Барилга МН
Үнэлгээ
Нүүр
Үйлчилгээ
Холбоо барих
Танилцуулга татах
Барилга МН
Танилцуулга татах
Зурвас бичих
Messenger
Залгах
Нүүр
Мэдээ, мэдээлэл
Barilga
2019-11-05
Л.Одхүү: “10.000 орон сууц” ч гэх юм уу дараагийн хөтөлбөрийн тухайд ид яригдаж байна
ОССК-ийн дэд захирал Л.Одхүүтэй уулзаж, “4000 орон сууц” хөтөлбөрийн талаар ярилцлаа.
-
”4000 айлын орон сууц” хөтөлбөр энэ жилд хэрэгжээд дуусах ёстой. Хөтөлбөр амжилттай хэрэгжиж, бас орон сууцны эрэлт их байгаа учраас 10.000 айл болгож үргэлжлүүлнэ гэсэн яриа бий?
-Өнгөрсөн жил Засгийн газраас энэ хөтөлбөрт зориулж 80 тэрбум төгрөг төсөвлөсөн. Бид энэхүү эх үүсвэрийг зээл болгож олгоод дуусч байна. Өнөөдрийг хүртэл манай Зээлийн хороо 2600 орчим хүнд зээл өгөхөөр шийдвэрлэжээ. Хөтөлбөр хэрэгжээд дуусахад 4200 хүн орон сууцтай болно, нийт 152 тэрбум төгрөг зарцуулна гэж төр шийдвэрлэсэн юм. Үлдсэн 72 тэрбум төгрөгийг өмнөх 80 тэрбумтай адил зарчмаар шийдвэрлээд удахгүй манайд шилжүүлнэ. Хөтөлбөр маань хэрэгжиж эхлээд амжилттай үргэлжилж байна.
10.000 орон сууц гэдэг ч юм уу дараагийн хөтөлбөрийн тухайд ид яригдаж байна. “4000 айлын орон сууц” хөтөлбөр амжилттай боллоо, үүнтэй адил төсөл хэрэгжүүлье гэдэг дээр олон хүн санаа нийлж дэмжиж байгаа. Ажлын хэсгүүд гарч цаашид яаж, ямар схемээр хийх вэ гэх зэргийг судалж тунгааж байна. Зөвхөн төрийн албан хаагч гэлтгүй хувийн хэвшилд ажиллаж байгаа иргэддээ ч боломж олгоё гэсэн санаа дэвшүүлсэн. Гэхдээ одоогоор яг тэгнэ, ингэнэ гэж тодорхой хэлэхэд арай эртдэнэ. Тогтоол шийдвэр нь гараад, хөрөнгө мөнгө нь шийдэгдсэний дараа ажил эхэлнэ.
-Иргэд энэ төсөл үргэлжилнэ, дараагийнхад нь хамрагдана гэж хүлээж байгаа л даа. Өөрөөр хэлбэл, арилжааны банкны зээлээр авснаас энэ хөтөлбөрт хамрагдсан нь хамаагүй давуу гэдгийг мэдэрчихсэн ?
-Дахиад хэлэхэд хөтөлбөрийг үргэлжлүүлэх нь зүйтэй гэдгийг төрийн шат шатны холбогдох байгууллагууд, олонхи албан тушаалтан, шийдвэр гаргах төвшнийхэн хүлээн зөвшөөрсөн гэж бодож байна. Иргэд маань ч орон сууцжуулах иймэрхүү хөтөлбөрийг дэмждэг. Саяхан “Шинэ бүтээн байгуулалт” хөтөлбөр батлагдлаа. Энэ бүхэн орон сууцжуулах ажил өргөн цар хүрээтэй явагдана гэдгийг харуулж байгаа юм.
-Төслийн зээлийг өнгөрсөн хавраас эхэлж олгосон. Зээлийн эргэн төлөлт ямар байна вэ?
-Бид зээл олгохдоо харьцангуй уян хатан хандсан. Үнэхээр байртай болох юмсан гэсэн чин сэтгэлтэй хүн л энэ төсөлд хамрагдсан учраас манай зүгээс ч өгчих юмсан л гэж хандаж ирсэн. Гэхдээ эргэн төлөгдөх үү, үгүй юү гэдгийг бас харж, судалж байж зээл олгосон. Эргэлзэх хүн ч байсан. Одоогийн байдлаар зээлийн эргэн төлөлт тун дажгүй байна.
-Орон сууцны санхүүжилтийн корпорац “4000 айлын орон сууц” хөтөлбөрөөс гадна “40 мянган орон сууц”гэсэн хөтөлбөр хэрэгжүүлж байсан. Энэ тухайд?
-”40 мянган орон сууц” хөтөлбөр нь зөвхөн ОССК-иар хязгаарлагдахгүй том хөтөлбөр. Манайх энэ хөтөлбөрийн хүрээнд орон нутагт олон барилга барьсан байдаг юм. Нийслэлийн хувьд Нисэхэд дөрвөн барилга барьсан. Барьсан орон сууцнуудаа моргейжид хамруулж борлуулдаг. Зээлийг нь банкууд олгодог. Төслийн хүрээнд ажил нь эхэлсэн боловч хараахан дуусаагүй барилгууд бий. Тэгэхээр бидний хувьд 2011 онд хийх бас нэг ажил маань эдгээр барилгаа дуусгах. Өнгөрсөн баасан гаригт манай ТУЗ хуралдаж, бид 40 мянган айлын орон сууц хөтөлбөрийн хүрээнд хийгдсэн ажлынхаа тайланг тавьсан. Хөтөлбөрийн хүрээнд том, жижиг нийлсэн янз бүрийн 100 гаруй барилга ашиглалтад оруулжээ. Энэ нь нийт барихаар төлөвлөсөн барилгын маань 80 хувь нь. Үлдсэн 20 хувийнх нь барилгын ажил 30-80 хувийн гүйцэтгэлтэй. Төслийн онцлог бол өртгөөр нь орон сууцаа борлуулдагт оршино. Санхүүжилтийн хүү энэ тэрээ тооцоод үнээ тогтоохоос биш ОССК ашиг олохоор үнэ нэмдэггүй гэсэн үг.
-”4000 айлын орон сууц” төсөлд оролцож байгаа барилгын компаниудад танай зүгээс тодорхой шаардлага, шалгуур тавьсан уу. Хэрэглэгчийн сонголт гэдэг утгаар нь энэ асуудлыг орхиж байгаа юу?
-Ер нь, иргэдээс барилгын компаниудад хоёр гол шаардлага тавьдаг нь ойлгомжтой. Чанар, үнэ гэдэг. Чанарын хувьд тухайн орон сууцанд хүн амьдарч болох уу, үгүй юү гэдгийг тогтоодог мэргэжлийн эрх бүхий хүмүүс буюу Улсын комисс шалгаад хүлээгээд авчихсан байхад бид болохгүй гэж дүгнэх үндэслэл муутай. Үнийн тухайд хоёр этгээд хоорондоо тохироод худалдана, худалдаж авна гээд гэрээ байгуулаад ирчихсэн байхад та заавал ийм үнээр авах ёстой гэж болохгүй. Ер нь, хөрөнгө худалдана, худалдаж авна гэдэг цэвэр хоёр хүний л тохиролцооны асуу-дал, иргэний эрх зүйн харилцаа, зах зээлийн амин сүнс. Орон сууцаа тухайн хүн өөрөө насан турш амьдарна гэдэг утгаараа өөрөө л сонгоно. Гэхдээ төрийн албан хаагч маань хэрэв барилгын компанитай холбоотой санал гомдол тавивал бид тухайн компанид асуудал тавьж, аль болох зээлдэгчээ дэмжихийг боддог. Мөн үнээ битгий нэмээч, манай төсөлд зориулж хямдруулаач гэдэг хүсэлтийг барилгын компаниудад байнга тавьдаг. Компаниуд маань ч зээлдэгч төрийн албан хаагчдын хүсэлтийг хангахын төлөө анхаарч ажилладаг.
-Гэхдээ дуусаагүй барилгатай барилгын компаниуд энэ төсөлд хамрагдаж, тэдэнтэй орон сууц худалдан авах гэрээ хийсэн хүн цөөнгүй байгаа юм биш үү?
-Тухайн үед төрийн албан хаагчид бага талбайтай байр дуусчихсан байна, олдохгүй байна гэж байсан. Хүмүүсийн байраа сонгох боломжийг өргөжүүлэх, түүнчлэн үнэ буурахад нөлөөлөх зорилгоор гүйцэтгэл нь 80 хувиас дээш гарсан барилгуудыг төсөлд хамруулсан юм. Тэгээд ч бүх юм аа хийгээд дуусчихсан, бэлэн болсон барилгын үнэ буудаггүй юм билээ.
-Х
эрвээ барилга дууссаны дараа Улсын комисс хүлээж авахгүй гэвэл яах вэ?
-Энэ эрсдэлийг тооцож үзэлгүй яахав. Тиймээс барилгын ажлын гүйцэтгэл 80 хувь гэж хавтгайруулж болохгүй гэдгийг бид анхааралдаа авсан. Гэрээ хийх компаниудын хувьд туршлага, ажлын түүхийг нь харгалзаж үзсэн. Барьцаа хөрөнгө шаардсан. Дээрээс нь ашиглалтад орох хүртэл төрийн албан хаагчийн өмнөөс зээлийнх нь хүүг тухайн барилгын компаниар төлүүлэх журамтай. Журмыг манай ТУЗ баталсан. Өнгөрсөн жил дуусаагүй барилгатай байсан, гэрээ хийж хамтран ажилласан компаниудын орон сууцнууд бараг бүгдээрээ ашиглалтад орж, Улсын комиссын акт ч гарчихсан байна.
-
Квот буцаж байгаа гэсэн. Тэгэхээр дахин хуваарилалт хийх үү?
- Квотыг хаана, хэнд хуваарилах ажилд манай байгууллага оролцдоггүй. Оролцох ч эрхгүй. ЗГХЭГ-аас байгууллагуудад хуваарилсан квотуудын дийлэнх нь эзэнтэй болсон. Улаанбаатар хотод хавьгүй илүү эрэлттэй нь анзаарагдаж байна. Харин зарим орон нутагт цөөн тооны квот ху-ваарилагдаагүй эзнээ хүлээж байгаа сураг бий. Хэрвээ тийм бол хурдан хуваарилаач, эсвэл ашиглахгүй бол дээд шатны төрийн байгууллагадаа энэ талаараа албан ёсоор мэдэгдээч гэж холбогдох дарга нарт нь хэлмээр байна.
Бид ч энэ талаар тун ойрын үед албан ёсоор мэдэгдэнэ. Ер нь, квот буцлаа гэхэд дахин хуваарилах асуудлыг ЗГХЭГ л шийднэ.