“Төмөр бетоны долоо хоног - 2013 аян” амжилттай болж өндөрлөв

“Төмөр бетоны долоо хоног - 2013 аян” амжилттай болж өндөрлөв

 2013 оны 4 сарын 1-4-ний өдрүүдэд ШУТИС-ийн БИАС-ийн оюутнууд “Төмөр бетон бүтээц” хичээлээр олж авсан мэдлэгээ батжуулах, онол практикийг хослуулах, багаар ажиллах чадвараа хөгжүүлэх зорилгоор “Төмөр бетоны долоо хоног” аяныг амжилттай зохион байгуулагдлаа. Энэхүү аянд нийт 19 баг буюу 95 оюутан оролцсон юм. Онол, практикийг хослуулсан аян нь эрдэм шинжилгээний бага хурал, төмөр бетон дам нурууг төсөвлөн тооцож, арматурыг зангидан, бетон цутгаж, бэхжүүлэн турших болон ханын илтгэл тавих гэсэн 3 үе шаттай байв. Энэ жилийн тэмцээнийг салбарынхаа мэргэжлийн боловсон хүчин бэлтгэх, тэднийг чадваржуулах ажилд нэгдсэн бодлоготойгоор оролцдог “Премиум Конкрит” ХХК энэхүү аяныг ивээн тэтгэж оролцсоноор тэмцээний цар хүрээг илүү өргөн, ач холбогдолтой болгосон юм. Аяны хүрээнд зохиогдсон тэмцээний үр өгөөж, ивээн тэтгэгч байгууллагуудын оролцоо нь бусад барилгын сургуулиудын оюутнуудын сонирхлыг ихэд татсан бөгөөд ирэх жилийн тэмцээндээ бусад сургуулиудыг татан оролцуулахыг зохион байгуулагчдаас хүссэн юм. Аяны хүрээнд зохиогдсон 3 үе шаттай тэмцээний шүүгчээр МБИХ-ны гүйцэтгэх захирал Б.Гантөмөр, БИАС-ийн БШЗТА багийн ахлах багш Б.Эрдэнэболд, “Ган харш” ХХК-ны ерөнхий инженер Д.Адъяадорж, “Премиум Конкрит” ХХК-ийн Ерөнхий технологич С.Очирбат, Барилгын конструкцийн багийн багш Гэрэлтцолмон нар шүүн, БИАС-ийн профессор Я.Дүйнхэржав, багш М.Сугар, багш Д.Энхгэрэл нар хөтлөн явуулсан юм. Тэмцээний шүүгчдийн бүрэлдэхүүнд онолын мэдлэг олгогч багш нар болон мэргэшсэн инженерүүд байсан нь энэ жилийн тэмцээнийг илүү онцлогтой болгосон юм. Учир нь тэд оюутнуудад бүтээгдэхүүн үйлдвэрлэлд тулгардаг асуудлаар практик зөвлөгөө өгсөнд тэмцээний бас нэгэн үнэ цэнэ оршиж байлаа. Барилгын Инженер Архитектурын Сургуулийн Барилгын бүтээцийн профессорын багтай хамтран зохион явуулсан энэхүү арга хэмжээг ивээн тэтгэж хамтран ажилласан “ Премиум конкрит” ХХК-ийн хамт олонд зохион байгуулагчдаас талархал илэрхийлж байгааг энэхүү мэдээллээрээ дамжуулан хүргэхэд таатай байна.

Эх сурвалж:

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.