Засгийн газраас нийслэл хотын зүүн бүсийн цахилгаан хангамжийг нэмэгдүүлэх зорилгоор Баянзүрх дүүргийн 8-р хороонд “Амгалан” станцийг шинээр барьж байгуулахаар болж, өнгөрсөн онд барилга угсралтын ажлыг эхлүүлсэн билээ. Орчин үеийн техник технологид суурилсан энэхүү станц ашиглалтанд орсноор хотын зүүн хэсгийн эрчим хүчний хэрэглээг хангаад зогсохгүй энэ хэсэгт ойрын жилүүдэд нэмэгдэх дулааны хэрэглээг мөн хангах юм. Нийт 50 мянга орчим өрхийн хэрэглэгээг хангах төлөвлөгөөтэй “Амгалан” станц өмнө нь ажиллаж байсан станцийн суурин дээр баригдахаар төлөвлөгдсөн.
     Тус станцын барилгын ажил ид явагдаж байгаа бөгөөд одоогийн байдлаар хуучин зуухны барилгыг бүрэн буулгаж, шинэ барилгын суурийн ажлыг эхлүүлсэн байна. Мөн утаа сорогч, үнс сорогч, вагон хөмрөгчийн барилгын суурийг цутгаж эхэлжээ. Түүнчлэн  хөрсний геодезийн өрөмдлөгийг бүрэн хийж, станцын нэмэлт усны 4 худгийн өрөмдлөгийн ажлыг дуусгажээ. Харин станцын эзэмшлийн болон шугам трасс суурилуулах газарт буусан айл өрхүүдийг нүүлгэн шилжүүлэх ажил ялимгүй удаашралтай байгаа юм байна. 
    Нам температурт буцламтгай шаталттай технологийн зуух бүхий энэ станц ашиглалтанд орсноор ойр орчмын 86 уурын зуух татан буугдах юм. Барилгын ажлыг гүйцэтгэгч “СМЕС” компани зүгээс өвлийн ид ачааллаас өмнө буюу 10-р сараас хэтрүүлэхгүйгээр эхний зуухыг ашиглалтанд оруулахаар төлөвлөж байгаа гэнэ. Ирэх оноос бүрэн ашиглалтанд орох төлөвлөгөөтэй байгаа юм.