Д.Эрдэнэбаяр: Бид цементийн үнийг тогтвортой байлгахыг зорьж байгаа

Д.Эрдэнэбаяр: Бид цементийн үнийг тогтвортой байлгахыг зорьж байгаа
Улаанбаатар төмөр замын  Ачиж, буулгах тээвэр экспидецийн механик анги /АБТЭМА/-гийн Орон нутгийн ачаа /ОНА/-ны цех буюу бидний хэлж заншснаар 44-р зам болох Гурвалжингийн гүүрний зүүн талд  нийслэл хотод өмнөд хөршөөс  ирж буй цементийн ихэнх хэсэг нь буудаг. Үндсэндээ энэ газарт Монголд цементийн бизнес эрхлэгчид бүгд цуглардаг гэхэд болно.  Харин тэд өнгөрсөн жилэээс нэгдсэн зохион байгуулалтанд орж, хамтарч ажиллах болжээ. Монголын цементийн безнес эрхлэгчдийн нэгдсэн  холбооны төлөөлөн удирдах зөвлөлийн гишүүн Д.Эрдэнэбаяртай уулзаж ярилцлаа.
-Улаанбаатар төмөр замын энэ 44-р замд өдөрт ойролцоогоор хэдэн вагон бууж байна вэ?
-Яг хэд ирж байгаа тухай тодорхой  тоо хэлэхэд бас хэцүү. Учир нь энэ манай дотоодын цементийн хэрэглээнээс шалтгаалах асуудал юм. Өөрөөр хэлбэл цемент худалдан авах сонирхол дотоод зах зээлд их байвал их орж ирнэ. Бага байвал бага. Цементийн бизнес эрхлэгч хувь хүн, аж ахуйн нэгжүүд Эрээний цементийн 3-н үйлдвэрээс ачаагаа машинаар ачин Замын-Үүд өртөөн дээр ирж, тэндээс вагоны захиалга өгч, нийслэлд буулгах замаа сонгох гэсэн дараалалаар цементийг авчирч байна. Бизнесменүүдийн ихэнх нь нийслэлд авчрах цементээ энд буулгах сонирхолтой байдагаас л 44-р замыг “цемент буудаг” газар ярьж хэвшсэн хэрэг. Түүнээс биш өөр замуудаар цемент бас бууж байгаа. Энд манай цементийн бизнес эрхлэгчдийн холбооны 19 хувь хүн, 40 гаруй аж ахуйн нэгж нийт 60 шахам иргэн, байгууллага үйл ажиллагаа явуулж байгаа бөгөөд  энэ 6-р сарын байдлаар  өдөрт дунджаар 30-40 вагон буусан. Энэ нь өмнөх жилүүдийн дундаж үзүүлэлт юм.  Ерөнхийдөө барилгын ажлын улиралд иймэрхүү хэмжээний цемент буудаг. 
-Холбоо байгуулагдсаны ач холбогдол нь юу вэ?
-Цементийн бизнес эрхлэгчдийн холбоо байгуулагдсанаар цементийн бизнес эрхлэгч нараар тогтохгүй нийт ААН, ард иргэдэд ач холбогдолтой болсон гэж үзэж байгаа. Хятадаас цемент оруулж ирж байгаа хүмүүс бүгд Эрээн хотын “Тайго”, “Мэнго”, “Тунхуй” гэсэн 3 үйлдвэрээс бүтээгдэхүүнээ  худалдан авдаг.  Гэтэл ердөө жилийн өмнө бид нэгдсэн холбоогүй учир дээрх үйлдвэрүүд үнээ нэмэх, жин тонн дутах, сав баглаа муутай, чанарын шаардлага хангахгүй бүтээгдэхүүн нийлүүлсэн тохиодолд шаардлага тавьбал огтхон ч хүлээж авдаггүй байсан.  Ганц нэгхэн хүн болохоор тэр шүү дээ. Харин одоо бол цементийнхээ үнийг шалтгаангүйгээр огцом нэмвэл холбооны зүгээс шаардлага тавин бууруулж, чадаж байна.
Хэрэглэгчдийн тухайд бол чанарын шаардлага хангаагүй бүтээгдэхүүнийг худалдан авахгүй байх боломж бүрдэж байгаа юм. Учир нь манай холбооны зүгээс яг энэ 44-р зам  дээр ээлжээр өдөр бүр  2 хүн  хяналт тавьж ажилласанаар  чанарын болон жингийн шаардлага хангахгүй , үнэ хөөрөгдөн зардаг хүмүүсийг илрүүлэн ажиллаж байна. Иймд иргэд, аж ахуйн нэгжүүд  чанарын шаардлага хангаагүй бүтээгдэхүүн худалдан авах хүсэлгүй л байгаа бол манай холбооны таних тэмдэг бүхий, тусгай өмсгөлтэй  хүмүүсээс бараагаа худалдан авахыг зөвлөж байна.  
-Энд нэлээд олон тооны цемент ачигчид байх юм. Эдгээр хүмүүст танай холбооны зүгээс хандаж хэрэгжүүлдэг арга хэмжээ байдаг болов уу?
-Ачигчид энд олон жил ажилласан, цемент ачиж, буулгаж гаршсан хүмүүс байдаг. Бараг ихэнх нь 5-10 жил энэ ажлыг хийсэн хүмүүс байгаа. Өөрөөр хэлбэл яаж ажиллахаа мэддэг гэх үү дээ.  Ямар нэг аж ахуйн нэгж, байгууллагад харьяалалгүй сайн дураараа энэ ажлыг хийж байгаа хүмүүс юм.  Манай холбооны зүгээс ачигчдыг бүртгэлжүүлж, ажлыг хуваарьлан эмх цэгцтэй байхыг хариуцан ажиллахаар төлөвлөж байгаа.
-Хөдөлмөрийн аюулгүйн ажиллагаа алдагдаж, ачигчид гэмтэж бэртвэл яах вэ?
-Энд олон жил ажилласан хүмүүс ихэвчлэн байдаг болохоор гэмтэж бэртэх гэх мэт асуудал  гардаггүй. Өөрсдийнхөө бололцоогоор амны хаалт зэргийг хэрэглэж ажил үүргээ гүйцэтгэдэг.
-Цемент одоо зах зээл дээр ямар үнэ ханштай байна вэ? Цаашид үнийг нь тогтмол хадгалж чадахаар байна уу?
-Өнөөдрийн байдлаар 1 тонн цемент 145-150 мянган төгрөгийн үнэтэй байна. Манай холбооны зүгээс өнгөрсөн жил Засгийн газрын орон сууцны үнийг тогтвортой байлгах  дэд хөтөлбөрт хамрагдаж цементийн үнийг тогтвортой байлгах гэж их хичээн ажилласан. Ер нь бол өнгөрсөн жил цементийн үнийг тогтвортой байлгаж чадсан. Энэ жилийн тухайд мөн ялгаагүй. Хэдийгээр валютын ханшийн өсөлт байнга байгаа ч одоо байгаа үнийг хэвээр хадгалах үүднээс Эрээний үйлдвэрүүдтэй тохиролцон ажиллаж байна. Барилгын ажлын ид үе болох 4-10-р сарын хооронд үнэ өсөх тухай асуудал яригддаг ба бид ямартай ч 6-р сарыг дуустал барилга байгууламжийн үндсэн түүхий эд болох цементийн үнийг хэвээр хадгалж чадлаа. Үлдсэн 3 сард ч гэсэн тогтвортой байна гэж бодож байгаа.
 
 
 

Холбоотой мэдээ