Үүрэг чиглэл өгөв
Нийслэлийн засаг даргын зөвлөлийн хурлаас дараахь үүрэг чиглэл гарлаа. Юуны өмнө Сууц өмчлөгчдийн холбооны гишүүн бус холбоодод үүссэн нөхцөл байдлыг нэг мөр болгохыг хотын дарга Г. Мөнхбаяр даалгасан юм. Учир нь өнөөдөр СӨХ-ны дээд зөвлөлд гишүүнээр элсээгүй 3 СӨХ байдаг гэнэ. Хотын дарга хэлэхдээ: Улаанбаатар хотын нутаг дэвсгэрт үйл ажиллагаа явуулж байгаа хэн ч бай хоттой хамтарч ажиллах ёстой. Ялангуяа сүүлийн жилүүдэд баригдаж буй орон сууцны хийц, дараа нь гарах техникийн аливаа асуудлууд анхаарал татаж байна. Зэвтэй ус хаа сайгүй гоожиж, шугам сүлжээний шахалт хяналтын функц шинээр баригдсан хорооллуудад тааруу байгааг хэллээ.
Ийм болохоор эхнээс нь хяналт тавьж ажиллах учиртайг онцоллоо. Мөн зам засварын ажилтай зэрэгцэн кабель шугмын асуудал босч ирж байгааг анхааруулсан. Газар доогуур болон гэрлийн шон дээр дур дураараа кабель татаж хэрснээс асуудал үүсч буйг албаны хүмүүст сануулж байна. Засаг даргын зөвлөлийн хурал дээр хөндсөн бас нэг гол асуудал бол эрх шилжүүлсэн ажлын гүйцэтгэл чанар болоод байна. Татвар төлөгчдийн мөнгөөр хийж гүйцэтгэж байгаа бүтээн байгуулалтын ажлуудад ганц л шаардлага тавина. Тэр бол чанар гэдгийг хатуу анхаарууллаа. Өнөөдрийн хуралдаанаар багагүй шүүмжлэл санал дагуулсан нийслэл хотын гэрэлтүүлэгтэй холбоотой ажлын хэсэг байгуулахаар болж байна. Өнөөдрийн байдлаар Улаанбаатар хотод 13 мянган гэрэл асч байна. Гэрэлтүүлгийг Цахилгаан тээвэр болон Гэрэлтүүлэг чимэглэл компани хариуцдаг юм байна. Монополь гэмээр эрх эдэлж буй дээрхи байгуулагууд технологийн шинэчлэл хийх, асахгүй байгаа гэрлүүдийг асаах тал дээр санаачлага муутай ажиллаж байгаа тул өрсөлдөгчтэй болгох талаар ярилцсан юм. Энэ асуудлаар ирэх даваа гарагт жичдээ хуралдахаар болж байна.