Нийслэл хотод зам барилгын ажил гүйцэтгэж байгаа 17 аж ахуйн нэгж өнөөдөр хатуу үүрэг даалгавар авцгаалаа. Тэд цаад талын хугацаа 9 дүгээр сарын 1 гэхэд бүх ажлаа дуусгахаар болж байна. Нэг үгээр хэлбэл хичээлийн шинэ жил эхлэхэд замын хөдөлгөөн түгжрэлгүй, иргэд бухимдахгүйгээр ажил албандаа явж байхын төлөө үлдсэн хугацаанд өдөр шөнөгүй ажиллах юм. Энэ үүрэг даалгаврыг Нийслэлийн Засаг даргын нэгдүгээр орлогч Б. Баатарзориг тэдэнд өгч байна. Ингэхдээ нэг зүйлийг онцгойлон анхааруулж байв. Улаанбаатар хотод замын ажил жилээс жилд нэмэгдэнэ. Ирэх жилүүдэд зам барилгын ажлын тендер авч ажил хийе гэвэл одоо гүйцэтгэж буй ажлаа чанарын өндөр түвшинд цаг хугацаанд нь дуусгах нь чухал болохыг тэмдэглэлээ. Энэ жилийн тухайд нийслэлд 4 эх үүсвэрээр замын ажил хийгдэж байна. Хотын төсвийн хөрөнгө оруулалтаар 4 тэрбум 650 сая төгрөг төсөвлөсөн. Энэ хөрөнгөөр нийт 10 ажил хийгдэхээс нэг замаас бусдад нь гүйцэтгэгч шалгарч ажилдаа оржээ.
Харин 100 айл Лхам худалдааны төвөөс Жоби барилгын материалын дэлгүүр хүртэлхи 300 метр замд гүйцэтгэгч олдоогүй байна. Мөн БГД-ийн 9,10,11 хорооны нутаг дахь гэр хороолол дундах замын ажил удааширч байгаа тухай мэдээллийг Нийслэлийн авто замын газрын дарга Д. Од танилцууллаа. Хоёр дахь нь замын сангийн хөрөнгөөр барьж буй 6 тэрбум 400 сая төгрөгийн өртөгтэй ажил. Энэ хөрөнгөөр гол гудамжууд, хороолол дундах зам болон тэмдэг тэмдэглээний ажил хийж байна. Үүнд Саппорагийн аюулгүйн тойрог, аюулгүйн тойргоос Гурвалжингийн гүүр хүртэлхи замын шинэчлэл, БЗД Энхтайвны өргөн чөлөөнөөс Жанжин клуб хүртэлхи 300 метр замын ажил орж буй юм байна. Гурав дахь ажил нь он дамжин хийгдэж буй автозамууд юм. Баруун 4 замаас 10 дугаар хорооллын уулзвар хүртэлхи энэ замын тухайд одоо Төмөр замын коллежоос баруун 4 зам хүртэлхи ажил үргэлжилж байна. Яг одоогийн байдлаар урд хэсгийг нь хааж зам засварын ажил хийж байгаа. 8 сарын 25 гэхэд дуусгана гэж байна. Мөн он дамжсан зам барилгын ажлын нэг нь Гурвалжингийн гүүр юм. 98 дам нуруу сольж буй юм. Төмөр зам дайран өнгөрдөгөөс шалтгаалан төмөр замтай хэсэг дээр өдөрт 2 цаг ажиллах шаардлага тулгардаг. Үүнээс болж хугацаа алдсан тал бий гэж танилцуулж байв. Зам барилгын ажлын 4 дэхь нь энэ жилээс цоо шинээр эхлүүлж буй эргэн төлөгдөх нөхцөлтэй зам барилгын ажлууд ажээ. Энэ нь гүйцэтгэгч компаниуд өөрсдөө хөрөнгийг нь гаргаж ажиллаад дараа нь улсаас энэ мөнгөө гаргуулж авах явдал. Нийтдээ 52,5 тэрбум төгрөгийн өртөгтэй 50 км зам энэ ажлын хүрээнд хийгдэнэ. 20 обьект байгаагаас 8 –ийг зам барилгын компаниуд авсан гэж байна. Энэ мэтээр нийслэл хотод өрнөж буй замын ажлын талаархи мэдээллийг сонссныхоо дараа хотын орлогч дарга Б. Баатарзориг зам барилгын компаний удирдлагууд үүрэг даалгавар өглөө. Он дамжсан болон энэ жил эхлүүлсэн бүх зам засварын ажил 9 дүгээр сарын 1 гэхэд дууссан байх ёстой. Хугацаа яаруулсан гээд чанар муутай, стандарт бус зам тавьж хэрхэвч болохгүй. Учир нь та бүхэн бизнесээ тэлж ирэх жилүүдэд нийслэл хотод хийгдэх зам барилгын ажилд үргэлжлүүлэн оролцоё гэвэл одоо хийж буй ажлаа чанарын өндөр түвшинд гүйцэтгэх учиртай гэдгийг анхаарууллаа. Зам барилгын хийж буй аж ахуй нэгжүүд дотор сайн ажиллаж байгаа нь ч бий. Саар ажилладаг нь ч бий. Нийслэлийн удирдлагууд бидний хувьд татвар төлөгчдийн мөнгөөр замын ажлуудыг хийлгүүлж байна. Мөнгөө төлсөн нь хөгжмөө захиалдаг гэдэг шиг эцсийн дүндээ иргэдийн сэтгэлд нийцсэн элдэв хэл ам араасаа дагуулахгүй сайн зам тавих нь та бүхний үүрэг гэж хэлэв. Замын компаний удирдлагууд ч үүрэг даалгаварыг биелүүлж үлдсэн хугацаанд цаг шахуу ажиллана гээд гарцгаалаа.