Орон сууцны санхүүжилтийн корпорацийн Зээлийн газрын захирал М.Уламбаяртай ярилцлаа. - Шинэ он гараад удаагүй байна. Тэгэхээр 2011 ондоо ямар, ямар ажил хийхээр төлөвлөөд байна вэ? - Энэ онд 4000 айлын орон сууц төсөл үргэлжилж, үлдсэн хэсгийг санхүүжүүлнэ. Тухайлбал, 1500 орчим төрийн албан хаагч байгаа. Эдгээр айлыг энэ оны эхний хагас жил гэхэд орон сууцжуулахаар төлөвлөн ажиллаж байна. - Хувийн хэвшлийнхний 4000 айлыг орон сууцжуулах талаар мэдээлэл байсан. Энэхүү ажлын тухайд? - Одоогоор энэ талаар тодорхойгүй байна. Гэхдээ Засгийн газраас төсөл хөтөлбөр хэрэгжүүлэхээр шийдвэр гаргах юм бол боломжгүй зүйл биш. Одоогоор шинэ бүтээн байгуулалт хөтөлбөр батлагдсан. Хөтөлбөрийн хүрээнд 100 мянган айлын орон сууцны төсөл зэрэг хийхээр төлөвлөсөн ажил байгаа. - Танайхаар дамжуулан хэчнээн айл орон сууцтай болоод байна вэ? - Улс орон даяар хэрэгжиж байгаа энэ төслөөр өнөөдрийн байдлаар 2500 орчим төрийн албан хаагч орон сууцтай болсон байна. - Танайхаас тавьж байгаа шалгуурын талаар сонирхуулахгүй юу? - Төрийн албаны байгууллагад гурваас дээш ажилласан байх болон цаашдаа тогтвор суурьшилтай ажиллана гэсэн шалгуур бий. Харин орон сууцны хувьд Улсын комисс хүлээж авсан, шинээр ашиглалтад орсон байх шаардлагатай. - Бага хүүтэй урт хугацаатай зээлийн орон сууцанд амьдрах сонирхолтой хүмүүс элбэг байна. Тиймээс танайх орон cyyцны зээл хүссэн саналуудад дарагдаж байгаа байх. Үүнийг шийдвэрлэж өгөх боломж бололцоо нь хэр байдаг вэ?
- Бид Засгийн газраас баталж өгсөн төрийн албан хаагчдын орон сууцны хүсэлтийг шийдвэрлэж өгч байна. Манайх хамгийн бага хүүтэй зээл. Жилийн найман хувийн хүүтэй. Зээлийн дээд хэмжээ 40 сая төгрөг. Өдөрт 60-70 орон сууцны зээл хүссэн өргөдөл ирдэг. Б.Пүрэвжав