Ханын цаасыг яаж зөв наах вэ?

Ханын цаасыг яаж зөв наах вэ?

 

      Цавуу, багс, өнхрүүштэй нөхөрлөх нь тийм ч хүнд ажил биш ч хүн бүхэн барилгын засал чимэглэл хийх ур дүй эзэмшээгүй байдаг. Шинэхэн ажилд ханцуй шамласан хэн боловч мэргэжлийн олон шаардлага, асуултын тэмдэгтэй тулгардаг. Хэрвээ та анх удаа гэртээ ханын цаас наах гэж байгаа бол бидний дор бэлтгэсэн нарийвчилсан зөвлөгөө таны ажлыг хөнгөвчлөөд зогсохгүй бүх зүйлийг ном ёсоор гүйцэтгэхэд тусална.
   Юуны өмнө бүх ажил ханын гадаргууг бэлтгэхээс эхэлнэ. Бэлтгэл хэрхэн хангагдсанаас засал чимэглэлийн эцсийн чанар шалтгаална. Хана хуурай, тэгш, бат бэх, хатуу байх ёстой. Хананд шингэн уусах, наалдах чадварыг тогтоохын тулд эхлээд шалгалт өгөхийн өмнө “ноорог”цаасан дээр туршиж үздэг шиг л бяцхан сорил явуулна. Маш амархан. Хананы багахан хэсгийг норгож үз. Ингэхэд ус хөөсөрч байвал хананы шингэн уусгах чадвар гологдож байна гэсэн үг. Өөрөөр хэлбэл, хананы цаас хананд барьцалдахгүй амархан хөндийрөхийн дохио юм. Байдлыг засахын тулд ханыг эхлээд ханын тусгай цаас, сонин, хэвлэлийн гологдол цаас гэх мэт техникийн цаасаар цавуудна. Хэрвээ ус амархан шингэвэл хар толбо гарч ирнэ. Их хүчтэй шингээгч бодис хэрэглэвэл ханын цаас заадсаараа дэлбэ үсэрч мэднэ. Эрхий хуруугаараа хананд хүчтэй дарахад үл ялиг хээ үлдвэл хана шингэц муутай байна гэсэн үг. Суурийг бат бэх болгохын тулд шингэц сайтай бодис хэрэглэнэ.
   Цавууг хутгахдаа гадна талдаа хэмжээстэй тунгалаг хувин ашиглах хэрэгтэй. Цавууг хайрцган дээрх зааврын дагуу бэлтгэнэ. Тасалгааны температурт тусгайлан бэлтгэсэн усан дээр цавуугаа хийж цахилгаан дрелиэр уустал нь тасралтгүй хутгана. Цавууны уусмалыг хөөж тэлтэл нь хэсэг хугацаагаар орхино.
    Цавууг ингэж цаг орчим байлгасны дараа хананы цааснаас хэрчим авч түрхэж үзнэ. Ер нь хананы цаасаа зүсэхийн тулд хэмжээстэй ширээ ашиглана.
    Зүсэлт хийхдээ нямбай хандахаас гадна ган шугам, цаасны хутга ашиглана. Ингэхдээ боодол цааснаас шаардлагатай хэсгээ өргөн иртэй цаасны хутгаар зүснэ.
   Нэг хананд шаардагдах цаасаа зүсч авсны дараа ширээн дээр доош нь харуулж тавина. Хананы цаасыг ингэж бэлтгэсний дараа багсаа цавуунд дүрж цаасны чанх голоос үзүүр хүртэл эн тэнцүү хэмжээгээр түрхэнэ. Зарим хэсэгт нь зузаан, заримд нь нимгэн түрхэж болохгүй.
     Цавуу түрхсэн ханын цаасаа үзүүрээс нь дээш 2:1 харьцаагаар хянамгай гэгч нь эвхэнэ. Цавууг ханын цаасны нүүрэн тал руу урсгаж огтхон ч болохгүй. Эвхсэн цаасаа мөн харьцаагаар дахин нугална. Гэхдээ чанга нугалахгүй.
    Цавуу түрхсэний дараа ханын цаасыг 3-4 ширхгээр нь хуйлж дэвтэх боломж олгосноор уян зөөлөн болно.
   Цавуудсан ханын цаасаа наахын өмнө харандаа эсвэл лазер хэмжигчээр хананы эгц хажуу талд нь тэмдэглэгээ хийнэ. Эвхэж тавьсан цаасаа зүүн гаран дээрээ тохож тавин баруун гараараа дээд давхаргаас нь эрхлэн аяархан хуулна.
    За ингээд эхний зурвас хэсгээ хананд нааж байна. Энэ ажил цонхны ойролцоох өнцгөөс эхэлнэ. Дараа нь ханын цаасаа резинэн голтой булд эсвэл ханын цаас наах зориулалттай сойзоор толийлгож тэнийлгэнэ. Ийм багажийг дундаас нь хоёр үзүүр рүү өнхрүүлнэ.
   Эхний цаасаа хананд 1-2 см-ийн зайд тулгаж наана. Ингэхдээ нугарсан хэсгийг амархан наалдуулахын тулд цаасны ирмэгт бяцхан хөндлөн зүсэлт хийж, дараагийн цаасыг наахад хялбар болгоно.
Хоёр дахь хэсгийг наахдаа ханын цаасны хээ, зураг, зураас давхцаж, ямар ч өөгүй харагдахаар байлгана. Цаасны заадлыг резинэн булаар толийтол нь өнхрүүлнэ.
     Хана, таазны адрын уулзварт илүү гарсан цаасыг хутгаар сайтар мөр гартал зүсч авна.
   Ханын цаасыг уртааш нь хуваах шаардлага гарвал тэг дундуур нь нугална. Цаасны нэг талд тэмдэг тавьсны дараа хайчилна.
Шалны хөвөөнөөс илүү гарсан цаасыг шпателаар дарж байгаад цаасны хутгаар зүсч авна.
   Ханын цааснаас маш нарийхан хэсэг хэрэгтэй бол ширээн дээр цаасаа дэлгэж шугам тавьсны дагуу хурц иртэй хутгаар зүснэ.
    Цонхны хоёр хажуу талыг обойдохгүй байж болно. Хэрвээ та хүсвэл цаас нааж ч болох юм. Гэхдээ 1-1.5 см-ийн зай аван цаасаа наана. Ингэхдээ ширээн дээр цонхны хажуу талтай тэнцэх хэмжээний цаасыг огтлон авч, цаасны ард талд цавуугаа нимгэн түрхэнэ. Тэгээд гараараа нямбай гэгч нь толийлгон илнэ.
    Цонхны дээд талын хөндлөн налууг дагуулан ханын цаасыг өнхрүүшийн тусламжтайгаар наана. Энэ өнхрүүш нь өмнө нь хэрэглэж байснаас арай урт байна.
    Хаалганы дээд талд тохирох хэмжээний цаас зүсч, хана, хүрээ мод хоёрын дунд зааг гаргалгүйгээр сайн тэнийлгэж наана.
    Цонхны тавцан орчмын хананд цаас наахад нэлээд анхаарал шаардана. Эхлээд тавцангийн хананаас түрж гарсан хөндлөн хэсгийн хэмжээнд тохируулан цаасыг өөлж авсны дараа эгц дээш нь хайчилна.
Халаах хэрэгсэл буюу паар, цонхны тавцан хоорондын зайг юуны өмнө хэмжинэ. Боодол цааснаас хэрэгтэй хэмжээний цаас авахын тулд ширээн дээр зүсэх эсвэл шалан дээр тавьж байгаад зүснэ. Цаасыг цавуудсаны дараа тэг дундуур нь хуваана.
     Цаасны үзүүр хэсгийг цагаан даавуугаар бэхэлнэ. Цаасыг паарны араар оруулна. Туялзуур бариултай будгийн өнхрүүшээр цаасыг тэнийлгэнэ.
   Унтраалга, розетка орчмын ханыг цавуудахын өмнө цахилгааныг салгасан нь илүү найдвартай. Унтраалгыг ил гаргахын тулд тэр орчмын цаасыг тоонолжин хээ гарган хайчилна.
     Тоолуурын мөн ил гаргахын тулд хананд ямар ч хөдөлгөөнгүй бэхлэн урьдын адил цаасыг тоонолжин хээ гарган хайчилна. Цавуу хатсаны дараа гурвалжингуудыг өөгүй хайчилж хаяна.
   Ханын цаас наасны дараа зарим газар хөндийрч товойж харагддаг. Тариурт цавуу соруулж тэрхүү хөндий хэсэгт шахна. Хөндий цавуугаар дүүрэнгүүт гадна талаас нь гараараа нямбай гэгч нь илж наалдуулна.

 

 

Эх сурвалж:

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.