Барилга МН
Үнэлгээ
Нүүр
Үйлчилгээ
Холбоо барих
Танилцуулга татах
Барилга МН
Танилцуулга татах
Зурвас бичих
Messenger
Залгах
Нүүр
Мэдээ, мэдээлэл
Barilga
2019-11-05
Спорт цогцолбор үүдээ нээхэд 18 хоног үлдлээ
Хан-Уул дүүргийн Цагаан хаалганы баруун талд сүндэрлэж буй энэхүү Спорт цогцолборыг барихаар 2008 оны зургадугаар сарын 20-нд шав тавьж байсан. Харин одоо тууз хайчилж, түлхүүрээ гардан авч, үүдээ нээхэд сар хүрэхгүй хугацаа үлджээ. БНХАУ-ын Засгийн газрын буцалтгүй тусламжаар баригдсан энэхүү цогцолборыг сурвалжлахаар Яармагийг зорилоо.
Дэлхийн хэмжээний олон улсын томоохон тэмцээн зохион байгуулахад Монгол Улс болон спортын аль ч төрлийнхөн нүүрээ улалзуулахгүй болжээ.
Өөрөөр хэлбэл, өндөр нь 31 метр, заалны хэмжээ нь 70x40 метрийн хэмжээтэй гэсэн үг. Спортын төв ордны “А” зааланд жүдогийн хоёр татами байрлуулж, сагсан бөмбөг, волейболын ганцхан баг тоглох боломжтой. Тэгэхээр энэ цогцолборт жүдогийн найман барилдаан нэгэн зэрэг болж, сагсан бөмбөгийн дөрвөн баг зэрэг тоглолтоо үргэлжлүүлж болох нь ээ. “Ерөнхийдөө бол Монгол үндэсний гэр хэлбэртэй байхаар төлөвлөгдөж баригдсан. 5045 хүний суудалтай. Барилгын зураг төслийг БНХАУ-ын “Олон Улсын инженерийн дизайн ба зөвлөх” компанид хийсэн. Барилгын дизайн, архитекторын шийдэл, суурилуулсан тоног төхөөрөмж, дууны болон гэрлийн тоног төхөөрөмж, агааржуулалт, халаалтын систем бүгд хамгийн сүүлийн үеийнх” хэмээн Спорт цогцолборын ашиг-лалтын өмнөх захиргааны дарга С.Батсүх дарга онцолсон юм. Гэхдээ энэхүү спорт цогцолборт зөвхөн тэмцээн уралдаан л явагдана. Тэрнээс биш бэлтгэлийн заал, хувцасны өлгүүр, хоолны газар, ресторан, бар, бассейн энэ тэр огт байхгүй. Спортын төв ордонд тамирчид нэг зааланд бэлтгэлээ ч хийж, хувцсаа сольж, дасгалжуулагч нартайгаа нэг дор гээд ёстой л “бөөнддөг”. Харин шинэ Спорт цогцолборт бие халаалтын хоёр том өрөө гаргаж, тус бүртээ хувцас солих өрөөтэй. Үүнээс гадна тамирчид дасгалжуулагчдад зориулсан 11, хэвлэл мэдээллийн долоон төв, техникийн 19, албан тасалгаа-ны 19, үйлчилгээний дөрөв, эмнэлгийн анхан шатны, допингийн шинжилгээ авах дөрвөн төв, харуул хамгаалалтын найман гээд нийт 124 өрөөтэй юм байна.
Допингийн шинжилгээ авах төв гэхэд дотроо эрэгтэй, эмэгтэй гээд хоёр тусдаа тасалгаатай байх жишээтэй. Мөн телевизийн нэвтрүүлгийн нэг өрөө, тэмцээн тайлбарлагчийн дөрөв, радио узелийн нэг, цаг оноо бичих өрөөнүүд тус тусдаа байрлажээ.
Аюулгүй байдлыг дээд зэргээр хангажээ
Манай улсын томоохон цогцолбор газруудад хамгийн дутагдалтай зүйл бол агааржуулалтын систем. Харин энэ цогцолбор 5000 хүн амьсгалах, агааржуулалт болон, заалны дулаан солилцоо, галын аюулаас урьдчилан сэргийлэх гээд үзэгчдийн аюулгүй байдлыг дээд зэргээр хангажээ. Хэрэв гал түймэр гарвал хорт хий, утааг цагт 50000 шоо метр агаарыг сорж сэлгэх чадалтай дөрвөн ширхэг сэлгэлтийн агрегат суурилуулжээ. Үүнээс гадна заал руу 10 хаалгаар орох бол, аваарын үед түүнээс олон хаалга ажиллах юм байна. Дууны зориулалтаар АНУ-д үйлдвэрлэсэн 27600 ваттын чадалтай 18 чанга яригч, 24000 ваттын чадалтай 20 чанга яригч, 15000 ваттын чадалтай есөн өсгөгч зэргийг энд суурилуулжээ. Мөн АНУ-д үйлдвэрлэсэн тус бүр нь 1000 ваттын чадалтай 196 ширхэг гэрэл, 650 метр LED гэрэл, хоёр талын хананд LED дэлгэц суурилуулжээ.
С.Батсүх: Спорт цогцолбор одоохондоо нэр, логогүй байгаа
Спорт цогцолборын ашиглалтын өмнөх захиргааны дарга С.Батсүхээс барилгын талаар зарим зүйлийг тодрууллаа.
-Спорт цогцолбор гэрээ ёсоор товлосон хугацаандаа ашиглалтад орж байгаа юу?
-Тийм ээ. Барилгын ажлын ерөнхий гүйцэтгэгчээр Шанхайн барилгын ерөнхий групп ажиллан, гэрээ ёсоор барилга угсралтын ажлыг 27 сарын хугацаанд гүйцэтгэж, Монголын талд хүлээлгэн өгөх ёстой. Өөрөөр хэлбэл, 2010 оны есдүгээр сарын 20-нд гэсэн үг. Харин өнөөдрийн байдлаар Шанхайн барилгын компанийн ажилчид хоёр ээлжээр, маш шаргуу ажиллаж байгаа учраас энэ сарын 23-нд барилга угсралтын ажлыг бүрэн дуусгаж,ашиглалтад өгөх төлөвтэй байна.
-Хятадын 100 хувийн хөрөнгө оруулалтаар барьж байгаа учраас эхлээд тус улсын мэргэжлийн хяналтаар шалгуулж байгаа юу?
-Тэгэлгүй яахав. Барилга угсралтын ажлын үе шат бүрт Хятадын мэргэжлийн хяналтын байцаагчид ирж хяналт хийж, шаардлагатай акт, бичиг баримтуудыг бүрдүүлж ирсэн. Харин манай захиалагч байгууллагын буруугаас болж барилгын ажлын үе шат бүрд хийх ёстой байсан хяналтын ажлууд огт хийгдээгүй өнгөрсөн нь харамсалтай. Тэр ч байтугай гадаадад хийгдсэн зураг төслийг манай экспертийн хяналтаар оруулж, ажил эхлэх зөвшөөрөл аваагүй байсан нь өнөөдөр уг объектийг улсын комисс хүлээн авахгүй байх нөхцөлийг бий болгоод байна. Бид энэ асуудлыг холбогдох байгууллагуудад тавьж, шийдвэрлэх арга замыг хайж байна.
-Өөр бэрхшээлтэй зүйл юу байгаа вэ?
- Анх барилгын зургийн даалгавар өгөхдөө халуун усны хангамжийн асуудлыг тодорхой тусгаж өгөөгүйгээс обьектод халуун усны систем хийгдээгүй.
-Тийм үү. Сая жүдо бөхийн “Дэлхийн цом”-ын тэмцээн явагдахад зохион байгуулагчдын зүгээс саун, душ хангалттай байхыг шаардсан. Тэгэхээр жаахан хүндрэл гарах нь ээ?
-Халуун ус байхгүй болохоор яаж саун байх вэ дээ. Харин душны асуудлыг цахилгаан ус халаа-гууртай байхаар шийдэж, тоноглосон.
-Нийт хэчнээн төгрөгийн хөрөнгө оруулалтаар баригдсан бэ?
-Хоёр улсын Засгийн газар хоорондын хийсэн хэлэлцээрээр шийдвэрлэгдсэн асуудал тул би хөрөнгө санхүүгийн талаар яримааргүй байна. Гэхдээ манай талын санаачилгаар анх төлөвлөснөөс илүү олон ажил нэмж хийж байна. Тухайлбал, барилгад зориулж дөрвөн га газар олгосон. 1,2 га орчим талбайд барилга баригдсан. Үлдсэн талбайд авто зогсоол, ногоон байгууламж, байгуулах ажлыг Монголын тал хийхээр төлөвлөсөн байсан боловч Хятадын талд өөрийн хүч, хөрөнгөөр хийж өгөх хүсэлт тавьж, зөвшөөрсөн хариу өгсөн. Энэ ажил өнөөдрөөс эхэлж байна. Ойролцоогоор гурван сар хийгдэх төлөвтэй байна. Харин цогцолбор маань 5000 хүний суудалтай гэхээр дор хаяж 1000-1500 нь автомашинтай ирнэ биз дээ. Тийм болохоор авто зогсоолыг улсын хөрөнгө оруулалтаар хийхээр болсон. Зураг төслийг шинээр хийлгэж, тендер зарлах шатандаа явж байна. Их налуу есөн метрийн уналттай, 4.6 га талбайд зөвхөн зогсоол бариад зогсохгүй үзэгчдийн чөлөөт цагаа өнгөрүүлэх амралтын бүс байхаар тооцож зураг төслийг хийсэн.
-Аливаа цогцолбор барилгуудын амин сүнс нь нэр, лого байдаг. Яармагийн цогцолбор, Спорт цогцолбор гээд л нэрлээд байгаа?
-Спорт цогцолборын нэр, логог одоохондоо шийдээгүй байгаа. Ашиглалтад орсны дараа ашиглалтын захиргаа гэж байгуулагдана. Тэгээд Спорт цогцолборын нэр, логог тодруулахын тулд спортод ээлтэй залуучуудын дунд уралдаан зарлаж асуудлыг шийдвэрлэнэ.
-Ямар, ямар спортын тэмцээнүүд явуулах боломжгүй вэ?
-Дугуй, хөлбөмбөг, усан болон мөсний спортын тэмцээн явуулах боломжгүй. Бусад бүх спортын тэмцээн, уралдаан явагдах бүрэн боломжтой.
-Энэхүү спорт цогцолбор БТСГ-т харьяалагдах уу?
-Үгүй. Эрүүл мэндийн яаманд харъяалагдаж, улсын төсвөөс санхүүжнэ.