Засгийн газрын өнөөдрийн ээлжит хуралдаанаар төмөр замын сүлжээ, суурь бүтцийг өргөжүүлэх талаар хэлэлцэн тогтоол гаргажээ. Тус тогтоолоор УИХ-ын 2010 оны 32 дугаар тогтоолоор баталсан “Төрөөс төмөр замын тээврийн талаар баримтлах бодлого”-д эхний үе шатанд барихаар төлөвлөсөн төмөр замын суурь бүтэц барих тусгай зөвшөөрлийг “Монголын төмөр зам” ХК-д олгосон байна. Төмөр замын ажлыг эхлүүлэхэд шаардагдах хөрөнгийн эх үүсвэрийг “Хөгжлийн банк”-аар дамжуулан шийдвэрлэх талаар холбогдох арга хэмжээ авахыг Төрийн өмчийн хороонд даалгажээ. Мөн Тавантолгойн нүүрсний ордыг хамтарч ашиглах стратегийн хөрөнгө оруулагчийн үйл ажиллагаа, хөрөнгө оруулалт, нөхцөлтэй уялдуулах замаар гадаад, дотоодын хөрөнгө оруулагчдын оролцоо бүхий компани /консерциум/ байгуулж улмаар төмөр замын суурь бүтэц барих тусгай зөвшөөрлийг шилжүүлэх санал боловсруулж Засгийн газарт танилцуулахыг Ажлын хэсэг /Н.Алтанхуяг/-т даалгасан байна. Төмөр зам барих төслийн ажилд шаардагдах зөвлөх үйлчилгээний багийг сонгон шалгаруулах санал боловсруулахыг “Монголын төмөр зам” ХК-д үүрэг болгосон байна. “Төрөөс төмөр замын тээврийн талаар баримтлах бодлого”-д зааснаар эхний үе шатанд Даланзадгад-Чойбалсангийн чиглэлд 1100 орчим км төмөр замын суурь бүтцийг 2010 оноос барьж эхлэхийг УИХ-ын тогтоолоор Засгийн газарт даалгасан билээ. Засгийн газрын ХМА