Яам бодлогоо огт хэрэгжүүлэхгүй байна
“Хар чонот” ХХК-ийн захирал Д.Баянцагаантай ярилцлаа.
- Таны бодлоор өнгөрсөн онд барилгын салбарт дорвитой шинэчлэл хийгдсэн үү?
Өнгөрсөн онд ямар ч шинэчлэл хийгдээгүй. Бизнесийн байгууллагуудыг хавчиж шахаж бараг уналтанд оруулсан жил болж өнгөрлөө.
- Шинэчлэл хэрэгтэй гэж ярьж байгаа ч яг юуг нь яаж шинэчлэх шаардлагатай талаар тодруулж яриач?
Шат дамжлагыг цөөрүүлж, хүнд суртлыг халах хэрэгтэй. Барилгын инженер техникийн ажилтнуудын мэргэжил дээшлүүлэх, тусгай зөвшөөрөл олгох зэрэг бүх асуудлыг салбарын яам, агентлаг (БХТөв) өөр дээрээ төвлөрүүлэх ямар ч шаардлагагүй. Яам бодлогоо огт хэрэгжүүлэхгүй байна. Норм стандарт, төсвийн үнэ үнэлгээгээ цэгцэлж олон улсын стандарт руу ойртуулах хэрэгтэй. Хийх ажлаа мэдэхгүй, юу ч хийхгүй байна. 2012, 2013 онд төсөвт мөрдөх материалын үнийн жагсаалт (ценник), үнийн өсөлтийн индекс ч гараагүй байна. 2012 онд шинэчилсэн барилгын өртгийн үндсэн дүрмээ хэрэгжүүлж мөрдүүлэхталаар юу ч хийхгүй байна.
- Төрийн зарим чиг үүргийг мэргэжлийн ТББ-аар гүйцэтгүүлэх тухай салбарын сайд ажлаа анх авсан үеэсээ л амласан. Гэвч энэ ажил урагшлахгүй байгаа нь юутай холбоотой вэ?
Яам үндсэн ажлаа хийхгүй мөртлөө төрийн бус байгууллагуудын хийх ажлыг шүүрэн авч авилгалыг цэцэглүүлсээр байна.
- Тусгай зөвшөөрлийг төрийн байгууллага гаргадаг байтал яагаад тусгай зөвшөөрөл гаргаж өгнө, зарна гэсэн зар яваад байна вэ? Энэ юутай холбоотой вэ?
Энэ бол зөвхөн авилгал, илүү эрх мэдэл эдлэх гэсэн хуучирсан арга барилтай холбоотой.
- Барилгын салбарт зөвлөх үйлчилгээг нэвтрүүлсний ач холбогдол нь юу байх вэ?
Энэ маш их ач холбогдолтой. Захиалагч мэргэжлийн хяналтын байгууллагад бүх мэргэжлийн хүн байх боломжгүй. Иймд өндөр мэргэжлийн хүмүүстэй гэрээ байгуулж зөвлөх үйлчилгээгээр хийлгэх нь зайлшгүй. Барилгын төсвийн шинэ дүрэмд эx үүсвэрийг нь гаргаж өгсөн боловч юу ч мэдэхгүй хүмүүсийн шахалт матаасаар хүчингүй болгох гэж байгаа сурагтай.
- Барилгын салбарыг зөв голдрилоор хөгжүүлэхийн тулд мэргэжлийн ТББ-уудын зүгээс ямар ажлыг зохион байгуулж байна вэ? Цаашид ямар арга хэмжээ авах шаардлагатай вэ?
Мэргэжлийн төрийн бус байгууллагын үүрэг, зорилтыг барилгын шинэ хуулийн төсөлд тусгайлан оруулах хэрэгтэй. Энэ олон эзэнгүй хариуцлагагүй төсөвчдийг эзэнтэй болгож мэргэжлийн байгууллага болгох асуудлыг хуульчилж өгөх шаардлагатай.