Барилгын салбарт үйлдвэрлэлийн осол нэмэгдэж байгаа нь аюул дагуулсан асуудал болж байна. Тоо баримт дурдья. 2006 онд 73, 2007 онд 62,2008 онд 123 осол гарч, 2009 онд энэ тоо 25-аар нэмэгджээ. Ослын шалтгаан нь нуралтаас 58, технологийн ажиллагаа зөрчсөнөөс 19, аюулгүйн дүрэм мөрдөөгүйгээс 29, хамгаалалтын хэрэгсэл, хувцас бүрэн бусаас үүдэж 12, тоног төхөөрөмжийн эвдрэлээс 12, бусад зөрчлийн улмаас найман хүн гэмтэж, 43 нь амь насаа алджээ. Мөн 37 хүн тахир дутуу болж, 48 хүн хөдөлмөрийн чадвараа алдсан байна. Барилга дээр ажиллагсдын дийлэнх нь 20-35 буюу хөдөлмөрийн өндөр бүтээмжтэй насныхан байдаг. Осол гарах шалтгааныг өөр өнцгөөс нь харвал барилга дээр мэргэжлийн бус хүмүүс олноор ажилладагтай холбон тайлбарлаж болно.
Нийслэлийн мэргэжлийн хяналтын газар энэ жил барилга угсралтын 169, барилгын материалын 110 үйлдвэр, барилгын засал чимэглэлийн 23, сантехникийн найм, цахилгааны 11 зэрэг нийт 321 аж ахуйн нэгжид шалгалт хийжээ. Шалгалтаар аж ахуйн нэгжүүд барилга угсралт, засал, өрлөг, шавардлагыг мэргэжлийн бус хувь хүнээр хийлгэдэг зөрчил илэрчээ.
Энэ нь хөдөлмөрийн аюулгүй ажиллагааны хууль, дүрмийг зөрчсөн үйлдэл юм. Ер нь барилгын захиалагч иргэн, байгууллага барилга угсралтыг нэг компаниар, өрлөг, засал чимэглэл, газар шорооны ажлыг өөр аж ахуйн нэгжээр гүйцэтгүүлдэг байдал түгээмэл. Барилгын компанийн зүгээс хөдөлмөрийн аюулгүй ажиллагааны дүрэмд заасны дагуу хяналт,шалгалт хийж, эрсдэлийг үнэлдэггүй, ослоос урьдчилан сэргийлэх арга хэмжээг авдаггүй зэрэг зөрчил их.
Үүнээс шалтгаалан хөдөлмөрийн аюулгүй байдлыг хангахад шаардагдах хөрөнгө мөнгөний асуудал эзэнгүйдэж, улмаар осол гарч хүний амь нас эрсдэх, эрүүл мэнд нь хохирох нөхцөлийг бүрдүүлж байна. Нөгөөтэйгүүр барилгын дэргэдүүр явж байгаад осолдож хохирсон энгийн иргэдийн асуудлыг хөндөхгүй өнгөрч боломгүй. Уг нь барилга барихдаа явган хүний замаас 50 метр зайтай, дээврийн хамгаалалттай байх ёстой.
Гэтэл таван метр ч хүрэхгүй зайд хэдэл муудсан банзаар дээврийн хамгаалалт хийчихээд үйл ажиллагаа явуулж байна. Дээрээс унасан тоосго жингээсээ хэд дахин илүү хүнд болж буудаг. Стандарт хангаагүй дээврийн хамгаалалтыг цөм цохин гудамжаар явж буй хүний толгой дээр унаж хүний аминд хүрсэн тохиолдол бий. Барилгын хажуугаар явахдаа дээш харахад мултраад унаж мэдэхээр дайвалзах бетонууд, том торхтой шавар байх нь энгийн үзэгдэл. Тэдгээр өргөгч цамхгаас бетон хавтан унаж хүний амь нас, эд хөрөнгөнд хохирол учруулсаар.
Саяхны жишээ хэлэхэд, Сонгинохайрхан дүүргийн нутагт өргөгч цамхгийн дээрээс угсраатай бетон унасан ч азаар хүний амь эрсдэлгүй өнгөрсөн. Барилга барьж буй компаниуд өргөгч цамхгийн сумыг замбараагүй орхидог нь дээрх ослын шалтгаан болдог. Гэмтэж бэртсэн иргэд нөхөн олговор, хохирлоо барагдуулах гэж бас л бөөн зардал гаргаж, чирэгддэг. Ялангуяа хувийн, гадаадын хөрөнгө оруулалттай компаниудаар хохирлоо барагдуулна гэдэг хэцүү. Хохирсон нь үнэн, хохироосон нь үнэн. Гэхдээ хариуцлага тооцож, хохирлыг шуурхай барагдуулах нь бараг үгүй. Мөрөөрөө явж байгаад юманд цохиулж амиа алдана гэдэг эмгэнэлтэй гэхэд багадна. Энэ тал дээр арга хэмжээ авч хүний эрүүл, аюулгүй амьдрах эрхийг хангах цаг хэззэ вэ? Э. Мөнхнасан Эх сувалж: “Монголын үнэн”