“Мантууш” компанийн барьсан энэ барилга анхнаасаа зураг төсөл, баримт бичиггүй баригдсаныг мэргэжлийн хяналтын ерөнхий газар тогтоосон байх юм. Хаа байсан 2007 оны 6 сарын 18 -ны өдөр мэргэжлийн хяналтынхан “Мантууш” компанийн удирдлагыг барилга барих зураг төсөл, бусад зөвшөөрсөн бичиг баримтаа шалгуулахыг сануулсан юм байна. Гэвч мэргэжлийн хяналтын газраас өгсөн үүрэг даалгаврыг зөрчиж, бултаж явсаар зөвшөөрөлгүйгээр яг ижилхэн олон барилга бариад байна.
Анхнаасаа барилга барих зөвшөөрөл аваагүй энэ компанийн энэ барилгууд яаж ашиглалтанд орж, оршин суугчдаа оруулсан нь ойлгомжгүй байгаа юм. Туул голын гольдирлыг албан хүчээр хааж барьсан нь эргээд ямар нэг муу нөлөөтэйг оршин суугчид нь хэлж байлаа. Их хэмжээний бороо орж үер буусан тохиолдолд энэ байр подваль нь усанд автдаг гэж байна. Өнгөрсөн зун доод гарааш нь тэр чигээрээ усанд автжээ. Өнөөдрийг хүртэл байрны доод подвальд ус шүүгч байрлуулсан байгааг иргэн хэлсэн. Тэрбээр царай зүсээ зурагтаар харуулахыг хүссэнгүй, бид баримт болгох үүднээс яриаг нь бичиж авсан юм. Энэ барилга барилгын тухай хуулийг зөрчээ. Хуулийн 8,2-ын барилга угсралтын ажлыг эрх бүхий байгууллагын зөвшөөрөлгүйгээр эхлэх, үргэлжлүүлэхийг хориглоно” гэсэн заалтыг зөрчин баригдсан. Мэргэжлийн хяналтынхан одоогоос 4 жилийн өмнө дөнгөж барилгын ажил эхэлж байхад гаргасан зөрчлүүдээ арилгахыг анхааруулсан байх юм. Харин өнөөдөр “Мантууш” компанийн барьсан зөвшөөрөлтэй эсэх нь мэдэгдэхгүй маш олон барилга ашиглалтад ороод байна. Бид энэ компанитай холбоотой мэдээллийг цувралаар бэлтгэх болно.
Ж. Батхишиг