Аль ч улс оронд хаяг байршил, гудамж талбайн нэр тодорхой энгийн хэнд ч ойлгомжтой байдаг. Таксинд суугаад гудамжны нэр дугаарыг хэлэхэд л хангалттай байдаг бол манайд “Жигжиджавын гудамж 9” гээд хаягаа хэлэхэд олох хүн тун цөөн. Харин Төв шуудангийн ард, хотын захиргааны баруун талд 15 давхар “өндөр хар шилэн байшин” гэх маягаар хэлбэл тун ч амар ойлголцоно.
Үүнийг өөрчлөх зайлшгүй шаардлага урган гарч Барилга, хот байгуулалт, төлөвлөлтийн газар нь Нийслэл Улаанбаатар хотын гудамж талбайд нэр өгөх, барилга байгууламжийг дугаарлаж мэдээллийн санд оруулах, хаягжилтын самбарыг нэгдсэн нэг стандартын дагуу үйлдвэрлэх, хадаж байрлуулах зэрэг ажлуудыг зохион байгуулж, хийж гүйцэтгэж байна. Одоогийн байдлаар Улаанбаатар хотод нэр бүхий 136 гудамж талбай байгаагаас 1990-2005 онд 69, 2006-2010 онд 67 гудамж талбайг тус тус нэршүүлээд байгаа. Цаашид энэ ажил амьдралд бүрэн утгаараа хэрэгжиж биелэлээ олоход хугацаа хэрэгтэй ч хотын доторх нэр хаягтай холбоотой ажил үйлчилгээг эрхэлдэг түргэн тусламж, гал команд, цагдаа, шуудан харилцаа зэрэг байгууллагын үйл ажиллагааг харилцан уялдуулах, түргэн шуурхай байхын үндэс болох учиртай.
Та нэр бүхий гудамжны бүртгэл, зургийг үзэхийг хүсвэл энд дарж үзэж болно.