Монголын барилгачдын холбоо, Шударга өрсөлдөөн хэрэглэгчдийн төлөөх газар, Сангийн яам, ЗТБХБЯ, МҮЭ зэрэг байгууллагуудын төлөөлөл оролцож орон сууцны үнийн хөөрөгдлийн талаар Засгийн газарт 3 дугаар сард танилцуулна. Харин 4 дүгээр сард Засгийн газар орон сууцны нэг метр квадратад мөрдөгдөх жишиг үнэ тогтоох аж.
Бага дунд орлоготой айл иргэд, залуу гэр бүл орон сууцанд орно гэдэг мөрөөдөл болоод байна. Учир нь орон сууцны метр квадратын үнэ 1300-1600 ам.долларын хооронд хэлбэлзэж байна. Зах зээлд шударга бус үнийг дур мэдэн тогтоосон барилгын компаниудын үнийг бууруулах ажлын хэсэг гарчээ.
Орон сууцны үнийн зохицуулал¬тад төр оролцохгүй бол шударга бус зах зээлийн тогтолцоо ноёрхож байна. Засгийн газар иргэдээ орон сууцанд оруулахаар хэлэлцэж төлөвлөөд байхад энэ их эрэлт дээр дөрөөлөн барилгын хөрөнгө оруулагчид үнээ хэт хөөрөгдөн 3-4 дахин нугалан ашиг олж байгаа юм. Хувийн хэвшлийнхэн өөрийн бизнестээ төр оролцуулах тун дургүй. Гэтэл төр зохицуулалт хийхгүй болохоор тэд хувиа бодон хэд дахин ашигтай ажиллаж байна. Хэр таарсан боломжийн амьдрал ахуйтай айл өрх аль хэдийнэ орон сууцаа худалдаад авчихсан, харин одоо гэр хороололд амьдардаг, эсвэл айлын хажуу өрөө хөлсөлдөг залуу гэр бүлийг яаж тэдний өрхийн орлогод нийцсэн орон сууцанд оруулах вэ гэсэн асуудал тулгараад байна.
Барилгын зах зээлд тогтоосон үнэ үгсэн хуйвалдсан нь их байдаг. Хэрвээ ийм жишгээр явсаар байвал айл өрхөө орон сууцжуулж, хотын утаа арилгах стратегийн зорилго биелэхгүйд хүрнэ. Харин зах зээлд шударга бус үнэ тогтоосон өнөөдрийн байдал нь ямар шалтгаантайг судлаж бодит үнийг энэ салбарт тогтоохоор ажлын хэсэг гарч ажиллахаар болжээ.
С.Өлзиймаа