Нийслэлийн Мэргэжлийн хяналтын газраас нийслэлийн нутаг дэвсгэрт байрлан үйл ажиллагаа явуулж буй барилга угсралтын 169, барилгын материалын үйлдвэр 110, барилгын засал чимэглэлийн 23, сантехникийн найм, цахилгааны 11 зэрэг нийт 321 аж ахуйн нэгж, байгууллагын 10 мянга, 277 ажиллагсад, 1400 тоног төхөөрөмжийг хамруулан хууль эрх зүйн акт, стандартын хэрэгжилтэнд нь шалгалт хийжээ.
Барилгын тусгай зөвшөөрөл авсан аж ахуйн нэгж, байгууллагууд нь барилга угсралт, засал, өрлөг, шавардлага, гадна фасадны ажлуудыг өөрсдийн мэргэжлийн ажилтнаар гүйцэтгүүлдэггүй, туслан гүйцэтгэгч хувь хүн, иргэнээр хийлгэдэг байна. Энэ нь хөдөлмөрийн аюулгүй ажиллагааны хууль, дүрэм, стандартын шаардлагыг хангаж түүнд хөрөнгө зарцуулан ажиллаж чадахгүй иргэд, аж ахуйн нэгж байгууллагууд барилгын ажлыг гүйцэтгэж, улмаар хөдөлмөрийн аюулгүй ажиллагааны дүрэм зөрчигдөж осол гарах боломжийг бүрдүүлжээ.
Уг шалгалтаар барилга угсралтын үед цахилгаан шатны хонгилийг шат угсрах ажил эхлэхээс өмнө захиалагч, ерөнхий гүйцэтгэгч, туслан гүйцэтгэгч байгууллагуудын аль нь хариуцаж аюулгүй байдлыг ханган ажиллах талаар аюулгүй ажиллагааны дүрэм заавартаа тодорхой тусгаагүйгээс шатны хонгилийн хаалт хамгаалалт хийгдэхгүй орхигддог зөрчил түгээмэл байжээ.
Барилга байгууламжийг захиалан бариулж буй иргэн, аж ахуйн нэгж нь барилга угсралтын ажлыг нэг компаниар, өрлөг, засал чимэглэл, гадна засал, газар шорооны ажил, өргөх тээвэрлэх зэрэг ажлуудыг тус бүр өөр компаниар гүйцэтгүүлдэг байна.
Үүнээс шалтгаалж ерөнхий гүйцэтгэгч компани байхгүй болж, барилгын хаалт хамгаалалтгүй, захын хийц дээрээс ажилтан ажил үүрэг гүйцэтгэх тохиолдолд хаалт хашлагыг, шат, тавцан, хамгаалалтын тор, саравч, гадна хашаа, лифтний хонгилийн хаалт хамгаалалт, барилгын гэрэлтүүлэг гэх мэт хөдөлмөрийн аюулгүй байдлыг хангаж ажиллахад шаардагдах хөрөнгө мөнгөний асуудал дунд нь хоцрогдон эзэнгүйдэж, улмаар үйлдвэрлэлийн осол гарч хүний амь нас эрсдэх, эрүүл мэнд нь хохирох боломжийг бүрдүүлж байгаа нь илэрчээ.
Мөн Нийслэлийн нутаг дэвсгэрт үйл ажиллагаа явуулж буй аж ахуйн нэгжүүдэд нийгмийн хамгааллын холбогдох хуулиудийн хэрэгжилтийг шалгахад нийт 207 аж ахуйн нэгж байгууллагын зургаан мянга 284 ажиллагсдын нийгмийн болон эрүүл мэндийн даатгалын дэвтрийг шалгахад хоёр мянга гаруй дэвтэр зөрчилтэй байсныг газар дээр нь арилгуулжээ.
Дээрх ажилтнуудыг нийгмийн даатгалын шимтгэлд бүрэн хамруулдаггүй, цалин орлогоо нуун дарагдуулдаг, нийгмийн даатгалын дэвтэрт тушаалын бичилт хийдэггүй, нийгмийн даатгалын дэвтрийн шилжилт хөдөлгөөний тэмдэглэл хийгээгүй, даатгуулагчдийн нийгмийн даатгалын дэвтрийг даатгалын байгууллагаар тухай бүрд нь баталгаажуулдаггүй зэрэг нийтлэг зөрчлүүд илэрсэн байна.
Эх сурвалж: “Нийгмийн толь”