Барилга МН
Үнэлгээ
Нүүр
Үйлчилгээ
Холбоо барих
Танилцуулга татах
Барилга МН
Танилцуулга татах
Зурвас бичих
Messenger
Залгах
Нүүр
Мэдээ, мэдээлэл
Barilga
2019-11-05
Хот төлөвлөлтийн алдаа иргэдийн амийг хохироож болзошгүй нь
Газрын наймаа Монголд хүчээ аваад удаж байна. Мөнгөтэй танил талтай нэгэн нь дуртай газраа барилга байшин барьсаар нийслэлийн хот төлөвлөлт эмх замбараагаа алдсан. Хүүхдийн тоглоомын талбай, сургуулийн биеийн тамирын талбай гээд хаана л бол хаана барилга байшин сүндэрлэсээр хөл толгойгоо алдав. Үүний тод жишээ нь Баянгол дүүргийн XVII хороо XXVIII байрны өмнө баригдаж буй есөн давхар барилга явган хүн болон автомашины замыг шахаж баригдаж байна. Ингэснээр тухайн барилгын хажуугаар автомашин болон явган хүн зөрж өнгөрөхөд хүндрэл учрах болжээ. Уг мэдээллийн дагуу барилгын инженертэй уулзах гэсэн боловч уулзахаас татгалзав. Иймээс Баянгол дүүргийн XVII хороог зорьж Засаг дарга Ц.Дэлгэрбаяраас дараах зүйлийг тодруулсан юм.
Явган хүний болон автозамруу шахаж баригдаж байгаа уг барилгыг ойр хавийн оршин суугчид нь бариулахгүй гэж олон удаа эсэргүүцэж байсан ч баригдаад эхэлчихлээ гэсэн мэдээлэл ирсэн. Энэ талаар та мэдсэн үү?
Мэдсэн. Одоо баригдаж байгаа гэх барилгын хойд талд байрлах XXVIII байрыг баригдаж эхлэх үед хамт баригдах ёстой байсан барилга гэж сонссон. Гэтэл баригдаад дуусчихсан барилгын хажууд уг барилга баригдаж өдөр шөнөгүй барилгын ажил явуулж байсан учир оршин суугчид дургүйцэж хажуудах барилгын суурьт нөлөөл байна гэж гомдол гаргах болсон. Би энэ хорооны Засаг даргаар ажиллаад жил гаран болж байна. Намайг ирэхэд уг барилга дөнгөж баригдаж эхэлж байсан. Нийслэлээс анх барилгын төлөвлөлт хийхдээ явган хүний зам болон машин замаас хэдэн метрийн зайтай, стандарт нь ямар байхыг тогтоож өгдөг. Гэтэл энэ журмыг тухайн барилга мөрдөөгүйгээс хажуугаар нь иргэд айдастай алхаж байна.
Барилга барих зөвшөөрлийг нь шалгасан уу?
Уг барилгыг бариулж байгаа н.Оюунтуяатай би уулзаж зөвшөөрлийг нь харсан. Нийслэлээс барилга барих зөвшөөрлийг нь олгочихсон бүх зүйл ном дүрмийн дагуу байсан.
Уг барилгад дүүргийн газрын алба болон мэргэжлийн хяналтын газраас ирж шалгалт хийсэн үү?
Иргэдийн гомдлын дагуу дүүргийн Мэргэжлийн хяналтын газар, газрын албаныхан ирж шалгалт хийсэн. Мэргэжлийн хяналтын газар хажуу талд нь байрлах барилгын суурьт нөлөөлөхгүй гэсэн дүгнэлтийг гаргасан. Харин газрын алба ном журмын дагуу зөвшөөрөлтэй байна гээд барилгын ажлыг үргэлжлүүлж болно гэж зөвшөөрсөн байна лээ.
Таны хувьд дээрх зөрчилтэйгөөр уг барилга баригдаж байгаа нь зөв үү, буруу юу?
Би оршин суугчидтай санал нэг байгаа. Яагаад гэвэл явган хүний хашлага, машин замыг шахаад баригдчихсан барилга хүний амь насанд хохирол учруулахгүй гэх баталгаа алга. Эргэн тойронд нь иргэдийг гэнэтийн аюулаас хамгаалах хаалт хамгаалалт байхгүй. Энэ бол нийслэлийн барилга хот төлөвлөлтийн газраас гаргасан алдаа гэж бодож байна. Зөвхөн энэ барилга ч гэлтгүй сүүлийн үед баригдаж байгаа барилгууд стандартын бус аргаар баригдаж байна шүү дээ. Тиймээс нийслэлээс замбараагүй газар олгохоо зогсоох хэрэгтэй.
Цаашдаа яах бодолтой байна?
Нэгэнт л баригдаад эхэлчихсэн барилгыг би одоо яалтай билээ. Миний зүгээс дүүргийнхээ Газрын алба, Мэргэжлийн хяналтын гэх мэт газруудад хандаж үзсэн. Миний мэдлээс хэтэрсэн асуудал юм билээ. Тиймээс баригдаж дуустал нь доогуур нь явж байгаа автомашин явган хүмүүсийн дээрээс барилгын эд зүйлс битгий унаасай л гэж бодож байна. Харин баригдаж дууссаных нь дараа ногоон байгууламж, хүүхдийн тоглоомын талбай зэрэгт нь л шаардлага тавья гэж бодож байна даа.
Тухайн барилгыг бариулж байгаа Ч.Оюунтуяатай холбогдов.
Танай баригдаж байгаа барилгын талаар иргэдээс гомдол ирээд байна?
Ямар гомдол юм бол. Уг нь ном журмын дагуу л баригдаж байгаа шүү дээ.
Явган хүн автомашины зам талбайг шахаж барилга барьж байна гэж?
Ингэж баригдахаас өөр арга байхгүй байсан юмаа. Яагаад гэхээр тогтоосон газрын хэмжээний дагуу барилгаа барьж байгаа. Баригдаж дууссаны дараа тухайн замуудаас дотогшоо болох болно. Одоохондоо гадуур нь хашаа баригдаад зам руу шахчихсан юм.
Иргэдийн аюулгүй байдлыг хангах үүднээс барилгынхаа доод талаар хаалт хамгаалалт тавих ёстой. Хаалт хашлага тавиагүйгээс барилгын доогуур алхаж байгаа иргэд хохирч болно шүү дээ?
Иргэд хохирохгүй гэх баталгаа байхгүй нь үнэн. Манай барилга одоо таван давхартаа явж байгаа. Өндөрсөөд ирэхээр нь ногоон торон хаалтыг дөрвөн талд нь тавина.
Нийслэлээс барилга барих газрын зөвшөөрлийг өгсөн гэсэн. Хэн гэж дарга өгсөн юм бэ?
Яг одоо хэлэх боломж алга. Гэрт зөвшөөрөл нь байгаа. Очиж харж байгаад хэлнэ дээ.
Тухайн барилгын зөвшөөрлийг дүүргээс нь биш нийслэлээс өгчээ. Явган хүний зам болон автомашины замыг шахаж баригдаж байгаа энэ барилгын хажуугаар хүүхэд, хөгшид, автомашины цуваа тасардаггүй аж. Барилга барих зөвшөөрөл нь байдаг юмаа гэхэд иргэдийн амь нас эд хөрөнгөд хохирол учруулахгүй гэх баталгаа алга.
О.ЭРДЭНЭБҮРЭН