Дайнд оролцсон ахмад дайчдад орон сууцны түлхүүр гардуулах үйл явдал өчигдөр Батлан хамгаалах яаманд болсон юм. Идэр залуу насаа эх орныхоо тусгаар тогтнолын төлөө зориулж явсан 40 ахмад дайчинд орон сууцны түлхүүр гардуулах үеэр Батлан хамгаалахын сайд Л.Болд "Халх голын байлдааны 70, Чөлөөлөх дайны ялалтын 65 жилийн түүхт ойнуудыг ёслон тэмдэглэж, ахмад үеийнхээ эх оронч, баатарлаг гавъяаг бахархан дурссан. Ирэх жил бид Батлан хамгаалах яам байгуулагдсаны 100, Зэвсэгт хүчний 90 жилийг тэмдэглэхээр бэлтгэж байна. Шинэ оны босгон дээр байрны түлхүүр гардан авч буй та нартаа эрүүл энх, аз жаргалтай аж төрөхийн ерөөл дэвшүүлье" гэж хэллээ. Шинэ байрны түлхүүр гардан сэтгэл тэнийсэн ахмад дайчин Н.Хуушаан "Би 1945 оны дайнд жанжин Сүхбаатарын хүү Галсан хурандаагийн удирдсан есдүгээр морьт хороонд алба хааж, Өндөрхаан, Баянтүмэн, улмаар хил давж Долнуур хүртэл морин марш хийсэн. Монгол, цэрэг морь хоёр бэрх хэцүүг даван туулах чадвартайг биеэрээ үзэж, эх орныхоо өгсөн үүргийг цэрэг эрс бид нэр төртэй биелүүлсэн юм. Би дайны дараа БХЯ-ны хэлтсийн дарга, цэргийн оёдлын үйлдвэрийн дарга, Иргэний нисэхийн орлогч дарга зэрэг хариуцлагатай албан тушаалыг хашиж хурандаа хүртэл цол хүртэн 30 гаруй жил цэргийн алба хаагаад одоо тэтгэвэртээ сууж байна. Орон сууцтай болсондоо баярлалаа" гэсэн юм.