“Буянт-Ухаа 1” гэж баригдахаасаа ашиглалтанд орох хүртлээ иргэдийн хүлээлтийг дагуулсан хороолол нийслэлд бий. Засгийн газраас нийгмийн зорилтод бүлгийнхэнд зориулж бариулсан, бусад орон сууцны байруудаас харьцангуй хямд үнэтэй энэ хороолол оршин суугчдаа сонгон шалгаруулах гэж их л ажил болж буй.
Эхний хэсгийн 576 айлын орон сууц ашиглалтанд орсон хэдий ч хэн амьдрах нь одоогоор тодорхой биш. Мөн тун удахгүй удаах хэсгийн барилгыг ч гүйцэтгэгч “Хасу мандал” ХХК-ийн хамт олон хүлээлгэж өгөхөд бэлэн болжээ. Ингэснээр 1764 айлын орон сууцны барилга Хан-Уул дүүрэгт сүндэрлэн босч дуусаад оршин суугчдаа хүлээж байна.
 “Бүртгэл явагдаж байна. Хянаж шалгаж байна” гэсээр 2 сар гаруй хугацаа өнгөрөв. Баригдсан орон сууцны тооноос бүртгүүлсэн иргэдийн тоо давбал сугалаа явуулна гэсэн журмын дагуу өнгөрсөн 7 хоногт сугалаа явуулах тухайгаа ТОССК-аас хэвлэл мэдээллийн хэрэгслүүдээр цацаж эхэлсэн.
Харин өнөөдөр сугалааг хэрхэн явуулах, хэдэн хүн тэнцсэн талаар сэтгүүлчдэд мэдээлэл хийв. Энэ үеэр ТОССК-ийн дэд захирал Д.Оюунжаргалаас цөөн асуултанд хариулт авлаа.
-Саяхан “Буянт-Ухаа 1” хороололд оршин суухаар бүртгүүлсэн иргэдийн нэрсийг зарласан. Тодорхой шалтгаангүйгээр хасагдсан гэх гомдолтой хүмүүс ч байх шиг байна. Ер нь анх бүртгүүлсэн иргэдээс хэдэн хүн хасагдсан бэ?
-“Буянт-Ухаа 1” хорооллын орон сууцны захилгын бүртгэлийг Төрийн цахим үйлчилгээний машинаар 14 хоногийн турш бүртгэсэн. Энэ хугацаанд 9094 иргэн бүртгүүлснээс төрийн албан хаагч 3991, өндөр настан 2392, залуу гэр бүл 1730, хөгжлийн бэрхшээлтэй 981 иргэн байгаа юм. Бүртгэл хаагдсны дараа бүртгүүлсэн иргэдийн мэдээллийг Монгол банк, Нийгмийн даатгалын ерөнхий газар, Улсын бүртгэлийн ерөнхий газрын Эд хөрөнгийн эрхийн бүртгэлийн газар зэрэг байгууллагуудтай хамтран бүртгэлийн мэдүүлгээ үнэн зөв бөглөсөн эсэх талаар хянаж, баталгаажуулсан. Олон байгууллагыг хамарсан нүсэр ажил байсан учир хянаж, баталгаажуулах тал дээр цаг хугацаа алдсан тал бий. Энэ ажил дуусангуут өнгөрсөн 4-р сарын 28-ны өдөр бүртгүүлсэн бүх иргэдийн гар утсанд мессэж хэлбэрээр болон www.e-zasag.mn,  www.tosk.gov.mn цахим хуудсаар журмын шаардлага хангасан эсэх мэдээллийг тараасан байгаа.
Иргэдийн гомдол саналын тухайд зээлийн шалгуураар 50, хөгжлийн бэрхшээлтэй 408, нийгмийн даатгалын сангийн мэдээллээр 1610 төрийн албан хаагч, үл хөдлөх хөрөнгийн мэдээллээр 1731 хүнийг журмын шаардлага хангаагүй гэж үзэн хассан байгаа. Эдгээрээс 150 хүн дахин шалгуулахаар өргөдөл гомдлоо гаргаад байна.
-Хасагдсан шалтгааныг илүү дэлгэрэнгүй тайлбарлаад өгөөч?
-Журмын шаардлага хангаагүй иргэд хасагдсан. Тухайлбал хөгжлийн бэрхшээлтэй иргэн гэж ямар хүнийг оруулах вэ? “Буянт-Ухаа 1” хорооллын журамд “Хөдөлмөрийн чадвараа 70-аас дээш хувиар алдсан иргэнийг хэлнэ” гэж оруулсан байгаа. Энэ шаардлагыг хангаагүй бол хасагдана. Төрийн албан хаагчдын тухайд 2 жилээс багагүй хугацаагаар нийгмийн даатгал төлсөн бол шаардлага хангасан гэж үзнэ.
Гэхдээ иргэд  гомдол гаргах эрхтэй бөгөөд бид дахин нягтлан шалгах болно. Ер нь бол дээрх тоонуудыг дундажлаад харахад сугалаанд ойролцоогоор 7700 орчим иргэд оролцох боломжтой болох болов уу гэж үзэж байгаа.
-Сугалааны товыг энэ амралтын өдрүүд гэж зарласан байсан. Тэгэхээр дахин нягтлан шалгах ажил жаахан давчуу хугацаанд болох нь ээ?
-Гомдол гаргасан иргэдийн тоо харьцангуй цөөн болохоор гайгүй хугацаандаа амжина. Дөнгөж сая гэхэд НДЕГ-аас дахин хянасан мэдээгээ бидэнд ирүүлсэн байгаа. Үлдсэн газрууд ч бас өнөө маргаашийн дотор мэдээллээ ирүүлчих байх. Иймд бид маргааш үдээс хойш сугалаанд оролцох иргэдийн тоог эцсийн байдлаар гаргаж, энэ 7 хоногийн амралтын өдрүүдэд сугалаагаа цагтаа явуулах төлөвлөгөөтэй байна. Сугалааг МҮОНТ-ийн 2-р сувгаар шууд дамжуулах бөгөөд бямба гарагт 10:00-13:00 цагийн хооронд, ням гарагт 10:00-14:00 цагийн хооронд явагдана.
-Сугалаагаа ямар хэлбэрээр явуулах вэ?
-Хайрцагт байгаа сугалаануудаас гараар сугалах маягаар л явагдана
Үндэсний бүтээн байгуулалтын корпорацийн захиалгаар дахиад “Буянт-Ухаа 2” хорооллыг барьж байгуулах гэж байгаа. Хэзээ ашиглалтанд орох вэ? Мөн журмын шаардлага хангасан хэр нь эхний ээлжийн орон сууцнаас сугалаа хожиж чадаагүй иргэд дараагийн байранд шууд орох боломжтой юу?
-“Буянт-Ухаа 2” хорооллын эхний хэсгийг 2015 онд ашиглалтанд оруулахаар төлөвлөж байгаа. Эхний байранд орж чадаагүй иргэд дараагийн байранд шууд орохгүй. Яг л урьдын адил бүртгүүлээд, хүсэлтээ гаргаад явна.