Монгол улсад барилгын салбар үүсч хөгжсөний 84 жилийн ойн баярын мэндийг мянга мянган барилгачид, ахмадууд, тэдний гэр бүлийнхэнд ЗТБХБЯ-ны өмнөөс болон хувиасаа дэвшүүлж, хөдөлмөр бүтээлийн амжилт, сайн сайхан бүхнийг хүсэн ерөөе. Энэ онд салбарын яам харьяа газрууд, төрийн бус байгууллагууд, хувийн хэвшлийнхэн та бидний хамтран боловсруулсан 100 мянган айлын орон сууц, авто зам, сум дундын төслүүдийг УИХ-аас “Шинэ бүтээн байгуулалт” дунд хугацааны зорилтот хөтөлбөрт багтаан баталсан нь манай салбарынханд их бүтээн байгуулалтад манлайлан оролцож, ирээдүйн сайн сайхныг өөрсдийн гар, бие, сэтгэл оюунаар цогцлоон бүтээх хүндтэй, хариуцлагатай үүрэг болон ногдож байна. Засгийн газрын үйл ажиллагааны хөтөлбөрт тусгасан зорилтууд болон “Шинэ бүтээн байгуулалт” хөтөлбөрийг амжилттай хэрэгжүүлэхийн тулд та бид өнөөдөр салбарын өмнө тулгамдаж буй асуудлуудыг хамтдаа шийдвэрлэх нэгдсэн бодлого, нэгдмэл зорилттой ажиллах хэрэгтэйг энд зориуд дурдъя. Улс орноо хөгжүүлэх бүтээн байгуулалтын ажлуудыг манай барилгачид нэр төртэй хэрэгжүүлж, “Шинэ бүтээн байгуулалт”-ын төлөө нэгдэн, хамтран ажиллана гэж найдаж байна. Сайн үйлс дэлгэрэх болтугай. УИХ-ын гишүүн, ЗТБХБ-ын сайд Х.Баттулга