Зочны өрөөний интерьер дизайн

Зочны өрөөний интерьер дизайн
        Зочны өрөө нь гэрийн хамгийн хүндэтгэлтэй хэсгийн нэг.  Сүүлийн үед зочны өрөөний өнгө төрх тод, хурц өнгүүдийг шигтгэсэн, байгалийн гаралтай чимэглэлүүдээр гоёсон зэрэг илүү орчин үеийн чиг хандлагатай болоод байгаа. Иймээс та зочны өрөөгөө өөрчилж, янзлахдаа хамгийн түрүүнд өнгөө сонгох хэрэгтэй. Таны сонгосон өнгөнөөс шалтгаалж зочны өрөөний өнгө төрх харагдах болно.
      Голлох өнгөө сонгосны дараа тавилгын өнгөө ханын хээтэйгээ зохицуулвал өрөө дулаахан, зохицтой харагддаг. Сүүлийн үед хүмүүс нүсэр том тавилгуудаас эрс татгалзаж, аль болох зай бага эзлэх, сонин дизайнтай, тод өнгөтэйг  сонгох болсон. Ингэснээр өрөө уужим том харагдахаас гадна хэрвээ танайх жаахан хүүхэдтэй бол гүйж, харайж тоглоход нь саад болохооргүй зайтай байх болно.
      Зочны өрөөний бас нэг чухал зүйл бол аксессуар буюу гоёлын жижиг хэрэгсэл юм. Үүнд хивс хивсэнцэр, зураг, цэцэг, гэрэл зэрэг зүйлс багтана. Хивс хивсэнцэр нь өрөөний голлох өнгөтөйгөө зохицсон байх хэрэгтэй, мөн ханандаа  гэр бүлийнхээ эсвэл орчин үеийн уран зураг, хуулбар зургууд зэргийг гоёмсог хүрээнд хийн өлгөвөл хоосон хана “амь орж” халуун дулаан уур амьсгалыг бүрдүүлэх болно. Үүнээс гадна цэцэг өрөөндөө тавих нь өрөөг энергээр дүүргэж, байгалийн мэдрэмжийг төрүүлдэг.
      Ингээд зочны өрөөг засаж тохижуулахад тань санаа өгөхүйц нэгэн зөвлөмжийг хүргэж байна.
 
Зочны өрөөг тохижуулах 15 алхам
 
1. Зочны өрөөний тэнцвэртэй энергийн зохицол
Танай зочны өрөөг гэрэлтүүлэх нарны гэрэл болон сүүдрийг зөв зохицуулах шаардлагатай бөгөөд эс чадвал өрөөний сайн муу энергийн тэнцвэржилт алдагдана. Хэт харанхуй өрөөг сайтар гэрэлтүүлснээр хуралдсан муу энерги сарниж, эерэг уур амьсгал бүрдэх болно.
 2. Хаалга цонхны байрлал
 Өрөөний цонхоор гадаах цэцэрлэг харагдаж, энэ нь танд эрч хүч, урам зориг нэмдэг байж магадгүй юм. Гэвч таныг хаалгаа нээх болгонд хаалгаар орж ирэх энергийн урсгал хаалганы чанх өөдөөс харсан цонх болон салхивчаар гадагшлах болно. Иймээс хаалганы өмнөөс харсан цонхонд хаалт хийх эсвэл байнга хааж, хөшгөө татсанаар энергийн урсгалыг зогсоож, өрөөнд тараах хэрэгтэй. Хэрэв танайд гаднаас гэрэл нэвтэрдэг хэтэрхий олон хаалга, цонх байдаг бол тэдгээрийн өмнө байнга ямар нэгэн хаалт тавьж байхыг зөвлөе.
  3. Өрөөний хэлбэр
Зочны өрөөний хамгийн тохиромжтой хэлбэр бол тэг дөрвөлжин юмуу тэгш өнцөгт хэлбэр юм. Энэ нь манай оронд нийтлэг байдаг ч танай өрөө буруу хэлбэртэй бол өрөөг тэнцвэргүй болгодог.
 4. Тавилгын байршил
Зочны өрөөний тавилга гаднаас орж буй энергийн урсгалыг өрөөн дотор чөлөөтэй эргэлдүүлж байхаар тавигдсан эсэхийг шалга. Энэ нь танай зочны өрөөнд байгаа хүмүүс болон зочдод сайн энергийг түгээдэг бөгөөд найман талтай буюу “Па Куа” толь шиг (зурагт үзүүлснээр) байвал маш сайн.
 5. Суудлын байрлал
Таны суудал таатай байрлалд байна уу? Таны ивээлтэй зүг рүү чинь харж байна уу? Та Фэнг Шүйгийн тусламжтайгаар куа дугаараа ашиглаж өөрийн 4 сайн, 4 муу зүгийг олж өрөөнд байхдаа аль болох сайн зүг рүүгээ харж сууж байгаарай.
 6. Буйдан сандлын байрлал
Танай буйдан сандлууд өөд өөдөөсөө харсан эсэхийг нягтал. Энэ байрлал нь эрүүл бус харьцаа болон сөргөлдөөнийг бий болгодог. Зочны өрөөн дэх буйдан ороо цулгуй хананы өмнө (ялангуяа өрөөний хаалганы эсрэг) тавибал сайн. Энэ нь яст мэлхийний тусламж авч байна гэсэн бэлгэдэл юм.
 7. Өнгө будаг
Зочдын өрөөнд өнгө ч бас чухал. Аливаа өнгө хэт их давамгайлбал муу энерги үүсгэж, өрөөний тэнцвэрийг алдагдуулдаг. Хэрэв өрөөний хана, тааз тэр аяараа гэрэлтэй цайвар өнгө зонхилж байвал түүнийг тэнцвэржүүлэхийн тулд тавилгандаа аль болох бараан өнгийг сонгоорой.
 8. Хурц ирмэг, үзүүртэй зүйлсээс зайлсхий
Хурц ирмэгтэй зүйл болон янз бүрийн булан тохой тань руу чиглэсэн эсэхийг шалга. Ялангуяа таныг сууж байхад тань руу удаан хугацаагаар чиглэсэн ийм өнцөг нь ажлын амжилт, азын тэнгэр, сайн сайханд маш муу нөлөөтэй.
 9. Таазны хөндлөвч эрүүл мэндэд хортой
Хэрвээ таны чанх дээр байрлах ямар нэгэн хөндлөвч мод, эсвэл доош чиглэсэн хурц өнцөг байвал энэ нь маш муу бөгөөд даралт ихсэх ялангуяа зүрх судасны өвчтэй хүнд үхлийн аюулд ч хүргэх муу талтай. Түүнийг засахын тулд салхин хонх өлгөх, эсвэл “Бамбуу” (хулс) тарих хэрэгтэй.
 10. Амьд ургамал зочны өрөөнд сайн
Дээрхийн адил тань руу чиглэсэн хурц өнцгийн нөлөөг зөөлрүүлэхдээ тэрхүү өнцгөө дагуулж янз бүрийн ургамал, мөлхөө цэцэг тарьж болно. Тэрхүү ургамал, мөлхөө цэцгүүд нь өнцгөөс гарах муу энергийн хүчийг сааруулдаг.
 11. Эмх замбараагүй байлгах нь сөрөг муу энерги үүсгэнэ
Хэрэв таны зочны өрөө эмх замбараагүй, элдэв янзын хог новшоор дүүрэн байдаг бол үүнийгээ яаралтай цэгцэлж цэвэрлэх хэрэгтэй. Учир нь зочны өрөөний эмх замбараагүй бохир байдал нь тав тухтай байдлыг эвдээд зогсохгүй маш муу энерги ялгаруулдаг байна.
 12. Гэр бүлийн зургаа хаана байрлуулах вэ
Зочдын өрөөнд гэр бүлийн гишүүдийн янз бүрийн жаазтай олон зурагнууд байх нь элбэг. Энэ нь дэмий зүйл бөгөөд түүний оронд гэр бүлийн ганцхан зургийг гоёмсог жаазанд хийж гэр бүлийн аз жаргалын булан болох зүүн ханандаа өлгөх нь тохиромжтой.
 13. Замбараагүй хээ, хурц өнгө муу нөлөөтэй
Нүд чилж, мэдрэл ядрамаар хурц, гял цал өнгөтэй, эмх замбараагүй хээтэй хивс болон хөшиг бүү тавиарай. Энэ нь тайван сайхан амраахаасаа илүү эмх замбараагүй, тогтворгүй болгож, ухаан санааг чинь будлиантуулж орхино.
  14. Найман зүгийн утга учрыг ойлгож ашигла
Хэрэв та өөрийн амьдралаа илүү утга учиртай болгоё гэвэл ертөнцийн найман зүгийнхээ утга учир, шинж чанарыг илүү сайн мэдэж авах хэрэгтэй. Фэнг Шүйд найман зүг нь их чухал бөгөөд орчин тойрноо ойлгож хүндэтгэх ухаан үүн дээр л суурилдаг. Жишээ нь: зүүн урд буюу эд баялгийн зүгт төмөр эдлэл болон телевизор тавих нь танай гэрт орж ирсэн модны буюу мөнгөний энергийг цавчиж устгах болно.
 15. Хэт модернист буюу авангард хийцийн тавилганаас зайлсхий
Өрөөний тавилга нь бодит амьдралд аль болох тустай, тогтвортой байхыг бэлгэдсэн байвал сайн. Эцэст нь, цэвэр цэмцгэр, зөв байрлалтай өрөөнд л энергийн урсгал жигд саадгүй эргэлдэж байх болно гэдгийг анхаараарай.






Холбоотой мэдээ