Нийслэлийн Засаг дарга Г.Мөнхбаярын санаачлагаар Японы архитекторуудын холбооны гишүүн архитектор Арима Хироюүки Нийслэлийн Барилга, хот байгуулалт, төлөвлөлтийн газар, Нийслэлийн Газрын алба болон Нийслэлийн Зураг төслийн хүрээлэнгийн 40 гаруй архитектор мэргэжилтнүүдтэй уулзалт, сургалтыг хийлээ.
Тэрээр уран бүтээлийн хувьд хот байгуулалтаас уран барилга, интерьер, график дизайн, ноолуур нэхмэл эдлэлийн дизайн чиглэлээр мэргэшсэн туршлагатай архитектор юм.
Архитектор Арима Хироюүки хот хүмүүст ирээдүйн мөрөөдлийг нь бий болгох хөшүүрэг байх ёстой бөгөөд барилга бол хүмүүсийг хөгжүүлдэг хотын нүүр царай болсон уран бүтээл болохыг онцолсон. Мөн Улаанбаатар хотоо хөгжилтэй орны шинэ технологид суурилсан соёлыг монгол уламжлалтай хослуулсан сайхан хот болгох хэрэгтэй гэсэн санал дэвшүүлсэн.
Улаанбаатар хотыг хөгжүүлэхэд дэм болох өөрийн туршлагадаа тулгуурласан санал боловсруулснаа танилцуулж,
1. Ирсэн хүний сэтгэлийг хөдөлгөхүйц хот 2. Ажлын байрны гүйцэтгэл 3. Дадлага хийх, хичээл хийх ажлын гүйцэтгэл 4. Шинэ худалдааны орон зай бий болгох 5. Аялал жуулчлалыг үндэслэсэн орон зай бий болгох 6. Хувийн орон сууцны гүйцэтгэл
сэдвээр илтгэл тавьлаа.