Зам, тээвэр, барилга, хот байгуулалтын яамны Сургалт, Судалгаа, Хөрөнгө оруулалт, Барилга захиалагчийн алба болон БНСУ-ын Ханьяаны Их сургуулиуд нь хоёр орны хамтын ажиллагааны хүрээнд Монгол улсын зам, барилга, хот байгуулалтын салбарын инженер техникийн ажилтны чадавхийг дээшлүүлэх, мэргэшүүлэх, шинээр нэвтэрч буй техник технологитой танилцуулах, туршлага солилцох зорилгоор хамтран ажиллахаар болсон юм.
Энэ сарын 22-24-ны өдрүүдэд тус сургуулийн Барилгын инженерийн сургуулийн захирал Shing Sung Woo, Олон улсын хамтын ажиллагааны газрын дарга Lee Ki Jeong нар Сургалт, судалгаа, хөрөнгө оруулалт, барилга захиалагчийн албатай Барилга, авто зам, төмөр замын салбарын 90 орчим инженерийг шалгаруулахад анхаарах зүйлс, ямар түвшний хүмүүсийг явуулах, суралцах хугацаа /хугацаа 3 - 12 сар/ зэргийг харилцан тохиролцож сургалтын хөтөлбөрийг хамтран боловсруулах юм. Үүний тулд Монголын барилгын салбарын хөгжлийн түвшин, техник технологитой танилцаж мэдээлэл авах зорилгоор ЗТБХБ-ын сайд Х.Баттулгатай уулзаж салбарын хэмжээнд хэрэгжиж буй төсөл хөтөлбөрүүдтэй танилцан санал солилцсон байна.