Ажлын удирдамж татаж авах
Улаанбаатар хот, Монгол улс – 2010 оны 12 дугаар сарын 01 – Монголын Мянганы Сорилтын Сан, НҮБ-ын Хөгжлийн Хөтөлбөр хамтран эрчим хүчний хэмнэлттэй хувийн орон сууцны барилгын эскиз зураг төсөл боловсруулах уралдааныг зарлаж байна.
Эрчим хүчний хэмнэлт, барилгын дулаан хамгаалалт чиглэлээр үйл ажиллагаа явуулдаг дотоодын болон гадаадын аж ахуйн нэгж, компани, эрдэм шинжилгээ, судалгааны байгууллагууд уралдаанд оролцох боломжтой. Уралдаанд оролцогчид УБ хотын гэр хороолол дахь бага орлоготой иргэд, оршин суугчдад зориулан эрчим хүчний хэмнэлттэй, өртөг багатай жижиг сууцны (35м2 болон түүнээс ихгүй) эскиз, зураг төслийг боловсруулах бөгөөд ингэхдээ хотын агаарын бохирдлыг бууруулахад хувь нэмрээ оруулан хүчин чармайлт гарган ажиллах сонирхолтой байна.
УБ хотын гэр хорооллын хувьд төсөвт өртөг багатай орон сууцыг зах зээлд нэвтрүүлэх нь нэн чухал асуудлуудын нэг болоод байгаа одоо үед эрчим хүчний хэмнэлттэй орон сууцыг олон нийтэд санал болгох нь цагаа олсон зөв шийдэл болох юм. Эрчим хүчний хэмнэлттэй байшин, орон сууц нь монгол гэртэй харьцуулахад эрчим хүчний хэрэглээ бага, оршин суугчдад эрүүл, тав тухтай орчныг бүрдүүлдэг мөн ашиглалтын зардал харьцангуй бага зэрэг олон давуу талуудтай. УБ хотын 83,000 гаруй дунд болон дундаас доош орлоготой айл өрхүүд өөрсдийн сарын орлогын 50 % иас дээш хувийг орон сууц, халаалттай холбоотой зардлуудад зарцуулдаг болохыг судалгаа харуулжээ. Эрчим хүчний хэмнэлтгүй гэр, сууцанд нүүрс түлснээс хотын агаарын бохирдлын хэмжээ дэлхийд өндөрт тооцогдох хэмжээнд хүртлээ өсөөд байна.
Уралдаанд оролцогчдын материалыг 2011 оны 02 дугаар сарын 28 ны 18:00 цаг хүртэл хүлээн авна.
Техникийн өндөр мэргэжил, боловсрол, туршлага бүхий гишүүдээс бүрдсэн Үнэлгээний хороо уралдаанд оролцогчдын материалыг шүүж, дараах мөнгөн урамшуулал бүхий эхний 3 байрыг шалгаруулна:
Дээрх мөнгөн урамшууллаас гадна ялагчдын бүтээлийг хэвлэл мэдээллийн хэрэгсэл, өдөр тутмын сонингуудаар дамжуулан олон нийтэд сурталчлах арга хэмжээг авч хэрэгжүүлнэ.
Уралдаанд оролцоход тавигдаж буй шаардлага, ирүүлэх материалын талаар болон бусад нэмэлт мэдээллийг авахыг хүсвэл дээр өгөгдсөн э-шуудангийн хаягаар захидал бичиж эсвэл дараах вэбсайтууд дээрх (www.mca.mn, www.undp.mn, www.beep.mn) зарыг харах боломжтой. Мөн өөрийн биеэр доорх хаягаар ирж уулзаж болно.
Цэвэр агаар төсөл Улаанбаатар хот, Сүхбаатар дүүрэг, 1-р хороо, Соёл амралтын хүрээлэн – 14240, Жамъян гүний гудамж -18 Утас: 976-7011-6901 Факс: 976-7011-6901