Монгол Улсын Засгийн газраас хэрэгжүүлж буй “100 мянган айлын орон сууц” төсөл. 14-р хорооллын тухай.

Монгол Улсын Засгийн газраас хэрэгжүүлж буй “100 мянган айлын орон сууц” төсөл. 14-р хорооллын тухай.

ОРОН СУУЦНЫ XIV ХОРООЛЛЫН
ТОВЧ ТАНИЛЦУУЛГА

Орон сууцны XIV хороолол нь Баянзүрх дүүргийн 13, 14 дүгээр хорооны нутаг дэвсгэрт 235.0 га талбайд төлөвлөгдсөн. Тус хорооллын хэсэгчилсэн ерөнхий төлөвлөгөөг боловсруулж байх үед  1459 өрхийн 5.5 мянган хүн оршин сууж байсан бол өнөөдрийн байдлаар нийтдээ 4462 өрхийн 17956 хүн амьдарч байна.

НИТХТ-ийн 2007 оны 05 дугаар сарын 09-ний  84 дүгээр тогтоолоор батлагдсан хэсэгчилсэн ерөнхий төлөвлөгөөний дагуу  төлөвлөлтийн хугацаанд (2020 онд) 15000 айлын орон сууц баригдаж, 65 мянган хүн оршин сууж, 7800 сурагчтай сургууль, 3700 хүүхдийн цэцэрлэг, өдөрт 2175 хүн үзэх өрхийн эмнэлэг, 1200 ажлын байр бүхий оффисын барилга, 4000 орчим хүн ажиллах соёл, ахуй үйлчилгээний барилга байгууламжууд баригдана.

Монгол Улсын Засгийн газраас хэрэгжүүлж буй “100 мянган айлын орон сууц” төслийн  “Гэр хорооллыг орон сууцны хороолол болгон хөгжүүлэх” чиглэлийн  хүрээнд:

Тус хороололд 7500 айлын орон сууцыг барихаар төлөвлөв.

Нийгмийн дэд бүтцийн дараахь барилга байгууламжууд баригдана. Үүнд:

    • 7560 хүүхдийн сургууль,
    • 1890 хүүхдийн цэцэрлэг,
    • 570 суралцагчидтай МСҮТ,
    • өдөрт 1105 үзлэг хийх хүчин чадалтай өрхийн эмнэлэг,
    • 7250 м2 үйлчилгээний талбай бүхий, 480 ажлын байртай худалдаа, үйлчилгээний төв,
    • 1040 суудалтай соёлын төв,
    • 1575 м2 талбай бүхий спорт цогцолборыг тус тус барихаар төлөвлөж байна.

Инженерийн дэд бүтцийн дараахь барилга байгууламж, шугам сүлжээнүүд баригдана. Үүнд:
Дулаан хангамж:
Тус хорооллын дулааны ачаалал 105.6 Гкал/цаг бөгөөд хороололд баригдах барилгуудыг ф200-700 мм-ийн голч бүхий 3.4 км урт шугам барьж, төвлөрсөн дулаан хангамжийн системээс хангана.

Ус хангамж, ариутгах татуурга:
Төлөвлөгдөж байгаа барилгуудад нийт 15177 м3/хоног цэвэр ус шаардагдах бөгөөд ф100-300 мм-ийн голч бүхий 3.7 км урт цэвэр усны шугам, 3.6 км урт ариутгах татуургын шугам барьж, хотын төвлөрсөн шугаманд холбоно.

Цахилгаан хангамж:
Цахилгааны ачаалал 32.6 мВт байх бөгөөд 35 кВ-ын “Дорнод-2” дэд өртөөг өргөтгөж, 28 км цахилгаан дамжуулах шугам, 1 хуваарилах байгууламж, 8 дэд өртөөг барьж, цахилгаан эрчим хүчээр хангана.

 

Авто зам:
4.52 км урт хотын чанартай авто зам, 8.78 км урт хорооллын төв замыг барина.

Хэрэгжилтийн байдал:
Зам тээвэр, барилга, хот байгуулалтын яамнаас хэсэгчилсэн ерөнхий төлөвлөгөөг хэрэгжүүлэхэд шаардагдах хөрөнгийн эх үүсвэрийг шийдвэрлэн, хэрэгжилтийг зохион байгуулан ажлын хэсэг болон төслийн нэгж байгуулан ажиллаж байна. Одоогоор ерөнхий хөрөнгө оруулагч болох Тайван-Монголын хамтарсан “Кей энд Ти” ХХК болон "Бэрэн констракшн" ХХК, "Эрхэс" ХХК нь иргэдийн газрыг орон сууцаар солих болон зах зээлийн үнээр худалдан авах замаар чөлөөлж, хэсэгчилсэн ерөнхий төлөвлөгөөний дагуу 790 айлын орон сууц баригдаж дуусч байна.
Зам тээвэр, барилга, хот байгуулалтын Сайдын багцад 2008-2010 онд Монгол Улсыг хөгжүүлэх сангийн хөрөнгөөр хэрэгжүүлэх төсөл, арга хэмжээний жагсаалтад орсон орон сууцны XIV  хорооллын VI хэсгийн дулаан, цэвэр, бохир усны шугам, өргөлтийн насос станц барих эхний ээлжийн ажлыг “ЧММ” ХХК гүйцэтгэж байгаа бөгөөд уг ажлын 2-р ээлж, цахилгааны хуваарилах байгууламжийн тоног төхөөрөмжийг угсрах ажлын тендер зарлагдаад байна. Энэ ажил 2010 онд дуусна. 2009 оны 05 дугаар сарын 24-ний өдөр 92/07 тоот техникийн нөхцөл олгогдсон. Цэвэр усыг ф500 мм-ийн голч бүхий шугамаас холбох, барилгын дор усан сан төлөвлөж, өргөлтийн насосоор дээд давхарт түгээх, золы систем буюу дундын усан санг төлөвлөх, төв цэвэрлэх байгууламжийн хүчин чадлыг нэмэгдүүлэх зэрэг өргөтгөлийн ажлыг хийж гүйцэтгэх шаардлагатай бөгөөд 2 ширхэг тунгаагаарыг нэмж төлөвлөн гарах зардлыг төсөвт тусгуулах хэрэгтэй.

Дулааны 1а, б магистралийг өргөтгөж газар доогуур угсрах ажил хийгдэж дууссан. Одоогоор 12 дугаар магистралыг өргөтгөх ажлыг “Набсан” ХХК гүйцэтгэж байна.

ЗТБХБЯ-ны захиалгаар  Зүүн Сэлбэ, 14-р хорооллыг  цахилгаан эрчим хүчээр хангах 110кВ-ын цахилгаан дамжуулах агаарын шугам, 110/35/10кВ-ын дэд өртөө, Улаанбаатар 220/110/35 кВ-ын дэд станцын 110кВ-ын ил хуваарилах байгууламжийн өргөтгөлийн зураг төсвийг батлуулахаар Эрдэс баялаг, эрчим хүчний яаманд хүлээлгэж өгсөн.

“100 мянган айлын орон сууц” төслийн хүрээнд баригдах орон сууцны XIV хорооллын:

Нийт хөрөнгө оруулалт: 1066.06 тэрбум төгрөг.
Үүнээс:
Орон сууцанд        1035.68 тэрбум төгрөг;       
Нийгмийн дэд бүтцэд 19.17тэрбум төгрөг;
Инженерийн дэд бүтцэд 11.21 тэрбум төгрөг шаардагдах урьдчилсан тооцоо гарч байна.

Холбоотой мэдээ