Орон сууцны үнэд ипотек нөлөөлөөгүй

Орон сууцны үнэд ипотек нөлөөлөөгүй

Засгийн газрын санал авах 11-11 төвд барилга, орон сууцны талаар ирүүлсэн санал шүүмжлэлд Барилга хот байгуулалтын яам хэрхэн хариулсныг сонирхуулж байна.

Иргэн:- Буянт ухаа хорооллын орон сууцны үнийг хэвлэл мэдээллээр ярихдаа 950 мянган төгрөг гээд барилгын компани дээр очоод уулзахаар 1,500,000 төгрөг гээд байх юм. Энэ ямар учиртай вэ?

БХБЯам:- Үндэсний бүтээн байгуулалтын корпораци, OCCK-ийн барьж байгаа Буянт-Ухаа дахь орон сууцнуудыг 950 мянгаас 1 сая төгрөгөөр зарах чиглэл барьж байгаа.

Иргэн:- Ипотекийн зээл батлагдсанаас хойш байрны үнэ их нэмэгдсэн. Мөн одоо 8 хувийн хүүтэй зээлийн санхүүжилт нь дуусна гэсэн яриа гараад байна. Энэ үнэн үү? Энэ асуудлаар иргэдэд бодитой мэдээлэл өгөх хэрэгтэй байна. Хариу өгнө үү.

БХБЯам:-Ипотекийн зээл батлагдсанаар байрны үнэ нэмэгдэх ёсгүй. Яагаад гэвэл үнийг нэмэгдүүлэхгүй байх тал дээр тус яам, Монголбанк хамтран барилгын түүхий эд болох цемент арматур үйлдвэрлэгч болон импортлогчдод, мөн дуусаагүй барилгуудад хөнгөлөлттэй зээл олгосон. Тиймээс хэрвээ үндэслэлгүйгээр үнээ нэмсэн бол зээл олгосон гэрээгээ цуцлах, дахин тус компанид улсаас явуулж байгаа хөнгөлөлттэй зээл болон бусад хөтөлбөрт хамруулахгүй байх арга хэмжээг авч ажиллахаар Ерөнхий сайд болон холбогдох байгууллагын удирдлагууд мэдэгдсэн байгаа. Мөн үндэслэлгүй үнээ нэмсэн бол ШӨХТГ давхар хяналтаа тавин ажиллаж байгаа. Энэхүү хөнгөлөлттэй зээл Засгийн газар ямар нам байх, Ерөнхий сайд нь хэн байх, мөн Монголбанкны ерөнхийлөгч, Барилга хот байгуулалтын сайд нь хэн байх, ямар намын хүн байхаас үл хамааран тогтмол үргэлжилж иргэдийг орон сууцжуулах үндэсний хөтөлбөр юм. Иргэд байнгын ажил орлоготой л бол нийгмийн даатгалын шимтгэлээ төлж, нийгмийн даатгалын санд мөнгөн хуримтлал үүсч байгаа нөхцөлд Монголбанк тодорхой зохицуулалтыг хийж энэхүү хөтөлбөр тогтмол үргэлжлэх юм. Иймээс энэхүү зээл дуусахгүй гэдгийг уламжилж байна.

Иргэн:- Эко констракшны Голден Парк- 2 хотхоныг улсын комисс хүлээн авсан акт нь жилийн өмнө гарсан. Гэтэл одоо хүртэл байрны ордер, гэрчилгээ нь гараагүй байна. Энэ талаар арга хэмжээ авч өгнө үү. Учир нь 8 хувийн хүүтэй зээлд хамрагдах гээд хүлээгээд байгаа хүмүүс маш их байна. Хариу өгнө үү

БХБЯам:- Улсын комисс ажилласан л бол улсын комисс хүлээж авсан гэсэн үг биш юм. Улсын комиссын гишүүд мэргэжил мэргэжил мэргэжлийнхээ хүрээнд шалгалт хийгээд шаардлага хангасан гэж үзвэл барилгыг хүлээн авах шийдвэр гаргадаг. Зарим нэг зүйлийг засаж янзлах, мөн угсралтын норм дүрмийн хангаагүй байна гэж үзвэл тэдгээрийг тодорхой хугацаанд норм стандартыг хангуулахаар үүрэг даалгавар өгдөг. Хэрэв энэ үүрэг даалгаврыг өгсөн хугацаанд биелүүлсэн бол гарын үсгээр баталгаажуулан улсын комисс хүлээн авдаг бөгөөд тус барилгыг ашиглах боломжтой гэсэн комиссын дүгнэлт гарган дугаар олгодог. Үүний дараа та бүхэн улсын комиссын дүгнэлтийг авч үл хөдлөх хөрөнгийн эрхийн бүртгэлийн газарт хандаж гэрчилгээгээ авна. Тэгэхээр Голден парк хорооллын гүйцэтгэгч компани улсын комиссоос өгсөн үүрэг даалгаврыг биелүүлээгүй, эсвэл өөр ямар нэгэн зөрчилтэй асуудал байгаа учир та бүхэн ордероо авч чадахгүй байгаа гэсэн үг. Тиймээс та бүхэн энэ талаар тухайн гүйцэтгэгч болох захиалагч аж ахуйн нэгжид шаардлага тавьж хурдан хугацаанд ордероо авах хүсэлтээ илэрхийлэх, эсвэл барилгыг ашиглалтанд хүлээн авсан дүгнэлт гарсан бол өөрсдөө тус дүгнэлтийг авч очоод ордероо гаргуулах боломжтой. Улсын комисс хүлээж авсан хэрнээ ордер нь гарахгүй байгаа бол энэ нь тус компаний хариуцлагагүй асуудал юм.

Иргэн:- 80 мв2 хүртэл талбайтай орон сууцанд зээл олгож байгаа. 80 мв2-аас дээш хэмжээтэй байр худалдаж авч байгаа хүмүүсийг 0,8 %-ийн зээлдхамруулж өгөөчээ.

БХБЯам:- Сайн байна уу. Таны ирүүлсэн саналтай танилцлаа. Журманд өөрчлөлт оруулах тохиолдолд харгалзан үзэх болно. Баярлалаа.

Иргэн:- Байрны үнэ хэтэрхий өндөр болчихлоо. ЗГ-аас гаргасан журам хэрэгжиж эхлээд улам өндөр үнэтэй болж байна.Энэ асуудал дээр арга хэмжээ авахгүй бол үр хүүхэддээ байр авч өгч чадахгүй байна.

БХБЯам:- Сайн байна уу. Таны ирүүлсэн саналтай танилцлаа. Байрны үнийг бууруулах чиглэлээр Засгийн газраас тодорхой ажлуудыг зохион байгуулж байна. Үнэ нэмэх нь үндэслэлгүй тул ШӨХТГ-т хандана уу. Баярлалаа.

Иргэн:- Барилгын материал өөрсдөө маш их хийж байгаа гэвч Хятадаас барилгын материал их оруулах юмаа үүнийг больвол яасан юм бэ? Үндэснийхээ үйлдвэрүүдийг дэмжих хэрэгтэй байна.

БХБЯам:- Сайн байна уу таны ирүүлсэн саналтай танилцлаа. Засгийн газрын 2012 оны 171 дүгээр тогтоолоор барилгын материалын үндэсний үйлдвэрлэлийг дэмжих бодлого барьж ажиллаж байна. Энэ бодлогын хүрээнд олон төсөл хөтөлбөрийг хэрэгжүүлсний үр дүнд хятадаас оруулж ирэх материалын тоо хэмжээ тодорхой хэмжээгээр буурна гэж ойлгож болно. Баярлалаа.

Эх сурвалж: цоом

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.