Монгол Шведийн 20 жилийн хамтын ажиллагааны хүрээнд “Монгол-Шведийн бизнес форум” энэ сарын 2-3 ны өдрүүдэд Улаанбаатар хотод болж байна. Өнөөдөр зохион байгуулагдсан “Монгол Шведийн хот төлөвлөлт ба байгальд ээлтэй технологи форум”-д Нийслэлийн Барилга, хот байгуулалт төлөвлөлтийн газрын орлогч дарга Э.Анар “Нийслэлийн хот төлөвлөлтийн өнөөгийн байдал, хэтийн төлөв” сэдвээр илтгэл тавьлаа.
Илтгэлдээ: ” Улаанбаатар хотыг 2020 он хүртэл хөгжүүлэх ерөнхий төлөвлөгөө нь сайн төлөвлөлттэй, хотжилтын дүр зургийг тодорхойлж, байгаль экологийн тэнцвэрт байдлыг хамгаалах зүй зохистой төлөвлөлтийн шийдлийг тусгасан гэж мэргэжилтнүүд үнэлдэг хэдий ч нийгэм эдийн засагт гарч буй хурдацтай өөрчлөлтөөс үүдэлтэй гэр хорооллын тэлэлтийг сааруулах, иргэд, байгууллагын суурьшлыг зохицуулах, инженерийн болон нийгмийн дэд бүтцийг түлхүү хөгжүүлэх, орон сууцны хангамжийг сайжруулах зэрэг шинэ эрэлтүүд үүссэнээр ерөнхий төлөвлөгөөнд тодотгол хийх зайлшгүй шаардлага бий болсон юм” гэж онцолсон.
Шведийн Үндэсний барилга хот байгуулалт төлөвлөлтийн газрын мэргэжилтнүүд: “ Швед улсад хууль бус суурьшлын асуудал монголын өнөөдрийнхтэй ойролцоо байсан үе бий. Хотжих үйл явцыг өөрийн үндэсний уламжлалтайгаа холбон авч үзэхийн зэрэгцээ байгаль орчны болон барилгын хуулиудын хоорондын уялдаа холбоо хангагдсанаар бүтээн байгуулалтын ажил зохих түвшинд хөгжих боломжтой бөгөөд төрийн болон хувийн хэвшлийн цогц түншлэлийн үр дүнд хот байгуулалт сайжирна” хэмээж байлаа. “Монгол Шведийн хот төлөлвлөлт ба байгальд ээлтэй технологийн форум” нь манай орны хот байгуулалт, төлөвлөлтийн салбарт үнэтэй хувь нэмэр өгөхүйц үр дүнтэй хамтын ажиллагааны эхлэл боллоо.