шингээж өгчээ. Харин байршил, гадна тохижилтын хувьд бол ялгаатай.  
Их Монгол хорооллын хувьд гадна цэцэрлэг зүлэгжүүлэлт бага хэдий ч сайн арчилдаг болох нь харагдсан. Зүлэг ногоог арчилж байгаа цэцэрлэгч хүмүүс ч ажлаа хийж байхтай тааралдсан юм. Үндэсний хэв маягийг гадна тохижилтондоо тусгах үүднээс эрийн гурван наадмыг илэрхийлсэн барилдаж буй хоёр бөх, сур харваж буй харваач, хурдан морин унан давхиж яваа хүүхдийн хөшөөг усан оргилуураа тойруулан байршуулжээ. Хүүхэд хөгшид тэр цэцэрлэгт хүрээлэнгийн суудлуудыг хэдийнэ эзлэн суусан байв. Хорооллын дунд орших уг усан оргилуурыг тойроод модон сандлууд байрлуулж зах хэсгээр нь зүлэг бут, нохойн хошуу, монос модыг тарьжээ.  
Автомашин гаднаа байрлуулах хангалттай зайтай хэдий ч хүүхдийн тоглоомын талбай нь чамлахаар хэмжээтэй санагдсан. Байрны болгоны өмнөх авто зогсоолд дүүрэн машин зогсжээ.            
              

  Орон сууцны дундах цэцэрлэгт хүрээлэн авто зогсоол



               Их Монгол хорооллын хойд талын байрны хүүхдийн тоглоомын талбай
 

                                 Ногоон байгууламжийн арчилгааг сайн хийдэг юм билээ
 

Нэг орон сууцны гадна талд байх ногоон байгууламжийн хэмжээ тун бага. Харин машин тавих ил зогсоолыг хангалттай сайн гаргаж өгчээ. Хорооллынхоо оршин суугч багачуудыг хүмүүжүүлэх цэцэрлэгийг байгуулсан нь боломжийн санагдав.  
Тус хорооллын зүүн захын байрны нэг давхруудад супермаркет, үсчин гоо сайхан зэрэг үйлчилгээний төвүүд байрладаг аж. Хэдийгээр ногоон байгууламж, хүүхдийн тоглоомын талбай чамлахаар бага хэмжээтэй ч ерөнхий гадаад байдал нь тун цэвэрхэн байгаа нь таатай сэтгэгдэл төрүүлсэн.
 
 Их Монгол хорооллоос баруун тийш нь нэг буудлын газар яваад Баян Монгол хороолол оршдог.   Тус хорооллын үүдээр ороход Монгол гэрийн ханыг хагас дугуй хэлбэрээр оруулж, дээд доод хэсэгт алхан хээгээр чимж, голд нь тулга байршуулжээ.   
 

 

    Баян Монгол хорооллын үүдэн хэсэг үндэсний хэв шинжийг тусгаж өгчээ

Тус хорооллын үүдээр ороод цааш явахад орон сууцны дунд байх цэцэрлэгт хүрээлэнгийн урд хэсэгт усан оргилуурыг байрлуулжээ. Усан оргилуур нь голдоо мөнгөн аягатай, түүнийг тойроод шагайн наадгайн дөрвөн бэрхийг суурьлуулсан байв. Ингэснээр цэцэрлэгт хүрээлэндээ үндэсний хэв маягийг шингээж өгсөн ажээ.
 

     

    Хорооллын дунд байх цэцэрлэг хүрээлэнд байрлах усан оргилуур     

                        
 

  Орон сууцны дундах ногоон байгууламж


 

  Хорооллын хойд талд байрлах авто угаалгын газар


 

  Үүдэн хэсгийн орон сууцны нэгдүгээр давхарын үйлчилгээний төвүүд
 

Орон сууцнуудын дундах цэцэрлэгт хүрээлэнгээс чигээрээ хойш явахад авто угаалгын газрыг хороолол дотроо шийдэж өгсөн нь их зүгээр санагдсан.  
Харин хороололд оршин суугч бяцхан хүүдүүдэд зориулсан (“Баян Монголын багачууд” цэцэрлэг) хамгийн хойд талын байранд бий. Гадна талдаа тоглоомын талбай зэргийг шийдэж өгчээ. Их Монгол хорооллын гадна тохижилттой харьцуулахад ногоон байгууламж ихтэй, хүүхдийн цэцэрлэг, тоглоомын талбай зэрэг нь хэмжээний хувьд том. Шаргал, улаан хүрэн өнгийг өвөрмөцөөр хослуулсан тус хорооллын өнгө үзэмж, гадна төрх нь хүүхдүүдийн тоглож наадсан дуу хоолой, шувуудын жиргээтэй хорших нь таатай сайхан мэдрэмж төрүүлж байлаа.
Сүүлийн үед нийслэлд баригдаж буй хотхон хорооллууд гадна тохижилт, ногоон байгууламж, хүүхдийн тоглоомын талбай, авто зогсоол зэргийг сайн төлөвлөж хийж байгаа нь барилгын компаниуд зөвхөн ашиг харахаас илүүтэй амьдрах орчныг бүрдүүлэхийн төлөө хичээл зүтгэл гаргах болсонтой холбоотой.
Цаашид улам илүүгээр барилгын чанарыг сайжруулж өнгө үзэмж нэмсэн олон сайхан хорооллууд сүндэрлэн босно гэдэгт итгэлтэй байна

 

 




 

Холбоотой мэдээ