Төрийн албан хаагчдыг орон сууцжуулах төслийн хүрээнд эхний ээлжинд 4200 айлыг орон сууцжуулахаар ОССК ажиллаж байгаа. Монголд анх удаа гэж болохоор дээрх ажлыг энэ оны зургадугаар сард дуусгавар болно гэсэн яриа иргэдийн дунд тугж, байраа авч амжаагүй төрийн албан хаагчид түгшиж эхэлсэн. Энэ талаар ОССК-ийн дэд захирал Л.Одхүүгээс тодрууллаа.
-Орон сууцжуулах төслийн хэрэгжилт ямар байгаа, одоогоор хичнээн өрх байрандаа ороод байгаа талаар тодруулаач?
-Төслийг аль болох хурдан хугацаанд хэрэгжүүлж, богино хугацаанд хурдан шуурхай дуусгахаар ажиллаж байна. Өнөөдрийн байдлаар 2700 гаруй хүний зээл шийдэгдчихээд байгаа. Хурлаар ороод орлогынх нь байдалд тохируулж шийдэж байгаа. Одоогоор2300 гаруй өрхөд эцэслэн зээл олгосон. Үлдсэн нь хүлээгдэж байна. Хүлээгдэж байгаа хүмүүсийн хувьд үл хөдлөх хөрөнгийн гэрчилгээгээ авч бүртгүүлэх, нэр дээрээ шилжүүлэх гээд олон шалтгаан бий. Манай зүгээс гэвэл дараагийн санхүүжилт хараахан орж ирээгүй байна. Өнгөрсөн онд 80 тэрбум төгрөгийн зээл олгосон, энэ онд 72 тэрбумыг өгөхөөр яригдаж байгаа. -Иргэдээс ирсэн зээлийн материалыг ямар хугацаанд шийдвэрлэдэг юм бэ. Удаад байна гэх гомдол сонсогддог юм байна билээ?
-Засгийн газрын зүгээс орон сууцжуулах төслийг хурдан хугацаанд түргэн шуурхай шийдвэрлэхийг үүрэг болгосон. Бид ч аль болох олон хүнд зээл олгохыг бодож асуудалд харьцангуй уян хатан хандаж байгаа. Ташрамд өгүүлэхэд иргэн та өөрөө орон сууцаа сонгох эрхтэй. Улсын комисс хүлээн авсан л бол Монгол Улсын нутаг дэвсгэр дээрээс хаанаас ч хэдэн өрөө байр авах эрх нь нээлттэй гэсэн үг шүү дээ.
-Төрийн албан хаагчдын зээлийн эргэн төлөлт ямар байна вэ? -Зээлийн эргэн төлөлт хэвийн явагдаж байна. Зарим нэг шалтгаанаар, тухайлбал томилолтоор явсан ч гэх юм уу хоцрох тохиолдол гарсан ч харилцан ойлголцсоны үндсэн дээр төлөлт хийгдэж байгаа. Хэрэгжүүлж байгаа төслийн маань зорилго банкны бодлогын тогтолцоогоор яваагүй гэдэг утгаараа бид эргэн төлөлтөө хариуцах болохоор уян хатан байх бодлогыг барьж ажиллаж байна. -Байгууллагаасаа квот авсан ч материалаа бүрдүүлж зээлд хамрагдахгүй удвал эрх нь хэвээрээ байх уу, эсвэл хүчингүй болох уу. Ямар журмаар ажиллаж байгаа вэ?
-Зээлээ авахгүй удвал бид тухайн байгууллагад нь хандан тодруулж, тухайн хүн байр шаардлагагүй гэж үзвэл эрхийг өөр хүнд шилжүүлэх гэхчлэн асуудлыг аль болох хурдацтай шийдвэрлэхийг хичээн ажиллаж байна.
-Ирэх зургадугаар сард танай үйл ажиллагаа зогсоно гэх яриа бий. Үлдэж буй хугацаанд төлөвлөснөөрөө зээл олгож, төрийн албан хаагчдыг орон сууцжуулж амжих болов уу?
-Эхний төслөө товлосон хугацаандаа дуусгаж, дараагийн ажлаа эхлүүлэх зорилгоор хугацаа тогтоосон. Хөрөнгө оруулалт шийдэгдчихвэл дараагийн ажил эхэлнэ. Эх сурвалж: “Улаанбаатар таймс”