“Барилга барих газрын эрх олгох, барилгын эх загвар зураг батлах, барилга угсралтын ажил эхлүүлэх, ашиглалтад оруулах үйл ажиллагааны журам” боловсруулагдсан талаар нийслэлийн Засаг даргын Хөрөнгө оруулалт, хот байгуулалтын асуудал хариуцсан орлогч С.Очирбаттай ярилцлаа. 

-Барилгын салбарт мөрдөгдөх хууль дүрэм багадаагүй гэж салбарынхан хэлдэг. Таны боловсруулсан журам ямар ач холбогдолтой юм бэ? 
-Газар болон барилгын асуудлаар иргэн, аж ахуйн нэгж үйлчилгээ авъя гэхээр тухайн харилцааг зохицуулсан олон хууль дүрэм, журмыг судлах шаардлага гардаг.  Тэгвэл тэр олон дүрэм журмыг нэгтгэж,  энгийн ойлгомжтой болгож өгснөөрөө энэ журам онцлог. Өөрөөр хэлбэл, Барилгын тухай, Газрын тухай, Хот байгуулалтын тухай гээд салбарын олон хуулийг хэрхэн хэрэгжүүлэх, хэрэгжүүлэхдээ ямар журам баримтлах вэ гэдгийг нарийн тусгаж өгсөн. Барилга барих зориулалтаар газар олгохоос эхлээд дуусч ашиглалтад оруулах хүртэлх харилцааг энэ журмаар зохицуулна гэсэн үг. 
-Журамд тусгасан гол заалтаас дурдахгүй юу?
-Хууль байлаа ч нарийн харилцааг зохицуулсан журам байхгүйгээс олон хүндрэл үүсдэг. Өнөөдөр барилгын зургаа батлуулж чадахгүй хэдэн жил болдог хүн ч бий. Харин энэ журмаар иргэдийн хүсэлт, саналыг шийдвэрлэх хугацааг нарийн тогтоосон. Барилгын зургийг гэхэд нэг цэгийн үйлчилгээгээр аваад арав хоногийн дотор техникийн зөвлөлийн хурлаар хэлэлцүүлнэ. Хэрэв хурлаар дэмжигдвэл хоёр хоногийн дотор архитектур төлөвлөлтийн даалгаврыг нь баталж өгөх ёстой гэх мэтчилэн. Тийм болохоор иргэд, аж ахуйн нэгжид чирэгдэл үүсэхгүй, хүнд суртал ч арилна. 
-Ер нь хугацаа алдсан, зөрчил маргаантай барилга хэр олон байна вэ?
-Олон жил саатсан барилга зөндөө бий. 13 дугаар хорооллын урд байсан гэр хорооллын буурин дээр нэлээд хэдэн барилга баригдаж байгаа. Гэтэл тэнд хэсэгчилсэн төлөвлөлт гарсан ч, зай хэмжээ алдсанаас алдаа их гарсан. Гомдол ч их ирж байна. Шинэ журмаар энэ мэт асуудлыг шийдэх боломжтой болно. 
-Энэ журамд иргэдийн оролцоог хангах асуудлыг нарийн тусгасан гэв үү? 
-Орон сууцны хороолол дундах барилгажаагүй талбайд барилга барих тохиолдолд нэгж талбарын хил хязгаарыг тогтоосон эргэлтийн цэгүүдээс 90 метрт байгаа үл хөдлөх хөрөнгийн өмчлөгчдийн 70 хувь нь зөвшөөрсөн тохиолдолд барилга барих зөвшөөрөл олгохоор тусгасан. Тэгэхгүй бол барилга барих гэхээр хэдэн хүн эсэргүүцдэг боллоо шүү дээ. 
-Хурлын тэргүүлэгчид иргэдийн 70 хувиас зөвшөөрсөн санал авах нь буруу гэж байсан. Хэдэн хувь дээр тогтов? 
-Олон янзын байр суурьтай байна. Зарим нь 51 хувь байх ёстой гэж байна. Гэхдээ 51 хувь бол учир дутагдалтай. Хоёр хувь дээр нь тоглолт хийгээд 49 болчихвол барилгын ажил унана. Тэгэхээр 66,3 буюу гуравны хоёр байвал зүгээр юм уу гэсэн санал ч гарч ирсэн. Энэ асуудлыг ажлын хэсэг дахин ярилцах хэрэгтэй болж байна. 
-Хууль зөрчиж зөвшөөрөл олгосон Засаг даргыг огцруулна гэх мэт хатуу заалт тусгасан гэсэн?
-Газрын тухай хууль, Хот байгуулалтын тухай хуультай уялдан гарч байгаа энэ журмыг зөрчвөл огцруулах хүртэл арга хэмжээ авна  гэж заасан. Тодруулбал, нийслэлийн нутаг дэвсгэрт барилга барих газрын эрхийг иргэн, хуулийн этгээдэд  олгохдоо заавал  Газрын тухай хуулийн дагуу дуудлага худалдаагаар төсөл сонгон шалгаруулна. Хэрвээ энэ заалтыг зөрчвөл нийслэлийн Засаг даргыг албан тушаалаас нь огцруулах үндэслэл болно гэж заасан. Засаг дарга гэлтгүй Ерөнхий архитектор зураг төслийг журам зөрчин баталсан бол ажлаас нь халах хүртэл арга хэмжээ авна. Цахилгаан, ус, дулааны байгууллагууд зөвшөөрөл өгч болмооргүй газарт техникийн нөхцөл олгосон байвал дээрх шиг арга хэмжээ авна. Хариуцлагын асуудлыг боловсронгуй болгож чангатгасан гэсэн үг л дээ. 
-Өнөөдрийн /өчигдөр/ тэргүүлэгчдийн хурлаар журам батлах тухай тогтоолын төсөл тань яагаад батлагдсангүй вэ? 
-Ер нь, барилга угсралтын ажил эхлэхээс өмнө эцэслэн боловсруулж, батлуулах шаардлагатай байгаа. Журам батлагдтал барилга угсралтын үйл ажиллагаа эхлүүлэх зөвшөөрлийг түр хугацаанд зогсоосон. НИТХ-ын тэргүүлэгчид энэхүү асуудлыг нийслэлийн нутаг дэвсгэрт нийтээр дагаж мөрдөх томоохон журам учраас нэгдсэн хуралдаанаар хэлэлцүүлэн батлах нь зүйтэй гэж санал нэгдсэн. Энэ сарын 10-ны пүрэв гарагт болох НИТХ-ын ээлжит бус хурлаар журам батлах тухай төслөө оруулна.