Барилга МН
Үнэлгээ
Нүүр
Үйлчилгээ
Холбоо барих
Танилцуулга татах
Барилга МН
Танилцуулга татах
Зурвас бичих
Messenger
Залгах
Нүүр
Мэдээ, мэдээлэл
Barilga
2019-11-05
Иргэд газраа чөлөөлөхгүй бол бид утаа, хог, угаадастай улам л удаан ''нөхөрлөнө''
Нийслэлд хог, угаадас, үнсээр "баян" гэрэлтүүлэггүй гудамж хэдэн мянгаараа бий. Төлөвлөлт, өнгө үзэмж тааруу эдгээр гудамжны айлууд хотын утааны талаас илүү хувийг "үйлдвэрлэж" биднийг өдөрт сайн дураар 4-5 хайрцаг тамхи татахад хүргэдэг. Дийлэнх нь зөөврийн ус, нам даралтын зуух бүхий гэр хорооллынхон эдүгээ хотын толгойны өвчин болчихоод байна. Улаанбаатар хот гэр хорооллоос ангижирч гэмээнэ гэмт хэрэг буурч, утаанаас салж, хотын соёл ноёрхох нь дамжиггүй. Эдгээр асуудлыг нэг мөр цэгцлэхийн тулд гэр хорооллыг хэсэгчлэн барилгажуулах нь хамгийн оновчтой арга хэмээдэг. Гэвч гэр хороололд насаараа амьдарч өөрийн хэрэгцээний газраа хувьчлаад авчихсан зарим иргэд энд орон сууцны хороолол босох өдий байна хэмээн халагладаг.
Гэвч агаарын бохирдлыг бууруулах, гэр хорооллыг орон сууцжуулах ажлууд хэдийнэ өрнөөд эхэлчихсэн. Тухайлбал, Орон сууцны ҮII хороолол барих ажил. Харин үүнийг иргэдийн зүгээс дэмжиж, газраа ямар нэг асуудал чирэгдэлгүй чөлөөлөх ажил үлдээд байна.
Ихээхэн хэмжээний газар, бусад үл хөдлөх хөрөнгөтэй айлууд энэ мэт ажилд хойрго ханддаг нь ажиглагддаг. Ганцхан жишээ дурдахад, Дамдинсүрэнгийн гудамж буюу 13 дугаар хорооллын дунд замаас Олимпийн гудамж хүртэл шинээр зам тавих ажил 2006 онд эхэлсэн байдаг.
Гэвч хоёр гуравхан айл газраа чөлөөлж өгөхгүй, их хэмжээний мөнгө нэхсэнээс уг зам гурав дөрвөн жил дамнасан ажил болж хувирсан сургамж бий. Нийслэлийг хэсэгчлэн барилгажуулах ажлын нэрээр төр засаг иргэдийнхээ газрыг зүгээр булаах гээд буй хэрэг огт биш. Тухайн өрхийн газар, үл хөдлөх хөрөнгийг үнэлэн, энэ дайны үнэ бүхий орон сууцыг барьж өгөхөөр тогтсон. Уг нь иргэдийн эрүүл, аюулгүй орчинд амьдрах эрх, улс орны бүтээн байгуулалт, хөгжил дэвшлийг бодвол хэдхэн хүний сэтгэлд таарах, эс нийцэх нь нэг их чухал биш. Тиймээс хот утаа, хогтой байх эсэх нь нийслэлчүүдийн ухамсраас шалтгаалах болчихоод байна. Хэрэв айлууд газраа тэнгэрт тултал үнэлж, чөлөөлж өгөхөөс цааргалаад байвал төдий чинээгээр энэ ажил удааширч таарна. Өөрөөр хэлбэл, Бид утаа, хог, угаадастай улам л удаан "нөхөрлөнө" гэсэн үг.
Эдүгээгийн Азийн бар орнууд 1960-1970-аад оны үед бас л манайх шиг иргэд нь газраа чөлөөлж өгсөн байдаг. Засгийн газраас нь мөнгө эсвэл байр өгье гэх санал тавьсан. Хэрэв уг саналыг зөвшөөрөхгүй бол Шууд захиргаадалтын аргаар шийддэг байсан гэдэг. Тиймээс манай сонин нийслэлийн утааг бууруулж, хотынхоо хөгжил дэвшилд хувь нэмрээ оруулж газраа идэвхтэй чөлөөлөхийг иргэдэд уриалж байна. Орон сууцны ҮII бичил хороолол барихтай холбогдуулан газар чөлөөлөх ажил ирэх хавраас эхлэх юм байна. Уг ажлын хүрээнд 854 нэгж талбарын айлыг дээрх газраас чөлөөлөх бөгөөд үүний тулд 20 тэрбум төгрөгийг 2011 оны төсөвт суулгасан билээ.
Орон сууцны ҮII хорооллын төлөвлөлтийн мэдээллийг хүргэж байна
Орон сууцны ҮII хороолол Сүхбаатар дүүргийн 9, 10, 11, 12 дугаар хорооны нутаг дэвсгэрийг хамран Ногоон нуур, Зуун айл, Цагдаагийн гудамж орчим, хойд талаараа үерийн далан, зүүн талаараа Сэлбийн голын дагуу нийт 210 га талбайг эзлэн орших ажээ. Энд 25 хүртлэх давхар орон сууцны барилгуудыг барихаар төлөвлөсөн байна. Тус хорооллын нутаг дэвсгэрт одоо 2361 газар эзэмшигч, өмчлөгчийн 85.99 га газарт 2500 айл өрхийн 7350 хүн амьдарч байгаа гэсэн судалгаа бий.
Мөн 22 га барилгажсан газар нутагт 1350 өрхийн 8900 хүн ам оршин сууж байгаа аж. Тиймээс уг хорооллыг барьж байгуулснаар 10956 айлын орон сууцанд нийт 46 мянган хүн оршин суух боломжтой болох юм. Түүнчлэн 9200 сурагчтай сургууль, 4600 хүүхдийн цэцэрлэг, өдөрт 1610 хүн үзэх өрхийн эмнэлэг, 4500 ажлын байр бүхий оффисын барилга, 3600 шахам хүн ажиллах худалдаа, үйлчилгээний барилга байгууламж баригдахаар төлөвлөжээ. "Ногоон нуур"-ын одоогийн тогтоцыг түшиглэн хотын чанартай парк, амралт, зугаалгын бүс болгон хөгжүүлэхээр төлөвлөлтөд тусгасан байна.
Энэ хороололд нийт 8000 айлын орон сууц барихаар төлөвлөжээ. Одоогоор энэ төлөвлөгөөний дагуу ажил хийгдэж байгаа юм. Тухайлбал, Орон сууцны санхүүжилтийн корпорацид гурван га газарт 1000 айлын үйлчилгээтэй орон сууцны барилгын зориулалтаар газар олголт хийсэн байна. Мөн газар өмчлөгч, эзэмшигч "Чин удам" ХХК, "Анд интернэшнл" ХХК, иргэн Т.Хандсүрэн, иргэн А.Хүрэлшагай, "Бэрэн констракшн энд автомэшн" ХХК-ийн өмчлөл, эзэмшлийн 1.08 га газарт баригдах үйлчилгээтэй орон сууцны барилгын техникийн төсөл, ажлын зураг батлагджээ. Тус хорооллын хэсэгчилсэн ерөнхий төлөвлөгөөний дагуу "Чин удам" ХХК-ийн 320, Сангийн яамны 72 айлын орон сууцны барилга угсралтын ажил 30.0-70.0 хувийн гүйцэтгэлтэйгээр хийгдэж байна. Төлөвлөлтийн талбайд суурьшиж байсан 350-аад газар өмчлөгч газраа орон сууцаар солих нөхцөлтэйгээр болон зах зээлийн үнээр худалдаад байгаа аж. Иргэдэд газраа орон сууцаар солихоос гадна хэд хэдэн боломж байгаа гэнэ. Үүнд, иргэд газраа үнэлж компаниудад зарах, эсвэл 7-8 айл хоршиж хувийн орон сууц барих боломжтой ажээ.
Эдгээр иргэд газраа чөлөөлж барилга барих хооронд хаана амьдрах нь чухал. Харин Сүхбаатар дүүргийн 11 дүгээр хороонд төрийн өмчийн хашаанд түр байрлах 300 айлын орон сууц барих ажил эхлээд байгаа билээ. Энэ орон сууцыг дамжин өнгөрөх зориулалтаар иргэдэд ашиглуулах гэнэ. Мөн хотын төвийн зургаан дүүрэгт ийм 1200 айлын түр суурьшуулах газрыг тогтоох үүрэгч өгч, газраа тогтжээ.
Ерөнхий боловсролын дөрөвдүгээр сургуулийн ар талд өнгөрсөн зунаас нэгэн барилга баригдаж эхэлсэн нь орон сууцны ҮII хорооллын нэг хэсэг гэдгийг тэр хавийнхан андахгүй. Эдүгээ барилгуудын эхнийх нь буюу 96 айлын орон сууц ашиглалтад ороход бэлэн болсон байна.
Түүнчлэн тус хорооллын ажил эхэлж буйтай холбогдуулан шугам сүлжээний ажлын тендер БХБЯ дээр зарлагдаж "Бээжин констракшн" гүйцэтгэхээр болжээ. Уг ажилд 23.4 тэрбум төгрөг төсөвлөгдсөн бөгөөд орон сууц барих компани хараахан тодорхой болоогүй байгаа аж.
Т.Сэлэнгэ