Олон улсын хэмжээнд уул уурхайн хөрөнгө оруулалт хийх, аж үйлдвэрийн барилга байгууламж барих үндсэн чиглэл бүхий Хятадын томоохон аж ахуйн нэгж болох “Хятадын өнгөт төмөрлөгийн гадаад дахь барилга, зураг төслийн компани /NFC/ нь Монголын геологи, уул уурхайн салбарын анхдагч төлөөлөгчдийн нэг “MIH” групптэй Монгол улсад аж үйлдвэрийн болон дэд бүтцийн барилга байгууламжийн зураг төсөл, техник эдийн засгийн үндэслэл боловсруулах, зөвлөлгөө өгөх, барьж байгуулах, тоног төхөөрөмж угсарч суурилуулах чиглэлээр үйл ажиллагаа явуулах зорилготой хамтарсан “Үйлдвэрийн барилга байгууламж корпораци” ХХК байгуулах албан ёсны ёслолын ажиллагаа 1-р сарын 26-ны өдөр болно.
NFC нь /www.nfc.com.cn/ Ази, Африк, Австрали, Европ тивийн олон улсуудад уул уурхай, металлурги, дэд бүтцийн цогцолборуудыг барьж байгуулах олон төслүүдийг амжилттай хэрэгжүүлсэн ба АНУ-ын нэр хүнд бүхий Engineering News Record хэмээх сэтгүүлээс хэд хэдэн удаа “Олон улсын топ 225 барилгын гүйцэтгэгч”, “Зураг төслийн 200 топ компани”-ний нэг гэж өргөмжлөгдсөн бөлгөө. Тус компани Монголд урт хугацааны үйл ажиллагаа эрхлэх сонирхолтой бөгөөд Сүхбаатар аймгийн нутаг дэвсгэр дээр Төмөртийн-Овооны цайрын УБҮ-ийг барьж байгуулах ажлыг амжилттай гүйцэтгэж түлхүүр хүлээлгэн өгөх нөхцлөөр “Цайрт Минерал- ХХК-д хүлээлгэн өгсөн юм.
Тус компанийн явуулдаг үйл ажиллагааны үндсэн чиглэлд инженерийн шийдэл боловсруулах, зөвлөх үйлчилгээ үзүүлэх, тоног төхөөрөмж нийлүүлж суурилуулах, техник, технологийн чиглэлийн сургалт явуулах, барилга байгууламжийн болон тэдгээрийн дагалдах бүхий л дэд бүтцийн обьектуудыг барьж байгуулах зэрэг иж бүрэн ажил үйлчилгээнүүд ордог байна.
Монголын талын оролцогч MIH групп нь /www.mih.mn/ сүүлийн үед геологи, уул уурхай, барилга, барилгын материалын үйлдвэрлэл, даатгал, санхүүгийн үйлчилгээний чиглэлээр үйл ажиллагаа нь эрчимтэй өргөжин тэлж байгаа Монголын компаниудын нэг болно. Сүүлийн 2 жилийн хугацаанд тус групп нь хөөсрүүлсэн бетон блок болон магнезитэн хавтан үйлдвэрлэдэг хоёр ч барилгын материалын үйлдвэрийг ашиглалтанд оруулсан бөгөөд мөн түүнчлэн өөрийн охин компани болох “Боло” ХХК-аар дамжуулан Оюу Толгойн бүтээн байгуулалтын ажилд амжилттай оролцож байна.
Сонирхсон хувь хүн, байгууллагууд дараах хаягаар дэлгэрэнгүй мэдээлэл авна уу. Утас: 70149761 /Мөнхөө/, munkhuu@mih.mn