Олон талт барилга

Олон талт барилга
      Барселона хотын Валлвидэрт орших энэхүү байшинг анх харахад Газар дундын тэнгист далайн эргийн ойр орчимд баригдсан байх гэсэн төсөөлөл бууж байсан юм.  Учир нь газар зүйн байрлал, цав цагаан өнгө,  дээвэргүй мэт  загвар нь газар дундын тэнгисийн барилга, байгууламжийг санагдуулах ажээ.  
       Барилгын дотоод ашиглалтын талбайг нэмэгдүүлэх үүднээс  ВЛАБ студийн   уран барилгачид 3 давхар байхаар шийджээ. Геометрийн олон талт дүрс шиг  барилгыг  анхандаа тэгш дөрвөлжнөөс санаа авч  цаашаагаа тал бүр нь 4 хэсэгт хуваагдахаар зургийг гаргасан байна.  Тэрхүү тэгш дөрвөлжинг  тал бүрээс нь татаж сунгасны эцэст барилгын ерөнхий зураг төсөл гарчээ.  Ерөнхий хэлбэрээс гадна барилгын гол зорилго нь хотын өнгө үзэмжинд цоо шинэ шийдлийн нэгэн тусгал өгөх, гэрийн эздэд өөрсдийн гэсэн хувийн сонирхолтой орчинг бүрдүүлж өгөх байв.  Талбай багатай,  давчуу орчинд ч гэсэн хувийн таатай эзэмшил бий болгох зорилго нь  барилгын хэлбэрийг зохиомжлох  гол хүчин зүйл болсон.
        Цонхны хаалт нь өдөр нарны гэрэл тааламжтай бүрэн тусах нөхцлийг бүрдүүлж өгснөөс гадна гэрийн эздийн сэтгэлд нийцтэй хувийн орчинг бүрдүүлжээ. Барилгыг хүрээлсэн хашаа нь доод талаараа орчны элдэв хөл хөдөлгөөнөөс хамгаалсан  улаавтар өнгийн чулуун хавтангууд дээр сууриглагдсан нь төгс зохицсон шийдэлтэй болжээ.

Холбоотой мэдээ