“Барилга экспо-2014” үзэсгэлэн өнөөдөр нээлтээ хийнэ

“Барилга экспо-2014” үзэсгэлэн өнөөдөр нээлтээ хийнэ
          Үзэсгэлэнгийн нээлт өнөөдөр 12 цагаас Мишээл экспо төвд болно. Нээлтийн арга хэмжээнд Барилга хот байгуулалтын сайд Г.Байгалмаа, Гэр хорооллын хөгжлийн орлогч дарга М.Гантулга, Барилгын хөгжлийн төвийн дэд захирал Ч.Отгончулуун, Монголын барилгачдын холбооны Ерөнхийлөгч М.Батбаатар, Барилгын материал үйлдвэрлэгчдийн холбооны гүйцэтгэх захирал О.Лхагвадорж нарын хүндэт зочид урилгаар оролцоно.
       Монгол улсын хувьд барилгын салбарт Ногоон барилга гэх нэр томъёо дуулдах болсон ч жинхэнэ утгаар хөгжиж чадаагүй байгаа билээ. Тиймээс Монголын барилгын үйлдвэрлэлийн салбарт энэхүү байгальд ээлтэй дэвшилтэт  технологийг хөгжүүлэх гарцыг тодорхойлох, инноваци нэвтрүүлэх зорилготой “Барилга экспо-2014” олон улсын үзэсгэлэн яармагийг зохион байгуулж байна.
       “Ногоон барилга бидний ирээдүй” уриатайгаар зохион байгуулагдаж энэхүү үзэсгэлэнгийн хамтран зохион байгуулагчаар БХБЯ, НЗДТГ, НГХХГ, МБМҮХ, БХҮНТ зэрэг төрийн болон мэргэжлийн төрийн бус байгууллагууд оролцож байна.
        Үзэсгэлэнд Япон, Солонгос, Орос, Америк, Турк, Хятад, Герман, Финланд, Итали, Швецарь зэрэг дэлхийн 10 гаруй орны тэргүүлэгч компаниуд,  Монгол улсын Үндэсний шилдэг аж ахуйн нэгжийн төлөөллүүд зэрэг нийтдээ 250 гаруй байгууллага оролцож өөрсдийн дэвшилтэт техник технологи, шинэлэг барилгын материал, бүтээгдэхүүн үйлчилгээгээ танилцуулахаас гадна  иргэдэд зориулсан хямдрал урамшуулалтай худалдаа, зөвлөгөө мэдээллийн үйлчилгээг зохион байгуулах юм.
        “Барилга экспо-2014” үзэсгэлэн иргэдийн хэрэгцээ шаардлагад тулгуурлан 2 үе шаттайгаар зохион байгуулагдана.  Эхний хэсэг болох “Барилгын материал, Дэвшилтэт технологийн үзэсгэлэн” 4-р сарын 25-аас 27-ны өдрүүдэд үргэлжлэх бол хоёр дахь хэсэг “Орон сууц, Хаус дизайны үзэсгэлэн” 5-р сарын 02-оос 04-ний өдрүүдэд “Мишээл экспо” төвд зохиогдоно.
         “Барилгын материал, Дэвшилтэт технологи” үзэсгэлэнд Үндэсний үйлдвэрлэгчид болоод дэлхийн шилдэг брендийн
  • Орчин үеийн засал чимэглэл, Интерьер дизайны материалууд
  • Шинэ технологийн цонх, хаалга,
  • Дохиолол хамгаалалт, ухаалаг байшингийн систем,
  • Нар салхи сэргээгдэх эрчим хүчний төхөөрөмж
  • Эрчим хүчний хэмнэлтэй амины орон сууц
  • Халаалт, сантехникийн хэрэгсэлүүд
  • Дуу дулаан тусгаарлах материал,
  • Агааржуулалт салхивчны систем
  • Төмөр хийц, жижиг дунд үйлдвэрлэлийн тоног төхөөрөмж,
  • Машин механизм, гэх мэт сүүлийн үед ногоон барилгад ашиглагдаж байгаа бүтээгдэхүүнүүд  дэлгэгдэх юм. Тухайлбал сүүлийн үед хэрэглэгчдийн таашаалд ихэд нийцээд буй нарны энергээр ус халаах төхөөрөмж, арматур тасдах, зангидах гар ажиллагааг халсан Япон тоног төхөөрөмжүүд, шингэн керамик дулаан тусгаарлагч, Монголд анх удаа үйлдвэрлэж буй шинэ технологийн хэв хашмал гэх мэт олон сонирхолтой бүтээгдэхүүнийг уг үзэсгэлэнгээс үзэж танилцах боломжтой. Мөн үзэсгэлэнгийн 2 дахь өдөр  “Үйлдвэрлэл ба инноваци” сэдэвт барилгын материал үйлдвэрлэгчдийн уулзалт Мишээл төвийн хурлын танхимд болно.
       “Орон сууц, Хаус дизайн” үзэсгэлэнд хүрэлцэн ирснээр нийслэл хотод захиалга авч буй 60 гаруй хотхон, хороололтой танилцаж, 8 хувийн ипотекийн зээлд хамрагдах боломжтой бөгөөд “Жигүүр гранд”, “Макс өргөө”, “Номин”  зэрэг нэр хүндтэй 100 гаруй барилгын компаниуд оролцох юм.
 
Үзэсгэлэнгийн хөтөлбөрөөс:
2014.04.25
           12 цагт Үзэсгэлэнгийн нээлт
2014.04.26
            11 цагт “Үйлдвэрлэл ба инноваци” уулзалт
2014.04.26
           Барилгын материал үйлдвэрлэгчдийн өдөрлөг
 
 

Холбоотой мэдээ