Eрөнхий сайдын говийн аймгуудаар ажиллах албан томилолт Дорноговь аймгаас эхэлж байна. Тэрбээр өчигдөр Сайншанд хотоос зургаан километрт байрлах сүү ногооны “Өнөрбаяр” фермерийн үйл ажиллагаатай танилцлаа. Тус фермер нь жижиг, дунд зээлийн хөрөнгөөр байгуулагдсан. Сайншанд хотын хамгийн том аж ахуй юм байна. Үхэр тахиа гахайн аж ахуйг голчлон эрхэлдэг төдийгүй тарвас, өргөст хэмх зэрэг нарийн ногоо тариалжээ.
йм хэмжээний фермер байгуулахад говьд байтугай хангай нутагт ч багагүй бэрхшээлтэй байдаг гэнэ. Тиймээс том ажлын ард гарсан “Өнөрбаяр” фермерийнхэнд баяр хүргээд, жижиг дунд бизнесийн зээл эзнээ олохын ач холбогдлыг сайшаажээ. Түүнчлэн орон нутагт ажлын байр бий болгож,үйлдвэрлэл амжилттай хийж байгаа хүмүүсийг дэмжиж ажиллахаа Засгийн газрын тэргүүн хэлсэн байна.
Үүний дараа Ерөнхий сайд С.Батболд Сайншанд хотын иргэдтэй уулзаж, аж үйлдвэрийн томоохон төвийг тус хотод байгуулахаар болсноо онцлов. Мөн бүтээн байгуулалтын томоохон ажлууд эхэлж байгаатай холбогдуулан боловсон хүчин бэлтгэх, 2010-2011 оны хичээлийн жилд их, дээд сургуульд суралцагчдын сургалтын төлбөрийг нэгдүгээр сараас эхлэн Хүний хөгжил сангийн хишиг хувиас тооцуулж төлөх болсон тухай тухай Засгийн газар өнгөрсөн долоо хоногт шийдвэрлэсэн.
Энэхүү шийдвэрүүд цагаа оллоо хэмээн сайшааж буйгаа дорноговьчууд уулзалтын үеэр Ерөнхий сайдад дуулгажээ. Мөн Аймгийн төвөөс Хамрын хийд хүртэлх 45 километр замын хөрөнгийн асуудлыг 2012 оны улсын төсөвт оруулах болсон байна. Иргэдтэй хийсэн уулзалтын дараа тус аймгийн төрийн албан хаагчидтай уулзжээ. Иргэдийн санал хүсэлтийг үйл ажиллагаандаа тусгаж хатуу анхаарч ажиллахыг Ерөнхий сайд үүрэг болгосон.